NENGE tom u u lu zan hemen heen ne. Mbaiserael mba eren tom u maan girgar u Yerusalem. Shighe u yange Tor Nebukadinesar tim Yerusalem anyom a karen 152 ken jime la, yange hembe girgar la shi nande ihinda i gar la kpaa. Mbaiserael yange ve hide ve maa girgar la shighe u ve hii hiden ken Babilon la ga.

Ú hen wer yange lu ior mban ken asema nena sha u lun heen ken anyom ne cii a girgar u kasen gar ve shio? Mba a mciem iyol. Mbaihomov vev vea fatyô u va nyôron tan num sha a ve a ican shio. Kpa hegen or u i yer er Nehemia ne ngu wasen ior mban sha u vea hide vea maa girgar ne yô. Ú fa or u Nehemia á lu kpa?

Nehemia ka Oriserael u ken gar u Shushan, hen ape Mordekai man Eseter ve lu la. Nehemia yange eren tom ken ya u tor, nahan alaghga yange lu huror u dedoo u Mordekai man Torkwase Eseter. Kpa Bibilo i pase shin yange Nehemia una e̱r tom sha ci u nom u Eseter, Tor Ahasueru ga. Yange e̱r tom sha ci u tor u yange dondo la, Tor Artashaseta.

Umbur, Artashaseta ka tor u dedoo u yange na Esera inyaregh kpishi er a̱ yem a mi ken Yerusalem a̱ za sôr tempel u Yehova la. Kpa Esera yange maa girgar u yange yôhôr la ga. De se nenge e̱r yange i hii ve Nehemia e̱r tom ne yô.

Anyom kar 13 er Artashaseta na Esera inyaregh sha u za sôron tempel kera yô. Nehemia lu orvesen u mba toonkwaghman mba Tor Artashaseta. Inja na yô ka a too wain a na tor, man shi a wa iko sha er or nana na tor icigh ki bough sha u a ma ga yô. Kwagh ne ka tom u vesen je.

Ka shami, iyange igen yô anngô u Nehemia Hanania kua ior mbagenev mba ken tar u Iserael ve va Nehemia inya. Ve ôr un mbamzeiyol mba Mbaiserael ve lu zuan a min cii, man shi e̱r girgar u Yerusalem a yôhôl a lu inya her yô. Kwagh ne na Nehemia hingir zunguluu kpishi, man a e̱r msen hen Yehova sha kwagh shon.

Iyange igen yô tor nenge er Nehemia lu zunguluu yô, nahan a pine er: ‘Kanyi ú lu zunguluu yum nahana?’ Nehemia kaa a na er ka sha ci u Yerusalem ngu ken mlu u kunya yum shi girgar na kpaa hembe cica cii. ‘Kanyi jim ú soo?’ tor pine un nahan.

‘De m yem ken Yerusalem,’ Nehemia kaa nahan, ‘sha er me za maa girgar la yô.’ Tor Artashaseta ka or u lun a mhôônom ma zungwen kpishi. A kaa er Nehemia una fatyô u yemen, man shi a wase un sha u zuan a ikon i eren tom la a mi kpaa. Ica kera gba ga tsô Nehemia za nyôr ken Yerusalem, a pase ior mbaawashima nav. Mhen la doo ve kpishi, nahan ve kaa er, ‘De se hii nen u maan je.’

Shighe u mbaihomov mba Mbaiserael nenge er girgar la lu moughon ityough sha yô, ve kaa er: ‘Se za nen se za wua ve, man se er sha u ve̱ de u maan yô.’ Kpa Nehemia ungwa kwagh ne, man a na mba maan mbara awange kua udagi. Shi a kaa er: ‘De luun a mciem iyol sha ci u mbaihomov asev mban ga. Nôngo nen ityav sha ci u anngôôv enev, kua sha ci u ônov enev, man sha ci u kasev enev, man sha ci u uya enev kpaa.’

Ior mbara ka mba taver asema kpishi. Ve wa iyol a ikav vev mbi numugh atetan kua tugh, man shi ve za hemen u maan kpaa. Nahan ken atô u ayange 52 tseegh man i maa girgar i bee. Hegen ne asema de u nyian ior. Nehemia man Esera ve tese ior tindi u Aôndo, man saan ior iyol kpaa.

Nahan cii kpaa akaa kera nga vough e̱r yange lu cii ve i mase kuran Mbaiserael yemen a ve uikangen ken Babilon la ga. Tor u Pershia ngu hemen ior mban man ka un kpaa ve lu eren un tom ye. Kpa Yehova er ityendezwa er una tindi tor u he, man ka tor ne kpaa una va a bem hen ior ye. Tor ne ka ana? Una va a bem shin tar nena? Anyom kar ken hemen kuma er 450 nahan cii ve shi i hen kwagh i seer sha kwagh ne ye. Nahan maa i mar wanikundan u hemban cii. Kpa ngura ka kwaghôron ugen.