YESU tile hen kpejôr ken Samaria sha u una mem yô. Mbahenen nav nyôr ken gar u za yamen kwaghyan. Kwase u Yesu a lu lamen a na ne a va sha u una va kese mngerem yô. A kaa a na er: ‘Nam mngerem m̱ ma.’

Kwagh ne kpiligh kwase ne iyol kpishi je. Ú fa ityôkyaa kpa? Ka sha ci u Yesu ka Oryuda, man un ka kwase Samaria. Man Mbayuda kpishi soo Mbasamaria ga. Mba lamen a ve tsô kpaa ga! Kpa Yesu soo hanma injaor cii. Nahan a kaa er: ‘Aluer wea fe or u nan lu sônon we mngerem ne yô, ma u sen un ma a neu mngerem ma umam.’

Kwase la kaa er: ‘Tere, ijôr ne i̱ za, man u ngu a bokoti tsô kpaa ga. Tsô ka hana u zua a mngerem ma umam mana?’

‘Aluer ú ma mngerem man yô imura shi ia kôrou,’ Yesu pase un nahan. ‘Kpa mngerem ma me nau la maa fatyô u nan or uma u tsôron.’

Kwase la kaa er: ‘Tere, shi nam mngerem man! Tsô imura ia kera kôrom mayange ga. Man shi me kera vaan heen sha u va kesen mngerem kpaa ga.’

Kwase la hen er Yesu ngu ôron kwagh u mnger jim jim. Kpa ngu ôron ka kwagh u mimi u Aôndo man tartor na. Mimi ne ngu inja er ka mngerem ma nan uma nahan. Una fatyô u nan or uma u tsôron.

Yesu shi kaa a kwase la er: ‘Za za yila nomou nahan va nen imôngo.’

‘M ngu a nom ga,’ a kaa nahan.

‘U kaa ka shami vough,’ Yesu kaa nahan. ‘Kpa ú vande lun a noov utaan, man or u ú lu vea na hegen ne kpaa ka nomou ga.’

Cier kwase la iyol, sha ci u kwagh ne cii lu mimi. Yesu yange er nena ve fa akaa ne ciilii? Een, ka sha ci u Yesu ka Un u i Tôndozwa sha na u Aôndo tindi la, nahan Aôndo na un mkaanem man. Hen shighe ne mbahenen mba Yesu za hide, tsô kpiligh ve iyol er a lu lamen a kwase Samaria yô.

Kanyi se hen sha kwagh ne ciilii? Kwagh ne tese er Yesu ngu a mhôônom ma kôron sha hanma ikurior cii. Man se kpaa doo u se lu a min nahan. Se gba henen tsô ser ior mbagenev ka mbabov sha ci u ve due ken ikur igen yum ga. Yesu soo er ior cii ve̱ fa mimi u una na uma u tsôron la. Man se kpaa doo u se lu a isharen i wasen ior sha u ve̱ hen mimi yô.