KPA ahii! Kanyi i̱ lu zan hemen heenee? Wanakiriki u a yav hen inya heen ne a vihi iyol kpishii? Nenge! môm ken ior mba ve lu duen ken iyou mbara ka Paulu! Ú fatyô u nengen a Timoteu heela kpa? Wanakiriki ne osough sha windou gba shinii?

Een, ka kwagh u yange er vough je la. Paulu lu nan kwaghôron hen mbahenen mba hen Teroa. A fa dedoo je er una kera nenge a ve ga shighe a kar sha ci u gba u sev mbua av yô una nyôr tso una yem. Sha ci u nahan yô a za hemen u ôron kwagh zan zan atôutu.

Ka shami, wanakiriki u i yer un er Utiku la tema sha windou, man gba mnyam. Man a osough, a due sha windou, sha kpoyou u sha utar la je a va gba shin inya! Nahan u nenge er i hii ve ishima i nyian ior mban yum yô. Shighe u ior mbara mba tee wanakiriki la yô, ka di vough er ve lu cian la nahan. A kpe!

Tsô Paulu nengen er wanakiriki la kpe yô, a yav sha a na man a kuve un. Tsô a kaa er: ‘Asema a de nyian ne ga. Gadia ngu gbang gbang!’ Man ngu uma kpaa! Ka ivande! Paulu hide un a uma na heregh! Ikpelaior la cii i̱ iv a iember.

Ve cii ve hide ve unde sha kpoyou u sha la ve za ya kwaghyan. Paulu za hemen u lamen zan zan sev av. Kpa fa di tsô Utiku kera hide shi gba mnyam ga! Tsô Paulu, Timoteu man mba ve lu yemen vea na imôngo la ve nyôr shin tso. Ú fa hen ape ve lu yemen kpa?

Paulu zulum u kuren zende u kwaghpasen na ú sha utar la, nahan ngu yemen ken ya na hegen. Ken zende na u ngun ne Paulu tsa ken gar u Efese tseegh anyom atar. Nahan zende ne ú hemba lihen a u sha uhar la ca je.

Er ve undu Teroa kera yô, tso la tile hen Milete anshighe kpeghee. Er Efese lu umai kpeghee tseegh a ijiir ne yô, Paulu tindi hen mbatamen mba ken tiônnongo sha u ve̱ va ken Milete sha er una ôr kwagh a ve kwa u masejime yô. Been kera, shighe va kum u tso una mough yô, vihi ve u nengen er Paulu á lu undun ve yemen tsô!

Ken masejime yô tso la va a̱r ken Sesaria. Er Paulu lu heen hen ya u orhenen Filibu yô, profeti Agabu ta Paulu icin. A kaa er Paulu una hingir u lun uikangen shighe u una va nyôr ken Yerusalem yô. Man vough nahan, ka kwagh u a er je ne. Tsô, tse ken gaadi ken Sesaria ka kom anyom ahar yô, i tindi Paulu ken Roma sha u i̱ za ôr un ijir sha ikev i Shisar orhemen u Roma. De se nenge kwagh u a za hemen er ve lu yemen ken Roma la.