NENGE ugôgômbaikyonov mbara, uimondon mba doonashe mbara man iwo i taven la. Dooashe heen ga he? Nenge er iho la i̱ lu yan kwagh ken uwegh ku wanyenomso la yô. Man shi nenge er ubegha man anyinya la a til sha gwergwer keela la. A doou u lun ken ya u a lu hen ijiir er i ngin nahan ga he?

Aôndo soo er we u lu uma gbem sha won shin tar ken paradiso. Man shi á soo er we u zua a ma iyol nyoon shin iangev mbi ior ve lu zuan a ican i yan shami nyian ne ga. Ka ityendezwa i Bibilo hen mba vea lu ken paradiso u he la je ne: ‘Aôndo una lu a ve. Ku ua kera lu ga shin mliam shin mnyoon kpaa ga. Akaa a tse la aa kar kera.’

Yesu una nenge er mbamgem mba kpilighyol mban ve va. Ú fa shighe shon kpa? Een, ka shighe u una kile akaabo man ior mbabov cii shin tar kera la. Umbur, shighe u Yesu lu shin tar la yange bee ior iangev atô kposo kposo, man shi nder ior shin mbakpenev je kpaa. Yesu yange er kwagh ne sha u tesen kwagh u una va e̱r sha tar cica cii shighe u una hingir Tor u tartor u Aôndo yô.

Hen ase ken ishima er á lu kwagh u kpilighyol ken paradiso u he u shin tar la yô! Yesu, kua mbagenev mba a tsough yô, vea lu hemen sha. Mbahemenev mban vea wa iko sha hanmaor shin tar man shi vea nenge er saan ve iyol kpaa. De se nenge kwagh u i gbe u se e̱r sha er Aôndo una na se uma u tsôron ken paradiso u he la yô.