ITYOUGH PUE KAR ITIAN
Gbenda u Civir Aôndo sha Mimi
1. Ka an nana tese se gbenda u civir Aôndo sha mimi?
UKWAGHAÔNDO kpishi ka ve kaa ér ve mba tesen mimi sha kwagh u Aôndo. Kpa kwagh a fatyô u lun nahan ga sha ci u ukwaghaôndo mba tesen akaa kposo kposo sha kwagh u or u Aôndo a lu, man gbenda u i gbe u a civir un la. Se er nan ve se fa gbenda u civir Aôndo sha mimi? Ka Yehova tseegh una tese se gbenda u mimi u i gbe u se civir un la ye.
2. U er nan ve u fa gbenda u civir Aôndo sha mimi laa?
2 Yehova na se Bibilo sha u se time ker se fa gbenda u civir un sha mimi la. Sha nahan yô, hen Bibilo, tsô Yehova una wase u u zua a mtsera ken ityesen na, sha ci u kwagh wou gba un ishima tsung.—Yesaia 48:17.
3. Ka nyi Aôndo a soo ér se ere?
3 Ior mbagenev ka ve kaa ér Aôndo lumun a ukwaghaôndo cii, kpa Yesu tese se nahan ga. A kaa ér: “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha” la tseegh. Sha nahan yô, gba hange hange u se fa kwagh u a lu ishima i Aôndo la, shi se eren un kpaa. Beer ngu sha kwagh ne ga, sha ci u Yesu yange yila mba ve ongo imo i Aôndo ga la ér mbaaferev shin “mbavendanatindi.”—Mateu 7:21-23.
4. Yesu yange ôr nyi sha kwagh u eren ishima i Aôndo laa?
4 Yesu yange pase se wang ér, aluer sar se u eren ishima i Aôndo yô, se tagher a mbamtaver. A kaa ér: “Nyôr nen hen hunda u hogholoo, gadia gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô. Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” (Mateu 7:13, 14) Gbenda u imbishi, u u lu gbenda u civir Aôndo sha mimi la ka u zan a or ken uma u tsôron. Gbenda u bele bele, u u lu gbenda u civir Aôndo sha mimi ga la ka u zan a or ken ku. Kpa Yehova soo ér or môm kpa nana kpe ga. A na hanma or ian ér nana fa kwagh na.—2 Peteru 3:9.
GBENDA U CIVIR AÔNDO SHA MIMI
5. U er nan ve u fa ior mba civir Aôndo sha mimi laa?
5 Yesu yange kaa ér se fatyô u fan ior mba ve civir Aôndo sha mimi la. Se fatyô u fan ve sha u tôvon sha akaa a ve ne jighjigh a mi, man a ve eren la. A kaa ér: “Ka sha atam a ve man né fa ve ye.” Shi a kaa ér “Hanma kon u injaa [ngu] um atam a injaa je.” (Mateu 7:16, 17) Kwagh ne tese ér mba ve civir Aôndo sha mimi la mba eren isholibo ga ze. Kpa ka ve nôngon ér vea eren kwagh u mimi hanma shighe cii. De ase se nenge kwagh u una wase se u fan ior mba ve civir Aôndo sha mimi la yô.
6, 7. Er nan ve mcivir u mimi a tesen kwagh u ken Bibilo tseeghle? Ikyav i Yesu la tese se nyi?
6 Gba u se civir Aôndo er Bibilo i tese la. Bibilo kaa ér: “Icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo” yô. (2 Timoteu 3:16, 17) Apostoli Paulu yange nger Mbakristu washika kaa ér: “Zum u ne ngohol kwaghôron u Aôndo u ne ungwa hen vese la yô, ne lumun un er ka kwaghôron u ior ga, kpa er ka kwaghôron u Aôndo man kape i lu kpaa je la.” (1 Mbatesalonika 2:13) Mcivir u mimi la tesen kwagh u ken Bibilo, i i lu Mkaanem ma Aôndo la tseegh. Mcivir ne tesen mbamhen mba iorov shin aeren a ityôô shin ma kwagh ugen ga.
7 Hanma kwagh u Yesu yange tesen ior cii lu ken Mkaanem ma Aôndo. (Ôr Yohane 17:17.) Ashighe kpishi yange a ter kwagh u i nger ken Ruamabera la jighilii. (Mateu 4:4, 7, 10) Mbacivir Aôndo sha mimi mba dondon ikyav i Yesu la, nahan hanma kwagh u ve tesen ior cii ka i lu u ken Bibilo.
8. Yesu yange tese se u civir Yehova nena?
8 Gba u se civir Yehova tseegh. Ekesodu 6:3 kaa ér: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.” Yesu yange soo ér ior ve fa Aôndo u a lu u mimi la sha iti na, nahan a pase ior iti i Aôndo. (Ôr Yohane 17:6.) Yesu kaa ér: “Civir Ter [Yehova, NW], Aôndo wou, ka Un tseegh er Un tom ye.” (Mateu 4:10) Nahan, er se lu mbacivir Aôndo yô, se mba dondon ikyav i Yesu la. Ka Yehova tseegh se civir ye, shi se mba yer sha iti na, shi se mba tesen ior iti i Aôndo kua kwagh u una va er sha ci wase la kpaa.
9, 10. Se mba tesen ser se doo ayol a ase nena?
9 Gba u ior vea doo se ishima sha mimi. Yesu yange tese mbahenen nav ér ve doo ayol a ve. (Ôr Yohane 13:35.) Sea lu mbanyarev shin mbaibanave shin aeren a ityôô a ase aa zua ga, shin sea due han han je kpa, kwagh gba sha kwagh la ga. Mdoo u se doo ayol a ase la na yô se mba ken mzough, se mba anmgbianev mba nomso man mba kasev. (Mbakolose 3:14) Sha nahan yô, se mba ze ityav ga shi se mba woo or kpaa ga. Bibilo kaa ér: “Ka sha kwagh ne man i pase ônov mba Aôndo a ônov mba diabolo ye; Hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa.” Shi i̱ kaa ér: “Se doo ayol a ase, i̱ de luun er Kain u a due ken Orbo man a wua anngô na la nahan ga.”—1 Yohane 3:10-12; 4:20, 21.
10 Ka se na shighe wase sha u wasen mbagenev, shi se wase ve sha agee a ase, shi se na ve akaa a se lu a mi yô, sha u taver ayol a ase asema. (Mbaheberu 10:24, 25) Se mba ‘eren akaa a doon a ior cii.’—Mbagalatia 6:10.
11. Er nan ve se ne jighjigh ser ka sha ikyev i Yesu tseegh Aôndo una yima ioroo?
11 Gba u se ungwan imo i Yesu sha ci u ka sha ikyev na tseegh Aôndo una yima ior ye. Bibilo kaa ér: “Myom ngu ken ma or ugen kpaa ga; gadia ma iti igen i i ne ior i á yima se a mi keng yô, ngi sha won kpaa ga.” (Aerenakaa 4:12) I pase se ken Ityough ki sha 5 ki takerada ne ér, Yehova yange tindi Yesu ér a va na naagh sha uma na sha u paan uumace mba ve ongo imo i Aôndo la. (Mateu 20:28) Yehova tsua Yesu ér a va lu Tor u tar ne. Ka nahan ve Bibilo i kaa a vese ér aluer se soo u lun uma gbem sha won yô, saa se na Yesu jighjigh ye.—Ôr Yohane 3:36.
12. Er nan ve se nyer iyol ken pati u eren ga?
12 Gba u se eren pati ga. Yesu yange eren pati ga. Shighe u i lu ôron un ijir la kpa, yange kaa a Pilatu, Orroma u lu orhemen la ér: “Tartor Wam ka u shin tar ne ga.” (Ôr Yohane 18:36.) Se mba suen Tartor u Aôndo u sha la er Yesu nahan. Sha nahan yô, hanma ijiir i se lu cii kpa se mba we ave sha akaa a patii ga. Nahan kpa, Bibilo wa se kwagh ér se ungwan imo i “tahav mbu [se] lu mbu sha ikyev la.” (Mbaromanu 13:1) Ka se dondo atindi a tar u se lu ker la. Nahan kpa, ma tindi u tar wase ka una hendan a atindi a Aôndo yô, ka se dondo ikyav i mbaapostoli la, yange ve kaa ér: “Ka u sé hemba ungwan imo i Aôndo keng a imo i ior.”—Aerenakaa 5:29; Marku 12:17.
13. Ka nyi se pasen ior sha kwagh u Tartor u Aôndo?
13 Se na jighjigh ser ka Tartor u Aôndo tseegh ua va bee a mbamzeyol mba tar ne ye. Yesu yange kaa ér, a pase “Loho u Dedoo u tartor ne” sha tar cii. (Ôr Mateu 24:14.) Gomoti môm kpa una fatyô u eren kwagh u Tartor u Aôndo ua er la ga. (Pasalmi 146:3) Yesu tese se ér se eren msen ser Tartor u Aôndo u va. A kaa ér, “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Bibilo pase se ér, Tartor u Aôndo ua kar a ugomoti mba tar ne kera, “kpa u yô, ua lu gbem sha won.”—Daniel 2:44.
14. U nenge wer ka unô ve lu civir Aôndo sha mimi?
14 Er u tim sha akaa ne cii yô, pine iyol you wer: ‘Ka unô ityesen ve cii i dugh ken Bibilo? Ka unô ve pasen ior iti i Aôndo? Ka unô ve doo ayol a ve sha mimi, shi ve ne jighjigh ér Aôndo tindi Yesu ér a va yima se? Ka unô ve nyôron iyol ken pati u eren ga? Ka unô ve pasen ér ka Tartor u Aôndo tseegh ua va bee a mbamzeyol aseva?’ Ka Mbashiada mba Yehova tseegh.—Yesaia 43:10-12.
GBA U U ER NENA?
15. Saa se er nyi keng ve se civir Aôndo sha gbenda u a lumun a mi laa?
15 Jighjigh u nan saa sha u fan ér Aôndo ngu tseegh tsô ga, sha ci u ujijingi mba bov shin azôv je kpa na jighjigh ér Aôndo ngu, kpa mba ongo imo na ga. (Yakobu 2:19) Aluer se soo ser se civir Aôndo sha gbenda u a lumun a mi la yô, saa se na jighjigh ser ngu shi se eren hanma kwagh u a kaa cii.
16. Gba u se venda kwaghaôndo u aiegh sha ci u nyi?
16 Saa se venda kwaghaôndo u aiegh ve se civir Aôndo sha gbenda u a lumun a mi la ye. Profeti Yesaia yange nger ér: “Due nen ker atô na kera; wanger nen ayol a en.” (Yesaia 52:11; 2 Mbakorinte 6:17) Ka nahan ve i gbe u se venda hanma kwagh u a gbe a biishi a mcivir u aiegh cii ye.
17, 18. “Zegebabilon” ka nyi, man gba u se due ken a na kera fese sha ci u nyi?
17 Kwaghaôndo u aiegh ka nyi? Ka hanma kwaghaôndo u a tesen ér se civir Aôndo sha gbenda u Mkaanem ma Aôndo ma vende la cii. Bibilo zom ukwaghaôndo mbaaiev cii yila ér “Zegebabilon.” (Mpase 17:5) Sha ci u nyi? Yange i tim tar sha Mngerem ma Deemee sha ayange a Noa la, shighe kar yô, atesen a kwaghaôndo u aiegh kpishi hii ken gar u Babilon. Atesen a aiegh la maa samber sha tar cii. U tesen ikyav yô, ior mba ken Babilon yange ve civir mbaaôndo utar mba ve nenge ér mba kwagh môm yô. Nyian kpa, ukwaghaôndo kpishi mba tesen ér Aôndo ka Triniti, kpa Bibilo tese wang ér Aôndo u mimi ngu môm tseegh, ka Yehova, Yesu gema ka Wan na. (Yohane 17:3) Ior mba ken Babilon shi yange ve na jighjigh ér or ka nana kpe yô, nan za lu uma ijiir igen shi nana fatyô u za yan ican ken igyamusu. Kwagh la ka mimi ga.—Nenge Ngeren u Seer Tan Iwanger u sha 14, 117 man 18, peeji 213-215.
18 Aôndo tsengaôron ér ica ia kera gba ga tsô, a tim ukwaghaôndo mbaaiev cica cii kera. (Mpase 18:8) U kav er i hii ve i gbe u u due ken kwaghaôndo u aiegh kera ve ga̱? Yehova soo ér we u er nahan, gayô shighe a va kar.—Mpase 18:4.
Aluer u ngu civir Yehova vea mba ve civir un sha mimi la imôngo yô, u lu ken tsombor ve u sha tar cii la
19. Aluer u tsua u civir Yehova yô, una nenge sha a we nena?
19 Aluer u soo u duen ken kwaghaôndo u aiegh kera va civir Yehova yô, alaghga azende a ou shin tsombor wou ua kav kwagh u u tsough u eren la ga shi vea er a we caveraa. Kpa fa wer Yehova una undu u ga. U lu ken tsombor môm vea ior umiliôn imôngo sha tar, mba ve doo ayol a ve sha mimi, shi ve lu a ishimaverenkeghen i va lun uma gbem sha won ken tar u Aôndo u he la. (Marku 10:28-30) Ken masejime yô, alaghga azende a ou agen kua ior mbagenev hen tsombor wou mba ve hendan a we sha ci u u tsua u civir Yehova yum la kpa, vea va lumun u henen Bibilo.
20. Gba hange hange u se civir Aôndo sha mimi sha ci u nyi?
20 Ica a kera gba ga tsô Aôndo una tim hanma iferkwagh cii, shi Tartor na ua hemen tar cii. (2 Peteru 3:9, 13) Hen shighe la tar ua doo je a zua ga! Hanmaor nana civir Yehova sha gbenda u a soo la. Sha nahan yô, gba hange hange u se er kwagh sha kwagh ne hegen, nahan se civir Aôndo sha mimi.
