1, 2. Ka unô nahan yange ve lu azende a Yehova?

KA NYI or nahan u soo wer nana lu ijende you we? Ka or u u soo kwagh u nan la. Ka or u kwagh wou a doo nan ishima, shi we kpa kwagh u nan a doo u ishima, nahan ne hingir kôôsôô yô. Ka or u nan fe kwagh shi nan lu a aeren agen a a doo u yô.

² Yehova Aôndo ka a tsua uumace mbagenev ér ve lu azende a na. U tesen ikyav yô, Aberaham kpa yange lu ijende i Yehova. (Yesaia 41:8; Yakobu 2:23) Shi Yehova yange soo Davidi kpaa. Yange kaa ér Davidi ka ‘or u sha ishima na vough.’ (Aerenakaa 13:22) Profeti Daniel kpa yange doo Yehova ishima kpishi.—Daniel 9:23.

3. Aberaham man Davidi kua Daniel yange ve er nan ve ve ya ijende a Yehova?

³ Aberaham man Davidi kua Daniel yange ve er nan ve ve ya ijende a Yehova? Yehova yange kaa a Aberaham ér: “U we imo Yam ikyo.” (Genese 22:18) Yehova ye ijende a ior mba ve hide a iyol ijime, ve ongo imo na yô. Ikyurior jimin cii je kpa ia fatyô u lun azende a na. Yehova yange pase ikyurior i Iserael ér: “Ver nen ato sha imo Yam, nahan Me hingir Aôndo wen, man shi ne kpaa né hingir ior Av.” (Yeremia 7:23) Nahan we kpa gba u u ungwan imo i Yehova, aluer mimi je u soo u yan ijende a na yô.

4, 5. Yehova kor azende a na nena?

⁴ Bibilo kaa ér Yehova ngu keren igbenda i una “pase  agee Na hen mba asema a ve a lu jighelaa her a Na yô.” (2 Kroniku 16:9) Yehova tôndo zwa a mba ve lu azende a na la ken Pasalmi 32:8 ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.”

⁵ Orihyom wase ugen u a lu a tahav kpishi yô, soo ér se pav ijende a Aôndo. Kpa Yehova soo u kuran se. (Ôr Pasalmi 55:22.) Er se lu azende a Yehova yô, se soo u civir un a ishima yase cii. Ka sea tagher a mbamtaver kpa se civir un sha mimi her. Shi se mba a vangertiôr er orpasalmi kpa yange lu a mi nahan. Yange ôr kwagh u Yehova ér: “Er A lum ken uwegh ku yanegh yô, me tenger ga.” (Pasalmi 16:8; 63:8) Kpa ka sha igbenda i nyi nahan Satan ka a nôngon ér se̱ pav ijende vea Aôndo?

6. Ka nyi Satan yange ôr sha kwagh u uumacee?

⁶ I pase ken Ityough ki sha 11 ér Satan yange puu Yehova shi kaa ér ngu oraie, shi ngu nzughul a Adam man Ifa er a ne ve ian i tsuan kwagh u a lu u dedoo man u bo la ayol a ve ga yô. Takerada u Yobu pase se ér Satan shi gbe ahon sha kwagh u uumace mba ve soo u yan ijende vea Aôndo la kpaa. Satan kaa wener ior mba civir Aôndo ka sha ci u A doo ve ishima ga, kpa ka sha ci u akaa a dedoo a a ne ve la. Satan kaa je ér, una fatyô u geman hanma or cii nana de u civir Aôndo. De se time sha kwagh u Yobu, shi se nenge er Yehova yange kura un yô.

7, 8. (a) Yehova yange nenge Yobu nena? (b) Satan yange ôr kwagh u Yobu ér nyi?

⁷ Yobu yange lu nyi oro? Yange lu or u fan kwagh. A kpe anyom kar hegen kuma 3,600. Yehova yange kaa ér or môm shin tar kuma sha a na shighe u lu uma la ga.  Yobu lu or u cian Aôndo tsung, shi soo kwagh u ifer ga. (Yobu 1:8) Sha nahan yô, Yobu lu ijende i Yehova i mimi.

⁸ Satan yange kaa wener Yobu ngu civir Aôndo ka sha ci u mtsera na tseegh. Satan kaa a Yehova ér: “U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!”—Yobu 1:10, 11.

9. Yehova yange na Satan ian ér a er nyi?

⁹ Satan naha Yobu tar ér ngu civir Yehova ka sha ci u mtsera u una zua a mi hen a Na la tseegh. Shi kaa wener una fatyô u yangen Yobu u civir Yehova. Yehova lumun a kwagh u Satan ôr ne ga, kpa gema na Satan ian ér a kar Yobu a nenge, aluer Yobu ya ijende a Yehova ka sha ci u Yehova doo un ishima sha mimi ga yô.

10. Satan yange er Yobu atsan nena, man Yobu er nena?

¹⁰ Hiihii yô, Satan yange tim uzendenya mba Yobu lu a mi la cica cii. Been yô, wua mbatomov mba Yobu kpishi. Akaa a Yobu cii saa. Satan mase wuan ônov mba Yobu lu a mi pue mbara cii sha zegehiar. Nahan cii kpa Yobu lu civir Yehova sha mimi her. “Ken akaa ne cii Yobu er kwaghbo ga, a na Aôndo ibo ér A er kwagh u kpeegh kpaa ga.”—Yobu 1:12-19, 22.

11. (a) Lu nyi igen kpa Satan er Yobu? (b) Yobu yange er nena?

¹¹ Satan yange de ga shi za naha Aôndo tar kaa ér: “Bende ikyuhe na kua inyam na, tsô una venda U sha ishigh Yough je.” Nahan Aôndo na Satan ian ér, a za ta Yobu angev mbu nyoon tsung. (Yobu 2:5, 7) Kwa ne kpa, Yobu za hemen u civir Yehova sha mimi her. A kaa wener: “Zan zan me kpe je kpaa, me gbihi mimi wam ga.”—Yobu 27:5.

12. Yobu yange tese ér Satan ka oraie nena?

 ¹² Cuku tsô kpa Yobu yange fa ér ka Satan a lu senden un ityough ga, shi fa er i hii ve un lu yan ican kpishi nahan kpaa ga. Yange hen ér ka Yehova a ve un a atsan la ye. (Yobu 6:4; 16:11-14) Nahan cii kpa, Yobu lu civir Yehova sha mimi her. Mimi maa due sha kwagh ne wang. Yobu yange ya ijende vea Aôndo sha ci u keren mtsera na tseegh tsô ga, kpa lu sha ci u Aôndo doo un ishima. Akaa a Satan ôr sha a na la cii lu mbaaie cica!

13. Er Yobu ya ijende a Yehova sha mimi yô, lu nyi i due kere?

¹³ Shin er Yobu fa kwagh u lu zan hemen sha ya u Aôndo ga nahan kpa, lu civir Aôndo sha mimi her, nahan a tese ér Satan ka iferor. Yehova yange na Yobu injar sha ci u lu ijende na i mimi.—Yobu 42:12-17.

14, 15. Satan ngu senden nomso man kasev cii ityough kaan ér nyi?

¹⁴ U fatyô u henen akaa a injaa ken kwagh u yange er Yobu la. Nyian ne, Satan ngu senden se ityough ér se mba civir Yehova ka sha ci u akaa a A ne se la tseegh. Ken Yobu 2:4 la, Satan kaa ér: ‘Hanma kwagh u or nan lu a mi cii, nana na sha ci u uma u nan.’ Sha nahan yô, ka Yobu tseegh Satan yange sende un ityough ga, kpa ngu senden nomso kua kasev cii ityough ér mba keren ka mtsera ve tseegh. Yobu yange kpe anyom kar uderi imôngo kpa Satan za hemen u lahan Yehova shi senden mbacivir un ityough. U tesen ikyav yô, i ôr ken Anzaakaa 27:11 ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.”

¹⁵ U fatyô u tsuan wer u ungwan imo i Yehova shi u lu ijende na i mimi, nahan tesen wer Satan ka oraie. Aluer gba u u de akaa a hange hange agen ken uma wou wer u  hingir ijende i Aôndo je kpa, fa wer ka kwagh u hemban doon u i gbe u u er je la! Asenge nga sha kwagh ne ga. Satan kaa ér aluer we u tagher a atsan yô, u de u civir Aôndo sha mimi. Ngu a nôngo ér una bume se se̱ de u civir Aôndo sha mimi. Ngu a er kwagh ne nena?

16. (a) Ka sha igbenda i nyi nahan Satan ngu a meen ior ér ve de u civir Yehova? (b) Satan una mee u ér u de u civir Yehova nena?

¹⁶ Satan ka a meen se sha igbenda kposo kposo sha u una nôngo yô se pav ijende a Aôndo. Ka a ta num sha a vese er ‘begha u tan kume u a keren or u una ya’ nahan. (1 Peteru 5:8) Nahan zum u azende a ou shin mba hen tsombor wou, shin mbagenev ve lu yangen we u henen Bibilo shi eren kwagh u vough yô, i de kpiligh we iyol ga. Alaghga a lu u ken ishima er ve ta num sha a we nahan. * (Yohane 15:19, 20) Satan shi ngu a gema iyol na “er ka ortyom u iwanger nahan.” Nahan alaghga una ker gbenda u meen se ér se hemba Yehova ato. (2 Mbakorinte 11:14) Gbenda ugen u Satan ngu a meen se er se de u civir Yehova yô, ka u nan ér se hen ser ieren yase doo kuma u se civir Aôndo ga.—Anzaakaa 24:10.

17. Se mba ongo imo i Yehova sha ci u nyi?

¹⁷ Ka sea ungwan imo i Yehova yô, se tese ser Satan ka oraie. Nahan ka nyi se er ve se lu mba ungwan imo i Aôndo? Bibilo kaa ér: “TER Aôndo A̱ doo u ishima a ishima you cii man a uma wou cii man a agee ou cii.” (Duteronomi 6:5) Se mba ongo imo i Yehova sha ci u a doo se  ishima. Aluer Yehova ngu doon se ishima seer a seer yô, se soo u eren hanma kwagh u a kaa ér se er cii. Apostoli Yohane yange nger ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.”—1 Yohane 5:3.

18, 19. (a) Ka aeren a nyi nahan Yehova a kaa ér ka a shami ga? (b) Er nan ve se fe ser Yehova kaan a vese ér se er kwagh u a gande se agee ga?

¹⁸ Kpa ka aeren a nyi nahan Yehova a kaa a vese ér ka a shami ga? I ter aeren ne agen ken ngeren u a lu a itinekwagh ér “ Kôr Kwagh u Yehova A Soo Ga la Ihyom” la. Alaghga sha hiihii la u lu henen wer akaa ne agen vihi joo ga. Kpa u nguren ôron avur a Bibilo shi henen sha akaa shon tsembelee yô, u mase kaven er i lu a inja u kuran atindi a Yehova yô. Shi u nenge wer gba u u de akaa agen ken uma wou. Shin er alaghga ashighe agen a taver we nahan kpa, aluer u de akaa la yô, u zua a bem u ken  ishima man msaanyol u azende a Aôndo a mimi a lu zuan a mi la. (Yesaia 48:17, 18) Er nan ve se fe ser or a fatyô u den akaa a Aôndo a soo ga la ken uma u nana?

¹⁹ Mayange je Yehova kaan ér se er ma kwagh u a gande se agee ga. (Duteronomi 30:11-14) Er a lu ijende i mimi yô, a fa se hemba er se fe ayol a ase la ica je. A fa tahav asev kua mbamyen asev. (Pasalmi 103:14) Apostoli Paulu taver se ishima ér: “Aôndo yô, ka u jighjigh, Una lumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.” (1 Mbakorinte 10:13) Nahan se fatyô u lun a vangertiôr ser Yehova una na se agee a eren kwagh u vough hanma shighe cii. Una na u “agee a hemban la” sha er aa wase u u wan ishima a mbamtaver yô. (2 Mbakorinte 4:7) Paulu kav er Aôndo yange wase un shighe u nyôr ken mlu u taver yô, nahan a nger ér: “M ngu a agee a eren akaa cii je ken Un u A taver mo ne.”—Mbafilipi 4:13.

20. Ka aeren a nyi nahan i doo u u dondo ken uma wou we, man ka sha ci u nyi?

 ²⁰ Aluer se soo u lun azende a Yehova yô, a gba u se de u eren akaa a Yehova a kaa ér ka a shami ga la, kpa ka cii la ga. (Mbaromanu 12:9) Azende a Aôndo ka a soo hanma kwagh u a doo un ishima yô. I ôr kwagh u mba ve lu azende a Aôndo la ken Pasalmi 15:1-5. (Ôr.) Mba ve lu azende a Yehova la mba dondon aeren a na a dedoo la, nahan ka ve tese ér mba a “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.”—Mbagalatia 5:22, 23.

21. U er nan ve u fatyô u tesen aeren a a doo Aôndo ishima la ken uma wou we?

²¹ U er nan ve u fatyô u tesen aeren a doon tsung la ken uma wou we? A gba u u fa akaa a a doo Yehova ishima la sha u ôron Bibilo shi timen ker hanma shighe cii. (Yesaia 30:20, 21) Aluer u ngu eren kwagh ne yô, Yehova una seer doon we ishima, nahan a sar u u ungwan imo na.

22. Aluer u ngu ungwan imo i Yehova yô, ka nyi ia due kere?

²² A fatyô u tôôn akaa a i gbe u u de u eren ken uma wou la karen sha u eren akondo a tse iyol kera, huan a he. Bibilo kaa ér gba u u “dugh tseor” kera, u “haa orhe iyol.” (Mbakolose 3:9, 10) Shin er alaghga a taver se u eren kwagh ne nahan kpa, Yehova tôndo zwa ér una na se “zegeinjar,” aluer se dugh aeren a Aôndo a soo ga la ken uma wase kera shi se mba ungwan imo na yô. (Pasalmi 19:11) Sha nahan yô, tsua u ungwan imo i Yehova, nahan tese wer Satan ka oraie. Civir Yehova, i de lu sha ci u u va zua a injar ken hemen ga, kpa i lu sha ci u a doo u ishima sha mimi. U er nahan yô, u hingir ijende i Aôndo i mimi!