1, 2. (a) Aluer u fa di iti i or u nan due iti tsô maa tese ér u fa nanaa? Ta iwanger. (b) Ka nyi ior ve ne jighjigh a mi sha kwagh u Yesu?

IOR mbaduenati mba ken tar ne kpishi. Alaghga u fa iti i orgen ken ve. Kpa u we fan iti i nan tseegh la tese ér u fa nan tsembelee ga. U fa nan vindi vindi ga, shin u fa injaor i nan lu la jighilii ga.

² Alaghga u vande ungwan kwagh u Yesu Kristu, shin er va shin tar hide yem anyom a kar hegen i kom er 2,000 nahan kpaa. Kpa ior kpishi fa injaor i Yesu lu ga. Mbagenev kaa ér lu or u dedoo, mbagen di kaa ér lu profeti, mbagen na jighjigh ér un ka Aôndo. We u hen wer ka nyi or a lu?—Nenge Ngeren u Seer Tan Iwanger u sha 12, peeji 211.

3. Er nan ve i gbe hange hange u u fa Yehova Aôndo kua Yesu Kristu?

³ Gba hange hange u u fa mimi sha kwagh u Yesu sha ci u nyi? Bibilo kaa ér: ‘Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.’ (Yohane 17:3) Aluer u fa mimi sha kwagh u Yehova man Yesu yô, u lu uma ken paradiso sha tar gbem sha won. (Yohane 14:6) Shi aluer u fa kwagh u Yesu yô, a wase u sha ci u a tese se gbenda u hemban doon u se eren akaa ken uma wase shi se eren kwagh a mbagenev yô. (Yohane 13:34, 35) Se vande henen akaa a mimi sha kwagh u Aôndo ken Ityough ki sha 1 kira. Hegen se hen kwagh u Bibilo i tese sha kwagh u Yesu yô.

4. Ishember i “Mesiya” man i “Kristu” la tese ér nyi?

⁴ Yehova yange er ityendezwa ken Bibilo ér una tindi Mesiya shin Kristu, anyom kar imôngo cii ve i va mase maren Yesu shin tar ye. Ititom i “Mesiya” la ka i ken zwa Heberu, i “Kristu” la di gema ka i ken zwa Grika. Atiatom ne cii tese ér lu u Aôndo una tsua Mesiya u ityendezwa la una ver un sha iantom i vesen. Mesiya la una na uityendezwa mba Aôndo cii vea kure sha mi vough. Shi hegen je kpa u fatyô u zuan a iwasen ken hanma kwagh u Yesu yange er shighe u lu shin tar la. Kpa cii man i va mar Yesu yô, ior kpishi lu pinen ér, ‘Ka an nana lu Mesiya shono?’

5. Mbahenen mba Yesu yange ve na jighjigh ér Yesu ka Mesiya?

⁵ Mbahenen mba Yesu yange ve lu a akperan a tan sha kwagh u or u nan lu Mesiya ga. (Yohane 1:41) Ikyav i tesen yô, Shimon Peteru yange kaa a Yesu ér: “We U ngu Kristu.” (Mateu 16:16) Se di ka nyi ia wase se u nan jighjigh ser Yesu ka Mesiya?

6. Yehova yange wase mba lun a ishima i mimi u fan Mesiya nena?

⁶ Cii man i va mar Yesu shin tar ne yô, uprofeti mba Aôndo nger akaa vighe vighe a aa wase ior u fan or u nan lu Mesiya yô. Lu u akaa la aa wase ior u fan or shon nena? U tesen ikyav yô, tôô wer gba u u za kua a or hen ijiir i hungwan mato. Aluer i tese u akav a wasen we u kaven or la yô, a kera taver we u fan nan ga. Kape Yehova kpa yange tindi uprofeti nav ér ve pase se akaa a Mesiya una va er shin tar, kua kwagh u una er Mesiya shon kpaa je la. Mkur u akaaôron a profeti la wase mba ve lu a ishima i mimi la u fan er i lu Yesu a lu Mesiya yô.

7. Ka akaaôron a uprofeti ahar a nyi a tese ér Yesu ka Mesiya?

⁷ De se time sha akaaôron a profeti shon ahar. Hiihii  yô, profeti Mika tsengaôron ér a mar Mesiya ken Betelehem, angar u kiriki. Yange ôr kwagh ne anyom kar 700 cii man i va mar Yesu ye. (Mika 5:2) Shi i va mar Yesu hen ijiir la vough er yange i tsengaôron nahan! (Mateu 2:1, 3-9) U sha uhar yô, Daniel tsengapasen ér Mesiya una va ken inyom i 29 la. (Daniel 9:25) Akaa a ahar a yange i tsengaôron ne nga ken akaaôron a uprofeti kpishi a a tese ér Yesu ka Mesiya u yange i tôndo zwa ér ngu van la yô.—Nenge Ngeren u Seer Tan Iwanger u sha 13 peeji 211

8, 9. Shighe u i lu eren Yesu batisema la, lu nyi i er u tesen ér ngu Mesiya?

⁸ Yehova yange tese wang ér Yesu ka Mesiya. Aôndo yange tôndo zwa a Yohane u eren Batisema ér una tese un ikyav i ia wase un u fan or u nan lu Mesiya yô. Shighe u Yesu za hen Yohane ér a er un Batisema shin Ifi i Yordan ken inyom i 29 la, Yohane nenge a ikyav shon. Bibilo ôr se kwagh u za hemen la ér: “Er i er Yesu batisema kera yô, A due shin mnger fese, maa i bugh Sha man A nenge a Jijingi u Aôndo lu senen er ikyungugh nahan, va tema sha a Na. Imo due Sha, kaa er: Ngun ka Wan Wam u ishima ishima, u i doom a Na yum yô.” (Mateu 3:16, 17) Yohane ongo imo la shi nengen a ikyav la yô, maa fa je ér ka Yesu a lu Mesiya ye. (Yohane 1:32-34) Lu sha iyange la Yehova haa jijingi na sha Yesu ye, maa Yesu hingir Mesiya. Lu un Aôndo tsua ér a lu Orhemen man Tor ye.—Yesaia 55:4.

 ⁹ Akaaôron a profeti a ken Bibilo man mkaanem ma Yehova kua ikyav i Yehova tese shighe u i lu eren Yesu batisema la, tese ér Yesu ka Mesiya. Kpa Yesu yange due hana, man lu nyi oro? De se nenge kwagh u Bibilo i er la.

10. Bibilo ôr kwagh u mlu u Yesu vande lun cii ve va shin tar la nena?

¹⁰ Bibilo tese ér Yesu yange lu sha vea Ter na shighe kar kpishi cii ve mase van shin tar ne ye. Mika kaa ér Mesiya yange lu sha ashighe a “tsuaa je.” (Mika 5:2) Yesu iyol na ôr kwa imôngo ér yange un vande lun sha cii man i va mar un shin tar ye. (Ôr Yohane 3:13; 6:38, 62; 17:4, 5.) Yesu yange ya ikyar a Yehova kôôsôô hii shighe u lu la je, cii mase van shin tar ye.

11. Er nan ve Yesu a doo Yehova ishima yumu?

¹¹ Yesu doo Yehova ishima tsung, sha ci u nyi? Sha ci u Aôndo yange vande gban un cii ve mase gban nyityôkwagh kua nyityô or cii ye. Sha nahan yô, i yila Yesu ér “ka Waniunda ken akaa a i gbe a cii.” * (Mbakolose 1:15) Yesu shi doo Yehova ishima sha ci u ka un tseegh Yehova a gbe sha uwegh nagh jighilii ye. Ka nahan i yer un ér ‘Wan u môm môm’ ye. (Yohane 3:16) Shi ka sha ikyev i Yesu kpa Yehova yange gba akaa agen cii ye. (Mbakolose 1:16) Shi ka Yesu tseegh i yer un ér “Imo” ye, sha ci u ka un Yehova ngu a tindi ér a ôr mbatyomov man uumace kwagh u vea er ye.—Yohane 1:14.

12. Hii nan ve se fe ser Yesu ka Aôndo ga?

¹² Ior mbagenev na jighjigh ér Yesu ka Aôndo. Kpa ka kwagh u Bibilo i tese la ga. Bibilo kaa ér yange i gba Yesu, u tesen je ér Yesu ngu a mhii. Kpa Yehova u a gbe akaa cii la yô, ngu a mhii ga. (Pasalmi 90:2) Er Yesu a lu Wan u Aôndo yô, mayange keren ér una lu er Aôndo nahan ga. Bibilo tese wang nahan ér, Ter hemba  Wan. (Ôr Yohane 14:28; 1 Mbakorinte 11:3.) Ka Yehova tseegh a lu “Uhembanagee” ye. (Genese 17:1) Ka un a lu or u hemban agee sha won cii ye.—Nenge Ngeren u Seer Tan Iwanger u sha 14, peeji 213

13. Er nan ve Bibilo i kaa ér Yesu ka “ibeen i Aôndo u i nengen a Na ga la”?

¹³ Yehova yange er tom vea Wan na Yesu anyom kar ubiliôn imôngo cii ve, mase gban sha man tar ye. Yange vea soo ayol a ve kpishi je ka u henen a hen ga! (Yohane 3:35; 14:31) Yesu yange dondo ikyav i ter na je yô, Bibilo yila un ér, “ibeen i Aôndo u i nengen a Na ga la.”—Mbakolose 1:15.

14. Yange er nan ve i va mar wan u Yehova u ishima ishima la shin tara?

¹⁴ Wan u Yehova u ishima ishima ne yange lumun u undun mlu na u sha la, ér i va mar un shin tar er orumace nahan. Kwagh ne yange er nena? Yehova er kwagh ne sha ivande. Yange tôô uma u Wan na wa ken iyav mbu iniunkwase igen shin tar. Iti i iniunkwase shon ér Maria. Sha nahan yô, lu u or môm shin tar ne nana lu ter u Yesu ga. Nahan wan u Maria mar la lu a isholibo i môm iyol ga, maa ii un iti ér Yesu.—Luka 1:30-35.

15. U er nan ve u hemba fan Yehova tsembelee?

¹⁵ U fatyô u fan akaa kpishi sha kwagh u Yesu man uma na kua aeren a na, aluer u ôr takerada u Mateu, Marku man Luka kua Yohane yô. Mba yilan ityakerada la ér Ivangeli. Er Yesu a bee Ter na vindi vindi yô, kwagh na u i nger ken Bibilo la una wase u u hemba fan Yehova tsembelee. Ka nahan ve yange ôr kwagh ne ye, ér: “U nan nenge a Mo yô, nan nenge a Ter je ve.”—Yohane 14:9.

16. Lu nyi Yesu tesene? Lu an nan tese Yesu akaa a yange tesen ior laa?

 ¹⁶ Ior kpishi yange ve yilan Yesu ér “Ortesen.” (Yohane 1:38; 13:13) Kwagh ugen ken akaa a hemban lun a inja a Yesu tesen ior yô, lu “Loho u Dedoo u tartor.” Tartor la ka u hana? Tartor la ka gomoti u Aôndo a ver un sha, i lu u una va hemen tar sha won cii shi una va mbaungwan imo i Aôndo a averen yô. (Mateu 4:23) Akaa a Yesu tesen la cii lu a Yehova tese un yô. Sha nahan yô, Yesu kaa ér: “Ityesen i M tesen, ka i Yam ga, kpa ka i Un u A tindim la.” (Yohane 7:16) Yesu yange fa je ér Yehova soo ér ior ve ungwa loho u dedoo u u kaa ér Tartor u Aôndo ngu va hemen tar cii la.

17. Yesu yange tesen ior hana? Ka nyi yange i na ve er tom u tesen ior la kpoghuloo?

¹⁷ Lu han Yesu tesen ioro? Yange tesen ior hanma ijiir i ve lu cii. Tesen ken agar a kiriki man a vesen man ken ukasua man ajiir a ior kohol sha u civir Aôndo yô, kua ken uya mba iorov. Yange keghen ér saa ior ve va ape un lu ga. Kpa a za ape ior ve lu la. (Marku 6:56; Luka 19:5, 6) Yesu yange na shighe kua agee a na cii sha u eren tom u tesen ior la kpoghuloo. Lu sha ci u nyi? Lu sha ci u fa ér Aôndo soo ér una er nahan. Shi yange eren hanma kwagh u Ter na a kaa ér a er cii. (Yohane 8:28, 29) Shi ka er yange kunya kôr un a ior ve pasen ve kwagh ye. (Ôr Mateu 9:35, 36.) Yange nenge mbahemenev mba kwaghaôndo lu tesen ior mimi sha kwagh u Aôndo man Tartor na ga. Nahan soo ér una wase ior kpishi er un fetyô la cii, ve ungwa loho u dedoo.

18. Ka aeren a Yesu a nyi a hembe doon we?

¹⁸ Yesu yange lu or u ior doo un ishima shi waan ior ikyo yô. Lu ishima legh legh shi keghen ato a  ior. Mbayev mba kiriki je kpa yange ve soo u lun vea na. (Marku 10:13-16) Yesu eren kwagh a ior sha mimi. Yange kôr anyighe man iferkwagh ihyom. (Mateu 21:12, 13) Sha shighe na la, i naan kasev ian i eren kwagh u ve soo ga, shi i nengen ér ve gba kwagh kpaa ga. Kpa Yesu yô, naan kasev icivir shi eren kwagh a ve sha icivir. (Yohane 4:9, 27) Yesu lu or u hiden a iyol ijime kpishi. Ikyav i tesen yô, aikighe ugen la Yesu ôô mbaapostoli nav angahar, kwagh u lu ikpan tseegh eren yô.—Yohane 13:2-5, 12-17.

19. Ka ikyav i nyi i tese ér Yesu yange a fa kwagh u a gbe ior ishima laa, man yange a soo u wasen ve nena?

¹⁹ Yesu yange a fa kwagh u a gbe ior ishima jim jim yô, shi a soo u wasen ve. Yange tese ieren ne wang shighe u lu eren tom a tahav mbu Aôndo na un ve lu been ior angev sha ivande la. (Mateu 14:14) Ikyav i tesen yô, orimande ugen yange va hen Yesu va kaa a na ér: “Wea lumun yô, U fatyô u wanger mo.” Er Yesu nenge mnyoon u or ne lu ker man ican i lu yan la yô, kunya kôr un a na kpishi. Yange mhôônom kôr un a or shon, nahan soo u wasen un. Nahan Yesu nalegh uwegh bende or la iyol, maa kaa a na ér: “M lumun, i̱ wanger we.” Maa imande i or la bee je! (Marku 1:40-42) Gbidye ase kwar nenge er yange a lu or la ken ishima la.

20, 21. Yesu hemba veren se ikyav i dedoo sha kwagh u ungwan imo i Aôndo nena?

²⁰ Yesu ka or u a hembe veren se ikyav i dedoo sha kwagh u ungwan imo i Aôndo yô. Yange a lu nyi je ia er shin mbaihyomov nav vea er nyi je kpa, a za hemen u eren kwagh a Ter na sha mimi her. U tesen ikyav yô,  shighe u Satan lu meen Yesu la kpa, Yesu er isholibo ga. (Mateu 4:1-11) Yange angôôv mba Yesu mbagenev na jighjigh ér ngu Mesiya ga, shi ve kaa ér, “a nyôr ihyundu,” kpa Yesu za hemen u eren Aôndo tom. (Marku 3:21) Shighe u mbaihyomov mba Yesu lu eren un atsan je kpa, Yesu za hemen u eren kwagh a Aôndo sha mimi her, mayange ker u bulan ve ga.—1 Peteru 2:21-23.

²¹ Shighe u i lu wuan Yesu ku u ipilagh, u nyoon tsung la je kpa, yange za hemen u eren kwagh a Yehova sha mimi her. (Ôr Mbafilipi 2:8.) Hen er yange una ya ican kpishi sha iyange i i wua un la yô. Yange i kôr un shi i wa un aie iyol ér a tuhwa Aôndo, shi mbaajiriv mba mimi ga kure un ijir ér a kuma ku. Heela tseegh ga, ikpelaior i toron asema se un, shi na un atsan shi za  mande un sha kon. Yange ka kuman u una sule yô, a ôr kwagh genger genger ér: “Bee ve.” (Yohane 19:30) Yesu kpe ayange nga karen atar yô, Yehova nder un shin ku, na un iyol i ken jijingi. (1 Peteru 3:18) Ukasua mba karen kpuaa yô, Yesu hide yem sha, za “tema sha uwegh ku yanegh ku Aôndo,” lu keghen ér Yehova a ver un Tor.—Mbaheberu 10:12, 13.

22. Kwagh u Yesu er a Ter na sha mimi la na yô, se mba a ian i nyi?

²² Kwagh u Yesu er a Ter na sha mimi la na yô, se mba a ian i va lun uma ken paradiso sha tar gbem sha won, vough er awashima u Yehova a tese nahan. Ken ityough ki dondon kin, se time se fa er ku u Yesu la u bugh se gbenda u va lun uma gbem sha won yô.