NGEREN U SEER
Gbenda u Kwaghôron u Profeti u Daniel Tsengaôron Mve u Mesiya La
PROFETI Daniel lu uma anyom kar hemba 500 cii ve i va mar Yesu ye. Yehova yange pase Daniel akaa a a wase u fan shighe u a shie Yesu mkurem, shin a tsegha un una lu Mesiya shin Kristu jighilii yô. Í kaa a Daniel ér: “Fa man kav kpaa, hii sha mdugh u tindi sha u sôron man u maan Yerusalem zan zan ar hen u i shigh Un mkurem, ka Tor je la, á lu ulahadi utaankaruhar; man ulahadi akunduatar kar uhar.”—Daniel 9:25.
Aluer se soo u fan shighe u Mesiya una va yô, gba u se hii fan mhii u shighe u una za zan zan ve Mesiya a va la. Kwaghôron u profeti la kaa ér shighe ne “hii sha mdugh u tindi sha u sôron man u maan Yerusalem” la. “Mdugh u tindi” ne lu hanma shighe? Nehemia u lu môm ken mbangeren Bibilo kaa ér, i wa tindi u sôron man u maan girgar u Yerusalem la “sha inyom i sha ikundu i tor Artashaseta la.” (Nehemia 2:1, 5-8) Mbatimen sha akaa a mbayiase pase ér inyom i 474 C.S.W. la lu shighe u Artashaseta iv inyom i môm sha ikyôn je la. Nahan lu ken inyom i 455 C.S.W. la iv anyom 20 sha ikyôn ye. Hegen, se fa shighe u kwaghôron u Profeti u Daniel ôr sha kwagh u Mesiya la hii yô, lu ken inyom i 455 C.S.W. la.
Daniel pase er ashighe la aa hii zan zan aa za kure sha shighe u un shon ‘u i shigh Un mkurem, a lu Tor la’ una va yô. Kwaghôron u profeti ne ôr kwagh u “ulahadi utaankaruhar; man ulahadi akunduatar kar uhar,” kohol cii ka ulahadi 69. Shighe ne una tsa a kuma nena nahana? Mba geman Bibilo kpishi pase ér ulahadi utaankaruhar mban ka ulahadi kpôô kpôô utaankaruhar ga, kpa ka ulahadi utaankaruhar mbaanyomov. Hanma lahadi yô, tile sha ityough ki anyom ataankarahar. Mbayuda mba ngise mbara fa kwagh u ulahadi mbaanyomov shin hanma inyom i sha utaankaruhar i̱ í tsegha i̱ ér ka inyom i iyange i memen la. U tesen ikyav yô, yange ve kuran inyom i í tsegh i̱ ér ka inyom i iyange i Memen la sha hanma inyom i sha utaankaruhar. (Ekesodu 23:10, 11) Nahan, ulahadi 69 mba kwaghôron u profeti a er la ka ulahadi 69, hanma lahadi yô ngu a anyom ker 7. Aluer ú kohol anyom 69 kwa 7 yô, ú zua a anyom 483.
Kwagh u se er jighilii yô, ka u se gba aseka sha kwagh ne se nenge. Aluer se hii u ôron anyom 483 la sha inyom i 455 C.S.W. la yô, se za zan zan se za kure ken inyom i 29 S.W. la. Ka inyom i í er Yesu batisema shi i tsegha un hingir Mesiya je la. * (Luka 3:1, 2, 21, 22) Imba er kwaghôron u profeti u i er ken Bibilo ne a kur sha gbenda u vesen ne nahan, ka kwagh u taver se ishima ga he?
^ par. 6 Hii inyom i sha 455 zan zan inyom i sha 1 C.S.W. la ka anyom 454. Hii sha inyom 1 C.S.W. zan zan za kure sha inyom 1 S.W. la ka inyom i môm. Shi hii sha inyom 1 S.W. zan zan za kure sha inyom i sha 29 S.W. la ka anyom 28. Aluer ú kohol anyom 454 man inyom 1 kua anyom 28 la cii yô, ú zua a anyom 483. Yange í wua Yesu ken inyom i sha 33 S.W la, ka ken atô u lahadi u anyom u sha 70 je la. (Daniel 9:24, 26) Nenge ken takerada u i yer ér Pay Attention to Daniel’s Prophecy! la ityough 11, man takerada u Insight on the Scriptures Tihi u sha 2 la, peeji 899–901. Ka Mbashiada mba Yehova ve gber ityakerada ne ye.
