NGEREN U SEER
Ka An Nan Lu Mikael, Ortyom u Tamen?
I FA teren iti i ortyom Mikael ken Bibilo ga. Nahan kpa, ashighe a Bibilo i ter un la cii, i kaa ér ngu eren kwagh. Ken takerada u Daniel la, Mikael ngu nôngon num a mbatyomov mbaaferev; ken washika u Yuda di, ngu hendan kwagh a Satan, gema ken Mpase yô, Mikael ngu nôngon ityav a Diabolo man azôv a na. Iti na i Mikael la kôr un sha ci tom u a lu eren mtemtor u Yehova, shi a lu nôngon ityav a mbaihyomov mba Aôndo la. Inja i iti shon ér, “Ka An Nan Lu Er Aôndo?” Kpa ka an nan lu Mikael?
Ashighe agen ior ka ve lu a ati imôngo. Ikyav i tesen yô, tertamen Yakobu lu a iti igen ér Iserael. Shi i fa apostoli Peteru sha iti igen ér Shimon. (Genese 49:1, 2; Mateu 10:2) Mikael kpaa Bibilo tese ér ka iti i Yesu Kristu igen. Yange lu a iti ne sha cii mase van shin tar ne ye, shi a hide a yem sha kpa ngu lumun i her. De se nenge atôakaa a ken Ruamabera a a ne ve se fe ser Mikael ka iti i Yesu yô.
Ortyom u Tamen. Mkaanem ma Aôndo ôr kwagh u Mikael kaa ér un ka “ortyom u Sha u tamen.” (Yuda 9) Aluer u ver ishima yô, i yila Mikael ér ortyom u sha u tamen la. Kwagh ne tese ér ortyom u lun er un nahan ngu ga. Sha kpôô yô, ijiir i môm tsô Bibilo ôr kwagh u “mbatyomov mba shaav mba tamen” ga, kpa i ôr kwagh u “ortyom u Sha u tamen” môm tseegh. Bee heela kera yô, i zua Yesu sha ian tom i ortyom u tamen la. 1 Mbatesalonika 4:16 ôr kwagh u Ter Yesu Kristu u i nder un shin ku la ér: “Ter iyol Na Una sen Sha sha ikenge i kaan, sha imo i ortyom u tamen.” Ivur ne kaa ér ikyenge i kaan i Yesu ka i ortyom u tamen. Sha nahan yô, ivur ruamabera ne ngi tesen ér ka Yesu iyolna jim je a lu Mikael, ortyom u tamen la ye.
Kurutya. Bibilo kaa ér ‘Mikael kua mbatyomov nav lu nôngon a darakon. Darakon a mbatyomov nav kpaa lu nôngon.’ (Mpase 12:7) Nahan Mikael ka kurutya u akumautya a mbatyomov mba jighjigh. Shi i ôr kwagh u Yesu ken takerada u Mpase ér ngu Kurutya u akumautya a mbatyomov mba jighjigh. (Mpase 19:14-16) Shi apostoli Paulu tér “Ter Yesu” sha iti jighilii ér, ngu a “mbatyomov Nav mba ageev.” (2 Mbatesalonika 1:7; Mateu 16:27; 24:31; 1 Peteru 3:22) Nahan Bibilo ôr kwagh u Mikael man “mbatyomov nav” shi i ôr kwagh u Yesu man “mbatyomov nav” kpaa. (Mateu 13:41) Tsô er Mkaanem ma Aôndo ma tese mape môm ér akumautya a mbatyomov mba jighjigh nga ahar, Mikael ngu hemen ikyum igen shi igen di Yesu ngu hemen ga yô, doo u kuren ikyaa ér Mikael ka orgen kposo ga kpa ka Yesu Kristu ken mlu na u sha la. *
^ par. 6 U zua a mkaanem ma seer tesen ér iti i Mikael la ka iti i Wan u Aôndo ken takerada u Insight on the Scriptures, Tihi u sha uhar, peeji 393–394 la. Ka Mbashiada mba Yehova ve gber ye.
