TAKERADA u Mpase ngu a asemberakaa a i doo u a gba ôron a laa laa ga yô. (Mpase 1:1) Ikyav i tesen yô, u tér kwase ugen u i nger iti i “Zegebabilon” sha icul na yô. U kaa ér kwase ne tema sha “akumaior man akuraior.” (Mpase 17:1, 5, 15) Tsô, er kwase u se fe nana fatyô u eren kwagh nahan ga yô, Zegebabilon ne a lu kwagh u a til sha ityough ki kwagh ugen keng. Tsô, idyakwase u sha ikyav ne tile sha ityough ki nyi?

Se ôr kwagh u kwase shon u sha ikyev ne ken Mpase 17:18 ér  “ka zegegar u a lu a tahav sha utor mba shin tar yô.” Ishember i “gar” ne tese ér ior kohol mba ijiir i môm mba eren kwagh. Er “zegegar” ne a lu a tahav sha “utor mba shin tar yô,” a shi nan kpa kwase u i yer iti na ér Zegebabilon ne a lu mzough u tahav nav mbu yisi tar cii yô. Nahan a fatyô u yilan un ér zegetartor u a tser tar cii yô. Kanyi imba zegetartor laa? Tartor ne ka u kwaghaôndo. Ka ngeren mbagen mba ken takerada u Mpase ne ve ne ve se kur ikyaa nahan ye.

Tartor ua fatyô u lun u patii shin u kasua shin u ukwaghaôndo. Kwase u i yer iti na ér Zegebabilon ne a fatyô u lun tartor u mbapativ ga, sha ci u Mkaanem ma Aôndo kaa ér “utor mba shin tar” ne shin mbapativ mba tar ne “ve er idya” a na. A er idya, sha ci u a kôr ikyar vea utor mba tar ne. Man kape i hii ve i yer un ér “zegeidyakwase” kpaa je la.—Mpase 17:1, 2; Yakobu 4:4.

Zegebabilon ne a fatyô u lun zegetartor u mbakasuav ga, sha ci u “mbaeren kasua” mba shin tar mba ve til sha ityough ki mbakpengav la, vea vaa a gbidye iyol inya sha shighe u a tim un la. Sha kpôô yô, utor mba shin tar ne man mbakasuav cii i ôr kwagh ve ér ve tile “ken ica” mba kenger Zegebabilon. (Mpase 18:3, 9, 10, 15-17) Nahan, ka a inja u kaan ér Zegebabilon ne ka tartor u ior mbapativ ga shi ka u mbakasuav kpaa ga, kpa ka u ukwaghaôndo.

Kwagh u i kaa ér Zegebabilon ka tartor u mba eren kwaghaôndo la zua sha kwagh u Bibilo i kaa ér ngu tsumen a akuraior cii sha “ahir” a na a eren la. (Mpase 18:23) Man ahir cii due hen azôv, ka nahan ve Bibilo i yer Zegebabilon ér ka “ijiir i ujijingi mba bov tsan her” ye. (Mpase 18:2; Duteronomi 18:10-12) Shi i pase kwagh u tartor u Zegebabilon la ér ngu ihyom a kwaghaôndo u mimi, shi ngu tôvon “uprofeti kua uicighanmbaiorov” a ican. (Mpase 18:24) Sha mimi yô, kwagh u kwaghaôndo u mimi vihi Zegebabilon ishima je gande yô, ngu tôvon “mbashiada mba Yesu” a ican sha kume je shi wuan ve kpaa. (Mpase 17:6) Sha nahan yô, kwase u i yer ér Zegebabilon ne tile sha ityough ki zegetartor u kwaghaôndo u aiegh u sha tar cii, u a kou ukwaghaôndo mba ve lu hendan a Yehova Aôndo ker cii la.