1, 2. Ka han se zua a ijiir i yeren nyiana?

TÔÔ wer, u ngu zan mape angahar, man ura ngu gban. Er u lu yemen la kwavaôndo ngu hemban ilen a ile. Maa inyiar hii, duran ngi duran gbiagher gbiagher, maa ura cir. U kar ayem tsôugh tsôugh, u ngu keren ijiir i u yer yô. U gem yô, u nenge a ate hen kpe gbenda. I tim un taver doo kpen kpen, shi ngu ker tseghe tseghe kpaa. U nenge a ijiir i yeren ura ne nahan doo u je zua ga!

² Se mba ken ashighe a ican hegen. Tar ngu vihin seer a seer. Nahan kpa se mba a ijiir i yeren, ape se yer ve kwaghbo môm tsô una fatyô u bulan se gbem sha won ga yô. Ka hanma ijiir laa? Nenge ase kwagh u Bibilo i tese se ne, i kaa ér: “Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne.”—Pasalmi 91:2.

3. Se er nan ve Yehova una hingir ijiir yase i yerene?

³ Nenge ase yô, Yehova, un a gbe akaa cii shi á lu Tor u Hemban sha won cii la, una fatyô u lun ijiir i se yer ve se zua a mkor yô. Una kura se, gadia ngu a tahav hemba hanma or shin hanma kwagh u una fatyô u bulan se yem zende zende je. Aluer or bula se je kpa, Yehova una fatyô u hiden sôron  kwagh u í er se la. Se er nan ve Yehova una lu ijiir yase i yerene? Gba u se suur sha a na. Heela tseegh ga, Mkaanem ma Aôndo wa se kwagh ér: ‘Se luun ken dooshima u Aôndo.’ (Yuda 21) Sha mimi yô, gba u se lu ken dooshima u Aôndo, se za hemen u soon Ter wase u sha la tsung je. Ka sha nahan man se lu a vangertiôr ser una hingir ijiir yase i yeren ye. Kpa se er nan ve se soo un tsung-nuu?

4, 5. Ka sha igbenda i nyi nahan Yehova á tese wener se doo un ishima?

⁴ Gba u se kav dooshima u Yehova a vese, ka nahan man Aôndo una za hemen u doon se ishima ye. Hide hen ase sha akaa agenegh a Bibilo i tese aa u hila hen ken takerada ne la. Er i lu Yehova a gbe se yô, á na se tar ne, ngu ya wase u doonashe. Á er u ngu a akaayan kpishi man mngerem man akaa a sha gbaaôndo agenegh kpaa, man inyamtoho i doonashe man uharegh mba doon kenger kpaa. Aôndo pase se iti na man aeren a na ken Bibilo, gadia ka un a lu Orngeren Bibilo ye. Heela tseegh ga, Mkaanem nam shi ma pase se ér yange tindi Yesu, Wan na u ishima ishima la shin tar ne sha u a va ya ican a kpe sha ci wase. (Yohane 3:16) Nahan mne u á na wan na sha ci wase ne ngu a inja hen a vese nena? Iyua ne i na yô se mba a ishimaverenkeghen ser mlu wase u ken hemen la una doo kpen kpen.

⁵ Ishimaverenkeghen yase ne shi i har sha kwagh ugen u Aôndo á er sha ci wase la kpaa. Yehova ver gomoti ugen sha, ka Tartor u Mesiya je la. Ica a gba ga tsô ua kar a ican i yan kera shi ua gema tar ne cii ua hingir paradiso. Gbidye ase kwar sha kwagh ne tsô u kav inja na! Inja na yô se va tema ken tar la bem bem shi á saan se iyol gbem sha won kpaa. (Pasalmi 37:29) Kpa, cii man shighe la yô, Aôndo gema tese se er se er uma sha gbenda u u hembe doon sha won hegen cii yô. Shi á na se ian i eren msen hen a na, man ka gbenda u se fatyô u lamen a na sha ishima yase je ne. Igbenda ne cii ka a ka di igbenda kpuaa tsô i Yehova á tese wener uumace jimin cii doo un ishima, kua we kpa sha mi yô.

6. Akaa a Yehova a er a we sha dooshima la aa mgbegha u u er nyi?

⁶ Nahan doo u u hen sha mpin u hange hange u a lu heen ne:  Me er sha dooshima u Yehova hen a mo ne nena? Ior kpishi vea na ikyar sha mpin ne ér, “Mo kpa, doo u me tese mer Yehova doom ishima.” Kape we kpa í lu u ken ishima laa? Yesu yange ôr wener tindi u a lu shin heen ne ka u hemban cii, tindi shon yô ka un ne: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37) Sha kpôô yô, atôakaa nga kpishi aa i gbe u Yehova Aôndo una doo u ishima yô. Kpa aluer ka u ken ishima er u ngu a imba dooshima la hen Yehova yô, maa kuma u u kaa wer, á doo u ishima a ishima you cii man a uma wou cii man a mfe wou cii he?

7. Aluer u ngu henen ken ishima you wer Aôndo doo u ishima yô, maa u fatyô u kaan je wer á doo u ishima mimini? Na mpase.

⁷ Er i pase ken Bibilo nahan, ka u a gba lun se ken ishima inja er Aôndo doo se ishima nahan tseegh maa kwagh a bee je ga. Sha kpôô yô, aluer or ngu henen ken ishima ér Yehova doo nan ishima yô, ka kwagh u dedoo, kpa mhen ne ka a ka di mhii u Yehova doon nan ishima sha mimi tsô. Kon u umen atam ngu u lu a ikye; ka ikye ne ka i vese hen inya i hingir u ye. Kpa, aluer u soo u yan ityamegh ki kon ne, nahan u sôn or wer nana̱ na u, maa nan gema ikye i u nan na u nahan, á doo u kpa? Mayange ga! Kape mhen u or henen ken ishima i nan ér Yehova Aôndo doo nan ishima la kpa í lu vough je la; mhen ne ka a ka di mhii u dooshima ne tsô. Bibilo tese ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yohane 5:3) Saa dooshima wase una ume atam a dedoo ve una lu u mimi ye. Gba u aeren a ase aa tese ér se mba a dooshima ne.—Mateu 7:16-20.

8, 9. Se tese ser Aôndo doo se ishima shi se wuese akaa a a er a vese la nena?

⁸ Ka se tese ser Aôndo doo se ishima sha u eren sha atindi a na man akaawan a na kpaa. Kwagh ne taver gande u or nana er ga. Mayange je atindi a Yehova yuhwa ga, kpa í wa á sha u a wase se se ember uma, shi a na se msaanyol man mkom kpaa. (Yesaia 48: 17, 18) Aluer se mba eren tom sha akaawan a Yehova yô, Ter wase u sha ne una fa je ér se wuese akaa a un er sha ci wase la cii a ishima yase i môm. Kpa kwagh er vihi yô, ka ior kpuaa shin tar nyian tseegh ve wuese un nahan ye. Se soo ser se lu ior mba banen a iwuese er mbagenev mba ve lu sha ayange a Yesu lu shin tar la nahan ga. Yesu yange war mbaamandev mbagenev pue, kpa lu môm tseegh hide va sugh un ye. (Luka 17:12-17) Sha mimi yô, ka se pe lun er u yange hide va sugh un la nahan, se soo u lun er mba utaankarunyiin mba ve yem kwagh ve la ga!

⁹ Nahan yô, ka atindi a Yehova a nyi nahan i gbe u se kuranaa? Se vande ôron kwagh u atindi shon agen ken takerada ne, kpa de shi se nenge nen sha agenegh kpuaa. Aluer se mba kuran atindi a Aôndo yô, kwagh ne una wase se, nahan Aôndo una za hemen u doon se ishima.

10. Pase er i hii ve i gbe hange hange u se za hemen u henen kwagh u Yehova Aôndo sha er se fa un yô.

¹⁰ Kwagh u vesen u una wase se ve se kporom ikyua a Yehova yô ka u henen kwagh na. Doo u se zer henen kwagh  na kpii, se de mayange ga. Aluer u tema ken won tugh man wuhe gema kôr kpishi, u wa usu u ngu ôson nahan, u de wer usu la u gba kur kur u piri? Ei, u er nahan ga. Ú zer kenden u gbem wer u̱ de pirin ga. Aluer u de kenden u yô, alaghga wuhe ua kôr u je u gba kundu! Er or ka nana kenden usu ve u pir ga nahan, kape “mfe u fan Aôndo” la kpa ngu a na yô se za hemen u soon Yehova tsung je la.—Anzaakaa 2:1-5.

11. Ityesen i Yesu bende a mbadondon nav nena?

¹¹ Yesu yange soo wener Yehova a doo mbadondon nav ishima heregh shi Mkaanem nam ma injaa ma ma lu a mimi la kpa ma doo ve ishima nahan, shi dooshima ne a de ndôhôr mayange ga. Yange mba nderen Yesu shin ku kera yô, á ôr mbahenen nav mbagenev uhar akaaôron a profeti agenegh a ken Ruamabera u ken Zwa Heberu a a kure sha a na la. Kwaghôron na ne bende a ve nena? Mbahenen mban kaa ken masejime ér: “Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?”—Luka 24:32.

12, 13. (a) Aôndo man Bibilo kera doo ior kpishi ishima nyian ga nena? (b) Se er nyi ve dooshima wase una ndôhôr ga?

¹² Shighe u í hii ôron we kwagh u Bibilo i tese jim jim la nahan, u ember kpishi, gbashima wou sha kwagh u Aôndo lu yeghen a yegh shi Aôndo doo u ishima tsung ga he? A̱ shi nan kpa, kape lu u vough je la. Ior mbagenev kpishi kpa kape lu ve je la. Kpa kwagh ne gema na se tom. Inja na yô gba u se za hemen u lun a dooshima shon ne her shi a seer vesen kpaa. Se soo u eren kwagh er tar u ainge ne nahan ga. Yesu tsengaôron wener: “Dooshima u mbagenev kpishi una ndôhôr.” (Mateu 24:12) Ú er nan ve mdoo u Yehova a doo u ishima, kua mimi u ken Bibilo kpaa la una ndôhôr ga?

¹³ Za hemen u fan Yehova Aôndo man Yesu Kristu kpaa. (Yohane 17:3) Zum u u hen kwagh ken Mkaanem ma Aôndo yô, hide gbidye kwar sha kwagh u u hen la, pine iyol you wer: ‘Kwagh ne tesem nyi sha kwagh u Yehova Aôndo? Ka ityôkyaa igenegh i Yehova una doom ishima a ishima yam cii man a agee am cii man a uma wam cii í nyi m zough a mi ken kwagh u m hen nee?’ (1 Timoteu 4:15) Aluer u ngu gbidyen kwar sha kwagh u u hen nahan yô, Yehova una za hemen u doon we ishima tsung je.

14. Msen una wase se, nahan Yehova una za hemen u doon se ishima tsung nena?

 ¹⁴ Kwagh ugen u una wase u ve Yehova una za hemen u doon we ishima tsung yô ka msen u eren nduuruu. (1 Mbatesalonika 5:17) Se vande henen ken Ityough 17 ki takerada ne ser msen u eren ka iyua i dedoo i Aôndo a ne se yô. Ka sea eren msen hen Yehova nduuruu yô, ikyaryan yase a na i hemba taver a taver cii, di vough er ior ka vea kôr ijende ayol a ve, vea lamen ayol a ve hanma shighe ve ikyaryan ve la i hemba taver nahan. Mayange je se de nen ser mbamsen asev ve hingir se icam ga—inja na yô ka u se gbaa kimbir di kwagh môm môm shighe u se lu eren msen, aa u henen sha kwagh u se lu ôron la shio ga. Gba u se lam a Yehova er wanye ka nan lam a ter u nan u a doo nan ishima nahan. Se lam a na sha icivir, shi se lam gbar gbar man sha mimi kpaa, se ôr un er ishima i lu se ker yô. (Pasalmi 62:8) Sha kpôô yô, u henen kwagh sha tseeneke wase shi eren msen tsung la ka igbenda i vesen i civir Aôndo man ngi i wase se, nahan Aôndo a za hemen u doon se ishima.

15, 16. Er nan ve se fatyô u nengen tom u pasen ior kwagh u Tartor la ser ka tom u civirigh shi ka kwagh u injaa kpaa?

¹⁵ Bibilo i henen sha tseeneke wase man msen u eren ka akaa a se fatyô u eren ken iuv sha u civir Aôndo yô. Nahan kpa, se nenge nen kwagh ugen hegen u se fatyô u eren ken igbar sha u civir Aôndo yô, kwagh shon yô, ka u ôron mbagenev kwagh u jighjigh wase u nan la. U hii u ôron mbagenev akaa a mimi a Bibilo i tese la vee? Aluer u hii u eren nahan kera yô, u ngu eren kwagh u civirigh je zua ga. (Luka 1:74) Shighe u ka sea pase ior mbagenev akaa a mimi a se hen sha kwagh u Yehova Aôndo yô, ka se lu eren tom u hange hange u i ne Mbakristu mba mimi jimin cii la—ka tom u pasen ior loho u dedoo u Tartor u Aôndo je la.—Mateu 24:14; 28:19, 20.

¹⁶ Apostoli Paulu ngise nenge tom na u pasen ior kwaghaôndo la wener ka kwagh u dedoo kpishi, nahan á yila u ér ka kwagh u injaa. (2 Mbakorinte 4:7) Ka tom u ôron ior kwagh u Yehova Aôndo man mbaawashima nav la u hembe doon sha won cii u u er ye. Un u a ne se tom ne la ka un a lu Ter u hemban doon cii ye, shi injar i se zua a mi sha tom ne kpaa ka i hemban doon cii. Aluer  u ngu eren u yô, u wase mbaasemaamimi vea kporom ikyua a Ter wase u sha la shi vea zende sha gbenda u zan a or ken uma u tsôron la kpaa! Kanyi tom igen je ia na u mkom á kuma sha ungun ne sha wono? Shi kwagh ugen yô, aluer u ngu pasen ior kwagh u Yehova man Mkaanem nam yô, jighjigh wou man dooshima wou  hen a na una hemba taver a taver cii. Shi iniôngon you la i doo Yehova ishima je zua ga. (Mbaheberu 6:10) Aluer u ngu eren tom ne kpoghuloo, u gba uwegh ga yô, ua wase u nahan dooshima wou hen Aôndo una bee mayange ga.—1 Mbakorinte 15:58.

17. Er nan ve tom u Mbakristu u pasen kwagh la u lu tom u a er u torough torougho?

¹⁷ Doo u se umbur ser tom u pasen ior kwagh u Tartor ne ka tom u i gbe u a er u torough torough yô. Bibilo kaa ér: ‘Se yôô kwaghôron, se wa iyol sha mi se keghen a kegh.’ (2 Timoteu 4:2) Er nan ve i gbe u a er tom ne torough torough nyiana? Mkaanem ma Aôndo kaa a vese ér: “Iyange i vesen i TER mgbôghom, ngi van fefa je.” (Sefania 1:14) Sha mimi yô, shighe u Yehova una va tim tar ungun jimin cii la ngu van fefa je. Nahan gba u se ta ior icin! Gba u se ôr ve vea fa ér hegen ka shighe u vea ta ikyar a Yehova ér ka un a lu Tor ve u Hembancii ye. Mkur u tar ne “una bunde ga.”—Habaku 2:3.

18. Er nan ve i doo u se civir Yehova imôngo a Mbakristu mba mimi ken igbar?

¹⁸ Yehova soo wener se civir un imôngo a Mbakristu mba mimi ken igbar. Nahan yô, Mkaanem nam kaa ér: ‘Se wa ayol a ase iko, se taver ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.’ (Mbaheberu 10:24, 25) Ka sea kohol imôngo a Mbakristu mba nan jighjigh a vese imôngo ken mbamkombo mba tiônnongo yô, ka se zua a ian i vesen i wuese Aôndo wase u doonshima la shi civir un kpaa. Shi ka se wase ayol a ase shi se taver asema ayol a ase kpaa.

19. Kanyi se er ve dooshima una hemba taver a taver ken tiônnongo u Kristu?

¹⁹ Ka sea kohol imôngo a mbacivir Yehova mbagenev yô, kwagh ne ngu a wase u maan dooshima man ikyaryan ken tiônnongo. Doo u se nengen a aeren a dedoo a mbagenev ve lu a mi la, er Yehova kpa a nengen aeren a ase a dedoo la nahan. De sendegh wer mbananjighjigh a we imôngo ve eren kwagh vough a mshi shio ga. Umbur wer se cica cii agee a ase a ken jijingi nga kposo kposo, shi or môm ken a vese u nan eren isholibo ga kpa nan ngu ga. (Mbakolose 3:13) Nôngo ya ikyar a mba Yehova a doo ve ishima  kpoghuloo la, nahan kwagh ne una wase u u vese ken jijingi. Sha kpôô yô, aluer u ngu civir Yehova a anmgbianev ou mba nomso man mba kasev mba ken jijingi la yô, Aôndo una za hemen u doon we ishima. Yehova ne mba ve civir un sha jighjigh, mba mcivir ve ne á wase ve ve lu ken dooshima na her la injar nena?

20, 21. Kanyi i lu “uma u a lu uma jim” laa, man er nan ve ishimaverenkeghen i va zuan a imba uma la i lu kwagh u doon kpishi?

²⁰ Yehova ne mbatomov nav mba jighjigh mbara injar i uma, kpa kanyi uma ngu a na ve? Sha mimi yô, u fatyô u kaan wer u ngu uma hegenee? Se mbagenev kpishi aluer í pine se mpin ne yô, se kaa ser se mba uma. Gadia se mba ôôn, se mba ye kwagh shi se mba me kwagh kpaa. Nahan, se mba uma je. Shighe u i saan se iyol kpishi je yô, alaghga se kaa ser, “Ka uma jim jim je ne!” Nahan kpa, Bibilo pase ér, sha mimi yô, orumace môm nyian nan ngu uma sha gbenda u a kaa ér uma u nan la ka uma jim jim je la ga.

²¹ Mkaanem ma Aôndo wa se kwagh ér, “kôr ave sha uma u a lu uma jim la.” (1 Timoteu 6:19) Mkaanem man tese ér “uma u a lu uma jim la” ka uma u ken hemen u se lu a ishimaverenkeghen ser se va zua a mi yô. Sha kpôô yô, zum u se va lu vough, se lu a mshi ga la, se lu uma sha gbenda u a fatyô u kaan ér se mba uma jim jim yô, gadia se lu er Aôndo yange wa ishima ér se lu sha hiihii la nahan. Shighe u se va lu uma ken paradiso shin tar, ma angev tsô mbua nyoon se ga, se lu bem bem shi a saan se iyol la, a lu hen shighe la se mase zuan a “uma u a lu uma jim la” ye—ka uma u tsôron je la. (1 Timoteu 6:12) Imba ishimaverenkeghen ngin nahan i doo ga he?

22. Ú er nan ve u “kôr ave sha uma u a lu uma jim” laa?

²² Se er nan ve se “kôr ave sha uma u a lu uma jim” laa? Paulu wa Mbakristu kwagh zum u lu ôron kwagh u uma u a lu uma jim la, wener ve “eren akaa a dedoo” shi ve “lu mbanyarev sha aeren a dedoo” kpaa. (1 Timoteu 6:18) Nahan yô, kwagh ne cii kohol har sha gbenda u se eren sha atesen a mimi a se hen ken Bibilo la. Kpa, Paulu ngu kaan heen wener ka aeren a dedoo a se eren la aa na ve se zua a “uma u a lu uma jim” la yee? Ei, ngu ôron nahan ga, gadia sha mimi yô, ishimaverenkeghen i doon tsung ne i har sha “mrumun u sha mhôôn” u Aôndo sha a vese la. (Mbaromanu 5:15)  Nahan kpa, ka i doo Yehova kpishi u nan mba ve civir un sha jighjigh la injar. A soo ér u̱ zua a “uma u a lu uma jim” la. Mba Aôndo a doo ve ishima her la cii vea va zua a uma u tsôron, a saan ve iyol shi vea lu bem bem kpaa.

23. Er nan ve i gbe kpee u Aôndo una za hemen u doon se ishima?

²³ Hanma or nana̱ pine ase iyol i nan ér, ‘M ngu civir Aôndo sha gbenda u á tese ken Bibilo ér se civir un la kpa?’ Aluer se mba karen ayol a ase ayange ayange nengen ser, se mba civir un er á tese nahan la yô, kwagh ne tese ér se mba zan sha gbenda u vough. Nahan se lu a vangertiôr je ser, Yehova ngu ijiir yase i yeren. Una za hemen u kuran ior nav mba jighjigh mbara ken ayange a bo a masejime a tar u tse ungun ne. Yehova shi una yima se á nyôr a vese ken tar u he u engem u u mgbôghom hegen ne. A saan se iyol sha shighe la je a gande! A doo se kpishi er yange se tsua kwagh u vough ken ayange a masetyô ne nahan! Aluer u tsua kwagh u vough hegen yô, u va zua a “uma u a lu uma jim” la, inja na yô u lu uma gbem sha won er Yehova yange wa ishima ér i lu nahan!