Yehova gba Adam man Ifa ér ve lu uma gbem sha won ken Paradiso. Satan vihi Aôndo iti, shi gba ahon sha ian i Aôndo a lu a mi i hemen la. Adam man Ifa kohol Satan, hemba Aôndo ato, nahan isholibo man ku va sha a ve man sha ônov vev kpaa

Yehova tsaha mbahembanato mbara, shi tôndo zwa ér una ver Oryiman shin Vor u ua tim Satan, shi ua bee a mbamzeyol mba ihyembeato man isholibo i ve la mi la

Yehova tôndo zwa a Aberaham man Davidi ér vea lu uter mbatsev mba Vor la, shin Mesiya u una tema Tor gbem sha won la

Jijingi u Yehova mgbegha uprofeti ve tsenga ôron ér Mesiya una war ior sha ikyev i isholibo man ku. Una tema Tor u Tartor u Aôndo vea ior mbagenev mba vea hemen a na imôngo yô, man Tartor la ua bee a ityav mbi nôngon kua angev shi ku je kpa ua tim u kera

Yehova tindi Wan na shin tar, shi kaa ér Yesu ka Mesiya. Yesu pase ior kwagh u Tartor u Aôndo shi na nagh sha uma na. Yehova nder un shin ku, a hingir or u ken jijingi

Yehova ver Wan na Tor sha, nahan kwagh ne tese mhii u ayange a masejime a msertar u uumace. Yesu ngu hemen mbahenen nav mba shin tar ne ken tom ve, ú ve lu pasen ior kwagh u Tartor u Aôndo sha tar jimin cii la

Yehova kaa a Wan na ér a̱ va a Tartor na shin tar. Tartor la tim ugomoti mba aferev cica cii, ú ver Paradiso shi ú wase uumace mba jighjigh u hingir ior mba vough. Nahan or môm kera gba ahon sha ian i Yehova a lu a mi i hemen la ga, shi í tsegha iti i Yehova gbem sha won