SOLOMON yange de u civir Yehova sha mimi, shighe kar yô, Iserael pav ker avegher ahar vough er Yehova tsenga ôron nahan. Wan na Rehobiam, u yange kar tema tor sha ityough na la vihi kwagh kpen kpen. Nahan ikwe pue i Iserael hemba un ato, yem za ver tartor u Iserael u ken imbusutarimese. Kpa ikwe ihiar za hemen u dondon utor mba ken tsombor u Davidi mba ken Yerusalem la, nahan tartor ve lu u ken imbusutariyan.

Ityartor i ihiar ne cii tagher a mbamzeyol sha ashighe kposo kposo, man ityôkyaa i vesen i kwagh lu nahan yô, lu sha ci u ator agen a yange hemen ityartor ne la ban a jighjigh u nan shi hemba ato kpaa. Tartor u Iserael u ken imbusutarimese la je yô, u hemba vihin a tartor u Yuda, sha ci u ator a tartor ne yange samber a mcivir u aiegh sha mhii je. Shin er profeti Eliya man Elisha er ityom i ageegh, je ve nder mbakpenev nahan kpa, Iserael za hemen a aeren a na a bo la her tsô. Ken masejime yô, Aôndo na ian Mbaashiria va tim tartor u ken imbusutarimese la.

Tartor u Yuda yange u hemba tsan a tartor u Iserael u ken imbusutarimese la sha anyom 100 man kwagh karen kpuaa, nahan kpa, ú kpa Aôndo tsaha ú. Lu ator a Yuda kpuaa tseegh ungwa kwaghwan u uprofeti mba Aôndo shi kôôm ikyurior ve, hide a ve hen Yehova ye. U tesen ikyav yô, Tor Yoshia yange bee a mcivir u aiegh ken Yuda kera, shi hide sôr tempel u Yehova. Zum u i zua a kôpi u Tindi u Aôndo na Mbaiserael sha ikyev i Mose la yô, kwagh ne doo Yoshia tsung, nahan a seer dughun mcivir u aiegh ken tar la kera.

Kpa kwagh yange er vihi yô, ator agen a a va ken ijime i Yoshia la cii, dondo ikyav na i dedoo la ga. Nahan Yehova na Mbababilon ian ve va ngohol tar u Yuda, ve tim Yerusalem man tempel u lu ker la. Ve kôr mba ve war la cii ve yem a ve uikyangen ken Babilon. Aôndo tsenga ôron ér vea lu uikyangen ken Babilon anyom 70. Tar u Yuda cii hingir ice hen shighe la, kpa shighe u Aôndo tôndo zwa ér vea hide ken tar ve la kom yô, ve hide.

Nahan kpa, kera lu u utor mba ken tsombor u Davidi vea hemen ga zan zan shighe u Oryiman, ka Mesiya u i tsenga ôron kwagh na la una kar van. Ator a yange tema sha ikyônough ki torough ki Davidi ken Yerusalem la kpishi yange tese sha aeren a ve ér se uumace mba se lu vough ga ne se kuma u hemen ga. Ka Mesiya tseegh a kom u hemen sha mimi ye. Sha nahan yô, Yehova kaa a tor u masetyô u ken tsombor-tor u Davidi la ér: “Bugh idyer i tor . . . zan zan un u i lu kwagh na jim, una kar van, u Me na un yô.”—Esekiel 21:26, 27.

—I zua a kwagh u i nger heen ne ken takerada u Utor u Hiihii man u sha Uhar; 2 Kroniku ityough 10 zan zan 36 kua Yeremia 25:8-11.