YEHOVA yange tôndo zwa a Aberaham ér una na ônov nav tar u Kanaan anyom kar uderi imôngo cii ve Mbaiserael va mase nyôron ken tar la ye. Mbaiserael yange ve wa agoyol sha hemen u Yosua sha u za ngohol Tar u Ityendezwa la.

Aôndo yange kure ijir sha kwagh u Mbakanaan ér ve kuma ku. Aeren a ve a ijimbagh a ndôhôr ishima la tser tar la jimin cii kua awambe a mbaishôôv kpaa. Nahan lu u Mbaiserael vea tim agar a Mbakanaan a ve ngohol la cica cii.

Kpa cii man Mbaiserael nyôr ken tar u Kanaan yô, Yosua tindi mbamkerev uhar ken tar la. Mbamkerev mban tsa ken gar u Yeriko hen ya u kwase ugen, iti na ér Rahabi. Kwase ne ngohol ve hen ya na shi kura ve kpaa, shin er fa dedoo er ve lu Mbaiserael nahan kpaa. Rahabi yange na Aôndo u Mbaiserael la jighjigh, gadia vande ungwan akaa a Yehova er sha u yiman ior nav la cii. Rahabi ôr kwagh a mbamkerev mbara, nahan ve bum a na ér vea war un kua ya na cii.

Ayange nga kar yô, Mbaiserael nyôr ken tar u Kanaan, ve tange ityav sha gar u Yeriko, tsô Yehova er ivande girgar u Yeriko yôhôr haa inya cica cii. Akumautya a Yosua maa nyôr fese, tim gar la, kpa gema war Rahabi man tsombor na. Hii hen shighe la je, Yosua nôngo ityav kposo kposo anyom ataratar, ngohol Tar u Ityendezwa la nôngo u tseren. Tsô i bur tar la ker i kar sha ikwe i Iserael cii.

Yosua yange er Aôndo tom anyom vese, nahan ka zulum u una kpe yô a kohol ikyurior la cii imôngo. A hide a pase ve akaa a Yehova er a uter vev shi a zamber a ve ér ve civir Yehova. Yosua man mbatamen mba ve civir Aôndo a na imôngo la mba kpen kera cii yô, Mbaiserael undu Yehova, gba civir mbaaôndo mbagenev. Ikyurior ne fatyô u kuran atindi a Yehova hanma shighe ga je kuma er anyom 300 nahan. Hen shighe la cii, Yehova na ian, mbaihyomov mba Mbaiserael, er Mbafiliti nahan, er ve ican tsung. Kpa hanma shighe u Mbaiserael yange vea vaa vea yila Yehova ér a̱ wase ve yô, á ver orjir sha u nana yima ve. Mbaajiriv mban cii lu 12.

Oteniel lu orjir u hiihii ken Mbaajiriv mba i ôr kwagh ve ken takerada u Mbaajiriv la. Orjir u masetyô ken ve yô lu Semson; un hemba agee a iyolough sha won cii. Akaa a injaa a i nger ken takerada u Mbaajiriv la pase mimi u vesen ugen ciligh ciligh, man ka mimi shon je ne: Or ka nana ungwan imo i Yehova yô, nan zua a averen, kpa ihyembeato i ve a kwaghtseren.

—I zua a kwagh u i nger heen ne ken takerada u Yosua man Mbaajiriv man Levitiku 18:24, 25.