YESU lu pasen ior kwaghaôndo shi tesen ve kpaa, anyom nga kar atar man tiôn yô, Yesu fa ér shighe na u shin tar ne kera vese ga. Mbahemenev mba kwaghaôndo u Mbayuda zua zwa ér vea wua un, kpa ve gema ve lu cian ior, sha ci u ior nenge ér Yesu ka profeti je. Hen shighe la, Satan wa mhen u bo ken ishima i apostoli u Yesu ugen ken mbaapostoli nav mba 12 mbara, ka Yuda Isekarioti je la, nahan Yuda nenge Yesu mker. Mbahemenev mba kwaghaôndo mbara na un agbenger a azurfa 30 ér a nenge Yesu mker.

Ken tugh mbu Yesu mase lun a mbaapostoli nav la, Yesu kohol a ve imôngo sha u yan Paseka. Yesu yange na Yuda ian ér a̱ due, Yuda dugh kera cii yô, á ver iniongo i he, ka Kwaghyan u Ter u Aikighe je la. Yange tôô kpen bredi, er msen maa na mbaapostoli nav mba 11 mba ve mase shin her la. A kaa a ve ér: “Ngun ka iyol Yam je ne, i i ne sha ci wen; eren nen kwagh ne sha u umbur Mo.” Shi a tôô iyongo i wain, a kaa ér: “Iyongo ne ka ikyuryan i he i ken awambe Am.”—Luke 22:19, 20.

Yesu lu a akaa a ôron mbaapostoli nav hen tugh mbura kpishi. Yange na ve tindi u he ér ve doo ayol a ve sha mimi. A kaa a ve ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:34, 35) A taver ve ishima ér asema a de nyian ve sha ci u akaa a aa tser un la ga. Yesu er msen kpoghuloo sha ci ve. Yange ve wa atsam imôngo, maa ve due ve yem ken sule u Gesemane tugh mbura.

Mba za nyer ken sule la yô, Yesu gure er msen hen Aôndo kpoghuloo a ishima na cii. Ica i gbe ga yô, ushoja mba toron asema man upristi man mbagenev va a agudô sha u va kôron Yesu. Yuda kar za hen Yesu jighilii za suse un zwa sha u ve fa ér ka Yesu je la. Ushoja mbara mba ker Yesu yô, mbaapostoli nav cica cii yevese.

Yesu yange tile sha ishigh ki atejir u Mbayuda pase er un lu Wan u Aôndo yô. Atejir la kure un ijir i kuugh ér á tuhwa Aôndo. Yange i tôô Yesu i za a na sha ishigh ki Pontiu Pilatu, Orromanu u lu Gomna la. Shin er zua Yesu a ibo ga nahan kpa, a gema un a na ikpelaior i i̱ lu genger amo taver taver ér i wua un la.

I yem a Yesu hen Golgota, ape ushoja Mbaromanu mande un sha kon u mtsaha la. Tsô ivande i kpilighyol er, gadia ime wa, shin er lu iyange sha tembe nahan kpaa. Shighe kar kpuaa atetan la yô, Yesu kpe, nahan tar tenger kpishi. I tôô ikyom na i wa ken uwar u i time ken vande yô. Kpernan yô, upristi za sôr uwar la cir shi ve ver mbakuran sha zwa u uwar shon. Lu u Yesu una saa shin uwar la shinii? Ei. Lu u ivande i hemban uivande mbagenev cii ia er hen shighe la.

—I zua a kwagh u i nger heen ne ken Mateu ityough 26 man 27 man Marku ityough 14 man 15 kua Luka ityough 22 man 23 man Yohane ityough 12 zan zan 19.