YESU yange tema sha uwo u Olev, lu nengen a Yerusalem man tempel na shin inya tseer tseer. Tsô mbaapostoli nav unyiin va hen a na, ve tseegh, va pine un akaa agen a yange vande ôron ve yô. Yesu yange sember ôron ve ér á va hembe tempel u ken Yerusalem la. Shi sha anshighe ugen la, vande ôron ve kwagh u “iyange i mkurtar.” (Mateu 13:40, 49) Nahan zum u mbaapostoli mban va hen a na la ve pine un ér: “Ka nyi ia lu ikyav i sha mve Wou la man i mkurtara?”—Mateu 24:3.

Yesu ngur nan ve mlumun sha mpin ne yô, a pase ve akaa a aa er cii man mtim u Yerusalem la. Nahan kpa, akaa a Yesu ôr ve la lu u aa er sha shighe la tseegh ga. Kwaghôron u Yesu u profeti la una kure sha tar ne cii ken hemen. Yesu tsengaôron kwagh u mlu u tar ne man akaa a aa lu ikyav yô. Ikyav la ia wase ior mba shin tar u kaven ér Yesu hingir Tor, nahan a ande sha. Inja na yô, ikyav la ia tese ér Yehova Aôndo ver Yesu Tor u Tartor u Mesiya ú Aôndo yange tôndo zwa a mi la. Ikyav la shi ia tese ér Tartor la ngu sôôn karen a ifer kera shi ngu sôôn van uumace a bem u mimi. Nahan akaa a Yesu tsenga ôron la aa tese ér mkur u msertar u uumace hii, ka msertar u ukwaghaôndo man mbapativ man mbamzough mba ve lu sha ayange a ase ne la. Vea karen kera yô, msertar u he una va.

Yesu yange pase akaa a aa er shin tar sha shighe u m-ande na u sha, zum u una hingir Tor la ér ityav mbi nôngon mbia tser tar cii, ijen ia gba man ityartenger man ubombauangev kua mseer u atindi a peren kpaa. Hen shighe la mbahenen mba Yesu mba mimi vea pase loho u dedoo u Tartor u Aôndo sha tar jimin cii. Akaa ne cii aa kure ken “zegecan,” i hii er i gba tar la je i lu a er ga yô.—Mateu 24:21.

Mbahenen mba Yesu vea er nan ve vea fa ér zegecan la zurumuu? Yesu kaa ér: “Hen nen injakwagh ne sha kon u tur.” (Mateu 24:32) Zum u kon u tur ka ua hii u hômon ikya yô, ior ve fa je ér wangernyom mgbôghom. Nahan kape akaa a Yesu tsengaôron ér aa er la di kpa aa nguren eren hen shighe môm ve, ikyav ia tese wang ér mkur mgbôghom je la. Or môm nan fa iyange shin ihwa i zegecan la una hii jighilii ga, saa Ter tseegh. Sha nahan yô, Yesu wa mbahenen nav kwagh ér: “Ver nen ishima, kuran nen, gadia ne fa zum u shighe la una kuma ga.”—Marku 13:33.

—I zua a kwagh u i nger heen ne ken Mateu ityough 24 man 25 man Marku ityough 13 kua Luka ityough 21.