YANGE í wua Yesu ayange nga kar atar yô, kasev mbagenev mba ve lu mbahenen nav yô, za hen uwar na, tsô ve nenge í menger iwen i í cir sha zwa u uwar la kera. Shi uwar la lu gbilin!

Mbatyomov uhar ande hen a ve. Ortyom môm kaa a ve ér: “Ne mba keren Yesu u Nasareti. . . . A nder.” (Marku 16:6) Fese je maa kasev mbara za ayem sha u za ôron mbaapostoli. Er ve lu yemen sha gbenda la, ve nenge a Yesu. Yesu kaa a ve ér: “De cie nen ga, za za kaa nen anmgbianev Av, ve̱ za Galilia, ka keera vea za nenge a Mo ye.”—Mateu 28:10.

Sha iyange la, mbahenen mbagenev uhar mough Yerusalem lu yemen hen angar u Emou angahar. Er ve lu yemen la orgen va kohol ve, gba pinen ve akaa a ve lu ôron ayol a ve la. Or ne lu Yesu, u i nder un shin ku la ande hen a ve sha inja i vea kav un ga ye. Tsô ve na Yesu mlumun, kpa ishigh vev zuu sha mi. Or u ve fa un ga ne, gba pasen ve akaa sha kwagh u Mesiya, a i er ken Ruamabera la cii. Sha kpôô yô, akaaôron a profeti a i er sha Mesiya la cii kure sha Yesu vindi vindi. * Mbahenen mbara mba va kaven ér orvannya ne ka Yesu u i nder un shin ku ken jijingi la yô, Yesu maa ndiir ve ashe.

Mbahenen mba uhar mbara mough hen ijiir la fese hide yem ken Yerusalem. Ve va kohol mbaapostoli ken iyou igen, i ve senda i ve lu ker yô. Tsô mba ngur ôron ve akaa ne yô, Yesu iyol na ande hen atô ve. Cier mbahenen nav mban iyol, lu ve er ka mnyamciem nahan! Tsô Yesu pine ve ér: “Ka nyi akpelanakaa a lu ne ken ishima nahana? . . . Kristu Una ya ican Una shi Á nder shin mbakpenev sha iyange i sha u tar la.”—Luka 24:38, 46.

Yesu za hemen u anden hen mbahenen nav sha ashighe kposo kposo, hii shighe u i nder un shin ku la zan zan ayange 40. Sha shighe ugen la, a ande hen mbahenen hemba iorov 500! A shi nan kpa, lu hen shighe ne Yesu na ve tom u vesen ugen ye. A kaa a ve ér: “Za gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je.”—Mateu 28:19, 20.

Kwa u masetyô u Yesu ande hen mbaapostoli nav mba 11 mba jighjigh mbara la, Yesu tôndo zwa a ve ér: “Né va ngohol agee shighe u Icighan Jijingi Una va sha a ven yô, man né lu mbapasen kwagh Wam . . . zan zan á ar ken ikighir i tar je.” (Aerenakaa 1:8) Yesu been iliam a ve yô, i tôô Un i yem a na sha, ve lu nengen er lu yemen yô zan zan ibeenegh ngohol un sha ashe ve kera.

—I zua a kwagh u i nger heen ne ken Mateu ityough 28 man Marku ityough 16 man Luka ityough 24 kua Yohane ityough 20 man 21 man 1 Mbakorinte 15:5, 6.