MA ORUMACE ngu u nana tagher ishigh a mbamzeyol mba vesen kpa nana za hemen u civir Aôndo sha jighjigh je kpa? Man aluer nan ngu civir Aôndo sha jighjigh kpa nan zua a akaa a dedoo ga nahan, nana za hemen je he? Yange i pine mbampin mban sha kwagh u orgen, iti na ér Yobu, shi i zua a mlumun sha mi kpaa.

Shighe u Mbaiserael lu ken Igipiti la, Yobu, u lu anmgbian u Aberaham u ken agbar la, lu ken gar ugen hen ijiir i í yer hegen ér Arabia la. Hen shighe la, mbatyomov mba shaav kohol sha ishigh ki Aôndo, Satan ortyom u hemban ato la kpa kohol a ve imôngo. Tsô Yehova ôr kwagh u Yobu, wanakiriki na u jighjigh la vangertiôr sha ishigh ki mkohol u mbatyomov mba shaav la cii. Yehova kaa ér ma or u mimi, u lun er Yobu nahan, nan ngu ga. Kpa Satan gema kaa ér Yobu ngu civir Aôndo sha ci u Aôndo ver un doo doo, shi kor un kpaa. Satan kaa ér aluer i ngohol a akaa a Yobu a lu a mi la cii yô, una tuhwa Aôndo.

Tsô Aôndo na ian ér Satan a̱ ngohol inyaregh ki Yobu cii kua ônov nav kpaa, shi a̱ ta un angev. Yobu yange fa er i lu Satan je a lu eren akaa ne ga, nahan taver un er i hii ve Aôndo a de ér una ya ican nahan yô. Kpa, mayange Yobu tuhwa Aôndo ga.

Hen shighe la, akar a Yobu a gbilinigh va un inya. Nomsombaiorov mban ôr kwagh a Yobu kpishi sha u vea bume un a̱ hen ér Aôndo ngu tsahan un sha asorabo a á er ken myer yô. I nger akaaôron a ve ne ken takerada u Yobu. Shi ve kaa a na kpaa ér, Aôndo soo mbacivir un ga, shi a na ve jighjigh kpaa ga. Yobu venda mhen ve u vough ga ne. Yobu ôr kwagh vangertiôr ér, una za hemen u civir Aôndo sha mimi zan zan ku na!

Nahan kpa, Yobu gema er kwagh u doo kuma ga yô. Yange na iyol na ishô ngee yum. Hen shighe ne gumor Elihu, u lu her a ve imôngo lu ungwan akaaôron a ve la ôr kwagh sha u kôôm ve cii. Yobu yange fa er i hembe doon u paan mtemtor u Yehova Aôndo iyol, a u paan orumace iyol ga. Nahan Elihu kôôm mhen u Yobu sha kwagh ne. Elihu shi vihi ishima a akar a Yobu a mimi ga la.

Tsô Yehova Aôndo ôr kwagh a Yobu, kôôm mhen na. Yehova pase Yobu akaauma a kpilighyol kposo kposo sha er a̱ fa er orumace nan yen sha Aôndo ica je yô. Yobu hide a iyol na ijime, ngohol kwaghwan u Aôndo la. Er “mhôônom ma ker” Yehova “shi [a] zungu mhôônom kpaa” yô, Yehova bee Yobu angev shi hide na un inyaregh kpishi, hemba kwagh u lu a mi la kwa har je, shi na un ônov pue. (Yakobu 5:11) Er Yobu ya ican kpishi kpa za hemen u civir Aôndo sha mimi her yô, kwagh ne gema tese ér ahon a Satan gba sha kwagh u uumace ér vea de u civir Aôndo zum ve tagher a ican la ka mimi ga.

—I zua a kwagh u i nger heen ne ken takerada u Yobu.