VEGHER 2
Paradise Lost
Ortyom ugen u hembanato yange bume Adam man Ifa, nomsoor man kwase u hiihii la, nahan ve venda hemen u Aôndo. Sha nahan yô, uumace hingir mbaasorabo, nahan ku va sha ior cii
AÔNDO yange gba ior mba ken jijingi mba i yer ve ér mbatyomov la ica gba cii ve mase gban orumace ye. Ortyom u hembanato ugen u i va hingir u yilan un ér Satan, Diabolo la, yange mee Ifa sha ayom, nahan Ifa ya ityamegh ki kon ugen u Aôndo kaa ér ve de ye ga yô.
Satan yange lam a Ifa sha ikyev i iyô. A ôr kwagh a na u tesen ér Aôndo ngu nyumen un kua nom na kwagh u dedoo. Ortyom la kaa a Ifa ér una ya ityamegh ki kon u i te ve icin sha mi la vea nom na kpa vea kpe ga. Sha nahan yô, Satan wa Aôndo kwagh iyol ér á tsugh ônov nav, uumace. Orcugh ne ôr kwagh inja er u hemban Aôndo ato ka kwagh u dedoo, u una na ior mkav shi vea zua a tseeneke ve nahan. Kpa kwagh u ôr la lu aie cica cii. Jighilii yô, lu aie u hiihii u i er shin tar je ne. Kpa ikyaa i yange i lu inya jim jim yô, lu ikyaa i hemen u Aôndo, shin mtemtor na u hemban la, inja na yô Aôndo ngu a ian i hemen je kpa, man una lu a mi yô, ngu hemen sha inja kpa, ngu hemen sha gbenda u a kpe mba a hemen ve la iyol kpa?
Ifa yange na Satan jighjigh. Ityamegh ki kon la maa hii u saren un, tsô a ya u. Nom na hidi her yô, a na un, un kpaa ya. Nahan ve hingir mbaasorabo. Kwagh u ve er, u̱ lu inja er ka kwagh yum ga ne, lu ihyembeato jim jim je. Er Adam man Ifa per tindi u Aôndo sha apera yô, ve venda hemen u Orgban ve, u yange na ve hanma kwagh kua uma u vough kpaa la.
Vor la “ua cagh u ityough, we di kpaa ú cagh u ikishinguhar.”—Genese 3:15
Aôndo yange tsaha mbahembanato mban. Yange tsengaôron kwagh u mve u Vor shin Oryiman, u una tim Satan, un shon u ôr kwagh a ifa sha ikyev i iyô la. Aôndo yange wua Adam man Ifa ave ave la ga, man kwagh ne lu gbenda u zungwen ônov vev mba ve lu a mar ga la mhôônom. Ônov vev mbara vea lu a ishimaverenkeghen sha ci u Un u Aôndo una tindi la una bee a mbamzeyol mba ihyembeato i ken Eden la i ve a mi la. Zum u i va hii u ngeren Bibilo la, Bibilo hii u pasen er Aôndo una kure awashima na sha kwagh u Oryiman la man Or u nana lu Oryiman shon la kpaa.
Aôndo zenda Adam man Ifa ken Paradiso la kera. Nahan gba u vea gema zuan a kwaghyan sha ican, vea kahan kwagh ken won u sule u Eden la. Ifa maa wa iyav mar Kain, wan ve u hiihii la. Ve mar ônov mba nomso man mba kasev mbagenev kpaa, er Abel man Setu, tertamen u Noa nahan.
—I zua a kwagh u i nger heen ne ken Genese ityough 3 zan zan ityough 5; Mpase 12:9.
