YEHOVA ka Tor u fan kwagha? Gbenda môm u se zua a mlumun sha mpin ne wang yô, ka u henen sha kwaghwan u Aôndo. Kwaghwan na wasen ior kpa? Or ka nana dondo kwaghwan na nahan i kpe nan iyol, shi uma u nan a hemba lun nan a inja kpa? Tor u fan kwagh, Solomon, yange nger anzaakaa uderi uderi. Anzaakaa ne nôngo u tseren sha akaa a se eren ken uuma asev cii. Nenge ase anzaakaa shon agen.

Gba u se suur sha Aôndo. Aluer se soo u yan ikyar vea Yehova taveraa yô, gba u se suur sha a na. Solomon nger ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” (Anzaakaa 3:5, 6) Ka sea suur sha Aôndo, sea dondon hemen na shi sea ungwan un nahan, uma wase a doo kpen kpen. Or u nan eren nahan la nana na a saan Aôndo iyol shi nana wase Yehova u kaan imo a orihyom Na, Satan, sha akaa a yange gba ahon sha mi la cii.—Anzaakaa 27:11.

Eren kwagh a mbagenev sha kwaghfan. Kwaghwan u Aôndo hen noov man kasev mba yaav man ônov ngu a iwasen hegen hemba cii. Aôndo wa nom kwagh ér: “Ember kwase wou u sha uye la,” inja na yô, nom nana de undun kwase u nan ga. (Anzaakaa 5:18-20) Takerada u Anzaakaa pase kasev mba yaav kwagh u kwase u injaa u nan doo nom u nan ishima kua ônov mba nan sha ci u aeren a nan la. (Anzaakaa, ityough 31) Mbayev kpa, takerada ne kaa a ve ér ve̱ ungwan imo i mbamaren vev. (Anzaakaa 6:20) Shi takerada u Anzaakaa pase ér ikyaryan ka kwagh u hange hange, kpa or u nan dugh iyol i nan kposo yô, ka mtsera u nan iyol i nan nan keren ye. (Anzaakaa 18:1) Ahuraior a ase aa fatyô u tsaren se aeren a dedoo shin a bo, nahan doo u se tsua ahuraior a ase sha kwaghfan.—Anzaakaa 13:20; 17:17.

Eren a iyol you sha kwaghfan. Takerada u Anzaakaa ngu a kwaghwan u dedoo sha kwagh u palegh msôrom ma hunden. Shi u wa se kwagh ér se lu a mbamhen mba dedoo mba vea na se mkpeyol yô, kpa se̱ gema se̱ palegh mbamhen mba vea na se angev la. Shi u kaa a vese ér se de we hwev ga. (Anzaakaa 6:6; 14:30; 20:1) Takerada ne shi ta se icin ér aluer or ngu suur sha mnenge u nan, nan ngu dondon kwaghwan u Aôndo ga yô, kwagh a tser nan. (Anzaakaa 14:12) U taver se ishima ér se kura or wase u ken atô la, ka ishima yase je la, sha er ma kwagh môm una hôngor i ga yô, “gadia ka ken [ishima] uma a dugh ye.”—Anzaakaa 4:23.

Ior umiliôn umiliôn sha tar nenge ér aluer or ngu dondon akaawan ne yô, uma u nan una hemba doon cii. Sha nahan yô, ve zua a atôakyaa kpishi a lumun Yehova ér ka Tor ve.

—I zua a kwagh u i nger heen ne ken takerada u Anzaakaa.