Hen Orpasen Loho u Tartor:

Tôô ase wer u ngu apostoli, nahan we man mbaapostoli mbagen ne tile sha Uwo u Olev. Yesu maa va ande hen a ven. Er lu nôngon u kôndon yemen sha la, a kaa ér: “Ne va ngohol tahav zum u icighan jijingi una sen sha a ven yô, nahan ne lu mba eren shiada sha kwagh wam ken Yerusalem man ken Yudia kua ken Samaria cii, man ken ajiir a hemban gban ica sha tar.” (Aer. 1:8) Nahan u er nena?

Alaghga u nenge wer tom u Yesu a ne ne la, u kehe u gande ne. U pine wer, ‘A er nan ve se mbahenen kpuaa nahan se fatyô u eren shiada za aren sha “ajiir a hemban gban ica sha tar” laa?’ Alaghga u umbur icin i Yesu yange ta hen tugh mbu kpernan i wua un la, a kaa ér: “Kpan hembe orvesen na ga. Aluer ve tôvom a ican yô, ne kpa vea tôv ne a ican; aluer ve wa kwaghôron wam ikyo yô, u wen kpa vea wa un ikyo. Kpa akaa ne cii vea er ne sha ci u iti yam, sha ci u ve fa Un u a tindim la ga.” (Yoh. 5:20, 21) U henen sha mkaanem mara yô, alaghga u pine iyol you wer, ‘Me fatyô u eren shiada vighe vighe shighe u ior vea lu hendan a mo la kpa?’

Nyian ne kpa kape kwagh wase a nôngo u lun je la. Er se lu Mbashiada mba Yehova yô, se kpa i na se tom u eren shiada vighe vighe aren sha “ajiir a hemban gban ica sha tar” man hen “ior mba ken akuraior cii.” (Mat. 28:19, 20) Kpa er ior vea lu hendan a vese yô, a er nena ve se er tom ne se kure u doo doo?

Aerenakaa a Mbaapostoli ôr se kwagh u doon kpishi, er mbaapostoli man Mbakristu mba sha ayange a tsuaa la cii, er tom ne kure u doo doo sha iwasen Yehova yô. Takeda ne ua wase u u fan akaa kpishi aa yange er Mbakristu mbara yô, shi ua wase u u kaven er yange saan ve iyol shighe u ve nenge tom ve u pasen kwagh la lu zan hemen fele fele yô. A kpiligh we iyol u nengen er mlu u Mbakristu mba sha ayange a mbaapostoli la a zough vea mlu Mbakristu nyian sha akaa kpishi yô. U nenge er kwagh u Mbakristu mbara man kwagh wase cii a zough i lu sha tom u se eren la tseegh ga, kpa i kua gbenda u ka se sôr akaa se ver vough vough u eren tom shon la kpaa yô. Aluer u nenge er kwagh ve man kwagh wase a zough yô, kwagh ne una wase u u seer nan jighjigh wer, Yehova Aôndo ngu hemen nongo na u shin tar ne zan zan nyian.

Se mba eren msen shi veren ishima ser aluer u time ken takeda u Aerenakaa la yô, kwagh ne una seer taver jighjigh u u ne wer Yehova una wase u shi icighan jijingi na una za hemen u nan we agee la. Aluer u dondo akaawan a ken takeda ne yô, u za hemen u ‘eren shiada vighe vighe’ sha kwagh u Tartor u Aôndo shi u wase mbagenev u zan sha gbenda u myom la kpaa.—Aer. 28:23; 1 Tim. 4:16.