Ka Yehova Aôndo a gbe se ye. A gba akaa cii, a se nengen a mi, man a se nengen a mi ga la kpaa. Yange vande gban mbatyomov mba shaav kpishi cii ve mase gban akaa a se nengen a mi ne ye. U fa er mbatyomov ve lu kpa? Mba er Yehova Aôndo u a gbe ve la nahan. Se fatyô u nengen a ve ga, vough er Aôndo kpa se nengen a na ga nahan. Ortyom u Yehova hii gban la yange va hingir or u wasen un tom. Yange ortyom shon wase Yehova tom u gban asan man usha man tar, kua akaa agen cii. Tar gema ka ya wase u doonashe tsung.

Yehova gban tar cii yô, a sôr u ér annyamev kua uumace ve lu sha u. A er iwanger i iyange hingir u tan sha tar. Hide er iwo due, kua utyeku man uifi.

Shi yange er nyi igen kpaa? Yehova kaa ér: ‘Me er toho man iyiav man ikyon i mende.’ Akaa ne nga menden yô, atam a ikyon kposo kposo, man ahu a iue, man ufaluwa hii u duen. Yehova maa gba annyamev cii, mba purugh, man mba lun shin mnger, man mba kpelan a kpela inya, kua mba tsuwen a tsuwe. Yange gba annyamev mba cuku cuku, er anhyevev nahan, kua mba kehen, er nor nahan. Ken annyamev cii, ka u han a hembe doon we?

Yehova gban annyamev cii yô, a kaa a ortyom u hiihii u lu wasen un tom la ér: “Sé er or.” Lu u una gba uumace vea lu kposo a annyamev. Ve yô, vea henen kwagh cii man vea eren ye. Vea lamen, shi vea seen, shi vea eren msen. Lu u vea nengen sha annyamev kua tar cii. U fa orumace u Yehova yange hii gban la kpa? De se nenge.