Orgen yange va tema Tor sha Babilon, iti na ér Dariu. Lu Ormidia. Dariu yange nenge ér or kuma sha Daniel ga. Nahan a ver un ér a nengen sha ior mba hemban lun tagher tagher ken tartor na cii. Kpa ior mba shon lu eren Daniel iyuhe, shi ve soo u wuan un. Yange ve fa er Daniel eren msen hen Yehova kwa tar ken hanma iyange yô, nahan ve kaa a Dariu ér: ‘Tor, wa tindi wer hanma or cii nana eren msen hen a we tseegh. Aluer or per tindi ne yô, a kende nan shin ihyungwa i ubegha ve lu shimi poo yô.’ Kwagh la yange doo Dariu, nahan a wa tindi la.

Daniel va ungwan ér i wa tindi nahan yô, a yem hen ya na fese, a za nyôr ken iyou na, kpa a wuhe windou ga. Maa a gure hen windou ugen a gba eren msen hen Yehova. Tsô ior mba eren un iyuhe mbara va ta baa nyôr ken iyou na ne, maa ve kohol un lu eren msen. Tsô ve hide ayem ve za ôr Dariu ér: ‘Daniel venda u ungwan imo you, Tor. Hanma iyange ka a er msen hen Aôndo na kwa tar.’ Dariu yange soo Daniel kpishi, nahan a soo ér Daniel a kpe ga. Ken iyange la cii, Tor Dariu er kwagh ugen ga, a shi henen kwagh u una er ve una yima Daniel yô. Kpa lu u tor iyol na je kpa una fatyô u geman tindi u a we ga. Tsô a na zwa i za kende Daniel shin ihyungwa i ubegha mba sasen kwaghyan.

 Tugh mbura cii, Dariu yange fatyô u yaven ga, sha ci u ishima za un iyol kpishi sha kwagh u Daniel. Kpernan pepe pepe nahan maa, Dariu yevese za hen ihyungwa la, za yila Daniel, pine ér: ‘Aôndo wou yima u kpa?’

Dariu maa ungwa or ôr kwagh shin ihyungwa la. Lu Daniel! A yila Dariu a kaa ér: ‘Ortyom u Yehova va cir ubegha mban ijô. Nahan ve erem kwagh ga.’ Yange doo Dariu kpishi! Nahan a na zwa ér i za dugh Daniel shin ihyungwa la kera. Daniel yange tôndo ivav iyol cuku tsô kpaa ga. Tor hide na mbatomov nav zwa ér: ‘Kende nen ior mba ve we Daniel kwagh iyol la shin ihyungwa i ubegha la.’ Mba za kenden ve yô, ubegha mbara ya ve fese je ngôôr ga.

Dariu hide tindi a loho hen ior nav ér: ‘Hanma or nana cia Aôndo u Daniel. A yima Daniel shin ihyungwa i ubegha.’

Hanma iyange ka u er msen hen Yehova er Daniel nahan kpa?