Yange Mbaiserael kpishi hide yem ken Yerusalem tsa kuma er anyom 70 nahan, kpa mbagenev lu ken tar u Pershia la her, sha ajiir kposo kposo. Pristi ugen kpa lu ker her, iti na ér Esera. Yange tesen atindi a Yehova. Tsô Esera va ungwa ér ior mba ken Yerusalem mba dondon atindi a Aôndo ga, nahan a soo ér una za tese ve. Hen shighe ne Artashaseta lu tor u tar u Pershia. Tsô Tor Artashaseta kaa a Esera ér: ‘Aôndo na u kwaghfan ér we u tese atindi a na. Yô, za vea hanma or u nan soo u zan a we cii.’ Esera maa kohol ior mba yange ve soo u hiden yemen ken Yerusalem la cii, ijiir i môm. Ve er msen hen Yehova ér a kura ve sha gôgô gbenda la, maa ve mough ve gba yemen.

Yange ve tsa sha gbenda iwer inyiin cii ve za mase nyôron ken Yerusalem ye. Tsô utyombaiorov mba ken Yerusalem kaa a Esera ér: ‘Mbaiserael hemba Yehova ato, shi ve er kasev mba ve civir Yehova ga yô.’ Nahan Esera er nena? Esera yange gure anu inya sha ishigh ki Mbayuda cii, a er msen a kaa ér: ‘Yehova, u wase se kpishi, kpa se er u kwaghbo.’ Yange ior mbara gema asema, kpa ve lu eren akaa agen her sha inja ga. Esera maa tsua mbatamen man mbaajiriv ér ve nenge sha zayol la. Yange ve nenge sha zayol shon iwer itiar. Nahan mba ve lu civir Yehova ga la cii, i zenda ve ken tar u Yuda kera.

Esera yange hiden ken Yerusalem anyom pue kar ahar nga karen yô, i hide i maa girgar u Yerusalem i ningir i tser. Tsô Esera yila ior va kohol hen tembe u Yerusalem ér una ôr ve Atindi a Yehova. Esera bughun takerada u atindigh la yô, ior cii mough tile sha. Esera sugh Yehova, maa ior cii lumun, kende ave sha. Esera yange ôr ve Atindi la shi ta iwanger sha mi, nahan ior kegh ato, ve ungwa wanger ve. Tsô ve cii ve lumun ér mimi je ve undu Yehova, nahan ve vaa tsung. Kpernan kpa Esera seer ôron ve Atindi shon. Kwagh ne wase ve ve mase kaven er i zurum u vea er Iniongo i Atumbe yô. Maa fese je ve hii u kohol iyol i eren iniongo shon.

 Yange ve er iniongo la ayange ataankarahar. Ken ayange a iniongo la cii, ior ember shi sugh Yehova er iyiav vev mbi doo yum yô. Er Yosua yange kpe je, lu hiin je shi i er Iniongo i Atumbe nahan ne. Mba been iniongo i atumbe la yô, ior kohol ijiir i môm, ve er msen ér: ‘Yehova, u due a vese ken kpan kera, u koso se ken ikyôngo, shi u na se tar u dedoo. Kpa se zer hemban we ato gbem. U tindi uprofeti wer ve ta se icin, kpa se soo u ungwan ve ga. Nahan kpa u za hemen u wan ishima a vese. U er a vese er yange u tôndo zwa a Aberaham nahan. Hegen yô, se mba tôndon zwa ser se ungwan imo you.’ Yange ve nger kwagh u ve tôndo zwa u eren ne shin takerada, nahan utyombaiorov man Mbalevi kua upristi cii, lumun.