Tor Nebukadinesar yange yav tugh mbu gen mnyam cier un, man mnyam mara cier iyol kpishi. Nahan a yila mbafankwagh nav cii va hen a na, ér ve pase un inja i ma. Kpa or ve môm fatyô u pasen ga. Ken masejime yô, a ôr Daniel.

Nebukadinesar kaa a Daniel ér: ‘Ken mnyam am mara, m nenge a kon. Kon shon vese tav je nyôr sha kwavaôndo. Lu kon u ior vea lu han han sha tar kpa vea fatyô u nengen a u yô. Ikya i kon shon doo u nengen, shi u ume atam kpishi. Annyamev zuan a mure shin itine i u, shi annyonov wa aya sha agbaa a u. Nahan maa ortyom za sen sha va genger imo kaa ér: “Gber kon ne kera, shi paa agbaa a u. Kpa de ikpughur i kon shon kua amise na shin inya. Gema kange ikpughurkon la sha ikyangenev mbi sha iyô man togula. Ishima i ikpughurkon shon ia kera lu i orumace ga, kpa ia hingir ishima i inyamtoho, zan zan ashighe a̱ kar un ataankarahar. Nahan ior cii ve̱ fa er Aôndo a lu Tor, shi ka a na hanma or u a soo cii tartor yô.” ’

Yehova yange pase Daniel inja i mnyam mara. Daniel kaven yô, cier un iyol. A kaa ér: ‘Kpei Tor, mnyam man a lu kwagh u mbaihyomov ou kpa ma i zem iyol ga, kpa gema ka kwagh wou. Zegekon u i gber un kera la, ka we. Tartor wou ua kera lu sha ikyev you ga, shi u za lu ken ikyôngo u yaan toho er u ngu inyamtoho nahan. Kpa er ortyom la a kaa ér i de ikpughurkon la a amishe a na shin inya nahan, u va hide u lu tor her.’

Inyom i môm karen yô, Nebukadinesar lu zenden sha tembeyoughough u sha ijime i iyou na, wuese Babilon. Lu kaan ér: ‘Nenge zege geri u m maa ne. Or môm kuma sha a mo ga!’ Er tor lu ôron kwagh zan ave la je, imo due sha kaa ér: ‘Nebukadinesar! I kar a tartor wou kera hegen.’

Hen shighe la je, ishima i Nebukadinesar gema, nahan a hingir u henen kwagh er ka inyamtoho nahan. Maa a due hen ya na kera, a yem ken toho a za lu vea inyamtoho imôngo. Shighe u lu ken toho la, ice na tav lihe er ingyur i gafa nahan, akughur a na kpaa hingir er akughur a inyon nahan.

 Anyom ataankarahar nga karen yô, Nebukadinesar hide hingir sha mar na, er ngise lu nahan, shi Yehova na un hide lu tor u Babilon her. Tsô Nebukadinesar kaa ér: ‘M wuese Yehova, Tor u akum a sha. Hegen m fa, ka Yehova a lu Tor ye. Ngu a hide a mba ve kenden a iyol sha la ijime, shi ka a na hanma or u a soo cii tartor.’