Yosev man Maria yange ve lu vea Yesu ken Nasareti, kua ônov vev mba nomso mbagenev man mba kasev. Yosev eren tom u kapinta, koson tsombor na, shi tesen ve kwagh u Yehova kua Atindi a na. Hanma shighe yô, a za a tsombor na ken shinagoge ve za civir Aôndo. Shi ve zaan Yerusalem sha u za ember iniongo i Paseka ken hanma inyom.

Shighe u Yesu lu anyom 12 la kpa, tsombor na ne za gôgô zende, u ve vanden zan ken Yerusalem la. Geri u Yerusalem yange iv a ior mba ve va u ember iniongo i Paseka yô. Iniongo la been kera yô, Yosev man Maria cin gba hiden hen ya ve, ve lu henen ér Yesu ngu ken atô u ior mba ve lu hiden sha gbenda a ve imôngo la. Kpa mba va ngur keren un yô, ve zua a na ga.

Maa ve hide ve yem ken Yerusalem, ve za ker wan ve zan zan ayange atar. Mba va karen mba zan ken tempel yô, ve nenge Yesu tema hen atô u mbatesen atindi. Yesu kegh ato lu ungwan ityesen ve shi pinen ve  mbampin sha kwaghfan. Yange doo mbatesen mbara a Yesu je ve hii u pinen un mbampin. Kpiligh ve iyol a mbamlumun nav. Ve nenge ér a fa Atindi a Yehova.

Yange ishima za Maria man Yosev iyol kpishi. Tsô Maria kaa a na ér: ‘Wana, se ker u hanma ijiir cii! Ka han u ze?’ Yesu kaa a ve ér: ‘Ne kera fa er i gbe u me lu ken iyou i Terem heen gaa?’

Tsô Yesu hide vea mbamaren nav hen ya, ken Nasareti. Yosev tese Yesu tom u kapinta. U hen wer, shighe u Yesu lu gumor la, yange lu nyi oro? Yesu lu vesen, nahan kwaghfan na kpa lu seer a seer, shi Aôndo kua ior cii soo un.