Mbafarishi yange ve kôr Yesu ihyom, shi ve lu keren kwagh u vea zua un a ibo sha mi, maa vea kôr un yô. Nahan ve kaa a na ér a de been ior iangev sha Iyange i Memen ga. Kpa sha Iyange i Memen igen la, Yesu nenge orapirashe ugen lu sônon ior kwagh sha godobi. Yesu maa kaa a mbahenen nav ér: ‘Nenge nen er tahav mbu Aôndo mbua wase or ne yô.’ Yesu maa hôr inya sha ijer na, shighe or la sha ashe. Been yô, a kaa a or la ér: ‘Yem shin ityungu i Shiloam, za ôô ashe.’ Or la eren nahan yô, a hii u nengen. Er yange i mar un je, lu hen shighe ne hii u nengen ye.

Yange kpiligh ior iyol je, ve pine ér: ‘Ka or u ka a tema sha godobi a sônon kwagh ne gaa? Shin or ne bee un a bee?’ Or la kaa ér: ‘Ka mo u yange i marem a ashe a pirin ne!’ Ior mbara pine un ér: ‘Er nan ve u hingir u nengene?’ Or la pasen ve kwagh u Yesu er a na la yô, ve za a na hen Mbafarishi.

Or la za ôr Mbafarishi ér: ‘Yesu hôr inya shighem sha ashe, maa a kaa a mo ér m yem m za ôô sha. M za ôôn yô, m hingir u nengen.’ Mbafarishi maa kaa ér: ‘Aluer Yesu bee or angev sha Iyange i Memen yô, ka Aôndo a ne un tahav mbura ga.’ Kpa mbagenev kaa ér: ‘Luun er ka Aôndo a ne un tahav ga yô, or môm kpa ma a fetyô u been nan angev ga.’

Tsô Mbafarishi yila mbamaren mba or la, ve pine ve ér: ‘Er nan ve wan wen a hingir u nengen hegene?’ Mbamaren nav mbara  lu cian u ôron, sha ci u Mbafarishi kaa ér hanma or u nan ne Yesu jighjigh cii yô, kwagh u nan bee ken shinagoge. Nahan mbamaren nav mbara kaa ér: ‘Se fa ga. Pine nen un.’ Tsô Mbafarishi gba pinen or la mbampin mbagenev, gbem tsô va gande or shon kaa a ve ér: ‘M vande ôron ne gaa? Man ka nyi ne zer pinen mo kwagh gbeme?’ Nahan Mbafarishi nyoon ishima a na, maa ve dugh un ken shinagoge sha.

Tsô Yesu hide za zua a or la, pine un ér: ‘U na Mesiya jighjigh kpa?’ Or la gema kaa ér: ‘Mea fe or u nan lu Mesiya la yô, ma m ne nan jighjigh.’ Yesu maa kaa a na ér: ‘Ka mo m lu Mesiya shon ye.’ Kwagh ne tese ér Yesu yange wa or la ikyo ga he? Yange bee or la angev tseegh ga, kpa wase un hingir or u nan jighjigh.