Upristi mbatamen yange ve za a Yesu hen ya u gomna Pilatu. Tsô Pilatu pine ve ér: ‘Or ne er nyi ve ne va yilan un ijiri?’ Ve kaa ér: ‘Ka a ôron ér un ngu tor!’ Pilatu gema pine Yesu ér: “U ngu tor u Mbayuda?” Kpa Yesu kaa ér: “Tartor Wam ka u shin tar ne ga.”

Tsô Pilatu kaa ér ve yem a Yesu hen Herode, tor u Galilia, a za tôv un a nenge, una zua un a kwaghbo yô. Kpa Herode nenge a kwaghbo môm u Yesu er ga, nahan a na zwa i hide i yem a na hen Pilatu. Tsô Pilatu kaa a ior ér: ‘Mo man Herode cii se nenge a kwaghbo u or ne a er ga. Me de un a yem.’ Kpa ikpelaior la genger amo kaa ér: ‘I wua un! I wua un!’ Tsô ushoja gbidye Yesu akpa, ta un azer, shi ve lu tan un sambe kua azu. Ve tume idyer sha saa ve penda un sha ityou, ve gba nahan un tar kaan ér: ‘Se sugh u, Tor u Mbayuda!’ Pilatu shi kaa a ikpelaior la ér: ‘Or ne er kwaghbo môm môm ga.’ Kpa ve genger amo taver taver ér: ‘I za mande un sha kon!’ Tsô Pilatu na zwa ér i yem a na i za wua.

Ushoja mbara maa yem a Yesu hen ijiir igen, i yilan i ér Golgota, ve za mande un sha kon, ve kôr kon shon ve tim sha. Tsô Yesu er msen kaa ér: ‘Tere, de ve kwaghbo ve, gadia ve fa kwagh u ve lu eren ga.’ Ior lu sen Yesu kaan ér: ‘Wea lu Wan u Aôndo yô, hungwa ase shin inya! Yima iyol you.’

Môm ken mbaaferev mba i mande ve ikyua a Yesu yô kende kaa a na ér: “Yesu, umbur mo Zum u Wea nyôr sha tartor Wou yô.” Tsô Yesu tôndo zwa a na ér: “Ú lu a Mo imôngo ken Paradiso.” Ka va hingir atetan yô, ime wa tser tar la cii, kuma ahwa atar. Mbahenen mbagenev tile ikyua a kon u i mande Yesu sha mi la, shi Maria, ngô u Yesu kpa tile her. Yesu gema kaa a Yohane ér a nengen sha Maria er ka ngô na nahan.

Ken masejime yô, Yesu va kende kaa ér: “Bee ve.” Tsô a suwa ityough, maa a kpe. Hen shighe la je, tar tenger sha agee. Shi ikyondo i civirii, i i ta ken tempel sha u yisan ian i nyôron hen Icighanjiir u Hemban Cii la, pav her atô jighilii due shin inya. Tor shoja ugen maa kaa ér: ‘Mimi je, or ne lu Wan u Aôndo.’