Torshoja u tagher tagher ugen lu hen geri u Sesaria, iti na ér Korneliu. Shin er lu Oryuda ga nahan kpa, Mbayuda naan un icivir. Lu or u wasen mbaatsanev man mbaibanave yô. Korneliu yange na Yehova jighjigh, shi eren msen hen a na hanma shighe cii. Iyange igen yô, ortyom va ande hen Korneliu kaa a na ér: ‘Aôndo ungwa mbamsen ou. Yô, tindi ior ve za hen gar u Yopa, ape Peteru a lu la, ve za kaa un a va hen a we.’ Fese je maa Korneliu tindi iorov utar ve za ken Yopa. Lu zende u kuman er ukilomita 50 nahan.

Sha shighe shon ne, i tese Peteru mpase u sha mnenge ken gar u Yopa. A nenge a annyamev mba Mbayuda ve ye ga yô, shi a ungwa imo kaa a na ér a kôr a ya. Kpa Peteru venda, kaa ér: ‘Annyamev mba ndôhôrshima shin mba lun wang ga cii m ye ga.’ Imo la gema kaa a na ér: ‘De nengen annyamev mban wer ka kwagh u ndôhôrshima ga. Gadia Aôndo sôr ve mba wang.’ Shi i kaa a Peteru ér: ‘Iorov utar mba pinen we ken won. Za a ve imôngo.’ Tsô Peteru due ken won za kohol ve, a pine ve kwagh u ve ve yô. Ve kaa a na ér: ‘Ka Korneliu, torshoja u Mbaromanu ugen a tindi se ye. Ér se va ôr u we u za hen ya na, ken Sesaria.’ Tsô  Peteru kaa a ior mbara ér ve tsa kper tsô vea yem. Kpernan Peteru mough vea ve kua anmgbianev mbagenev ken Yopa, ve yem ken Sesaria.

Korneliu va nengen a Peteru yô, a gure anu inya a sugh un. Kpa Peteru kaa a na ér: ‘Mough sha! M ngu or er we nahan. Aôndo kaa ér mo m va hen ya wou, shin er Mbayuda ve ze hen ya u Atôatyev ga nahan kpaa. Nahan yô, ôrom ase kwagh u u tindi wer mo m va la.’

Tsô Korneliu kaa a Peteru ér: ‘Yange m lu eren msen hen Aôndo, maa ortyom u sha va kaa a mo ér mo m tindi i za ôr u va. Kwagh ne er ka ayange anyiin je ne. Nahan wea lumun yô, pase se mkaanem ma Aôndo.’ Tsô Peteru kaa ér: ‘Hegen m fa Aôndo ka u sangen a sange ga. Ka a ngohol hanma or u nan soo u civir un cii.’ Peteru maa tese ve akaa kpishi sha kwagh u Yesu. Tsô icighan jijingi sen sha Korneliu kua mba ve lu vea na cii, nahan ve cii i er ve batisema.