Yesu yange hide yem sha ayange pue nga karen yô, mbahenen nav ngohol icighan jijingi. Lu sha iyange i iniongo i Pentekosti u ken inyom i 33 la, nahan ior due sha ajiir kpishi va ken Yerusalem u va eren iniongo ne. Sha iyange ne, mbahenen mba Yesu mba kuman er iorov 120 nahan, kohol imôngo ken ruum iyou ugen sha kpoyou u sha aôndo. Ica i gbe ga yô, kwagh u kpilighyol er. Kwagh u lun er nomborusu nahan va tema hanma orhenen sha ityou, maa ve cii ve gba lamen ken ijô kposo kposo. Shi ihyuran iv ken iyou la poo, lu huran er ahumbe nga toron a tor nahan.

Mbavannya mba yange ve due ken ityar kposo kposo ve va ken Yerusalem la mba ungwan ihyuran la yô, ve yevese ve za hen iyou la ér vea za nenge kwagh u a lu zan hemen la. Mba za nyer her yô, kpiligh ve iyol tsung er mbahenen mbara lu lamen ken ijô i ve mbavannya yô. Tsô ve kaa ér: ‘Ior mban ka Mbagalilia. Man er nan ve fe u lamen ken ijô yasa?’

Tsô Peteru vea mbaapostoli mbagenev mough tile sha ishigh ki  ikpelaior la. Nahan Peteru pase ior mbara er yange i wua Yesu, kpa Yehova nder un shin ku yô. A kaa ér: ‘Hegen ne, Yesu ngu sha, a tema ken uwegh ku yanegh ku Aôndo, shi a haa icighan jijingi u yange tôndo zwa la sha a vese. Ka kwagh u a ne ve ne lu ungwan shi nengen uivande mban je la.’

Kwagh u Peteru ôr ne kôr ve ken ishima tsung, tsô ve pine ér: ‘Ka nyi i gbe u se ere?’ Peteru kaa a ve ér: ‘Gema nen asema sha asorabo a en, nahan i er ne batisema ken iti i Yesu. Shi ne ngohol iyua i icighan jijingi.’ Sha iyange la, i er ior batisema ngee je kuma er iorov 3,000 nahan. Hii shighe la je, iyenge i mbahenen gba seer ken Yerusalem fele fele. Yange icighan jijingi wase mbaapostoli ve ver iniongo i Kristu sha er vea fatyô u tesen mbahenen akaa a Yesu yange kaa ér ve eren la cii yô.