Wankwase ugen ken gar u Filipi yange lu a jijingi u azôv. Azôv yange eren tom a na u tsengan pasen ior akaa a ken hemen, nahan ior mba lu sha ikyev ve la zuan a inyaregh sha kwagh ne kpishi. Yange Paulu man Shila mba za nyôron ken Filipi yô, a dondo ve ijime ayange imôngo. Jijingi u azôv la na wankwase la ngor kaa ér: “Ior mban ka mbatomov mba Aôndo Uhembansha.” Tsô Paulu va kende kaa a jijingi u azôv la ér: ‘Due ken a na kera, ken iti i Yesu!’ Jijingi la maa due ken wankwase la kera.

Er ior mba wankwase ne va kav er i lu u vea kera zua a inyaregh sha a na ga yô, ishima vihi ve tsung. Nahan ve kôr Paulu man Shila ve yem a ve hen mbaajiriv, ve za kaa ér: ‘Ior mban mba peren tindi shi mba van a ayôôso ken gar ne cii!’ Tsô mbaajiriv mbara na zwa ér i gbidye Paulu man Shila shi i wuhe ve ken gaadi. Orkurangaadi la wuhe ve shin atô u gaadi, ape ime hemba wan la, shi mande ve agbe.

Ka va kuman ken atôutu yô, Paulu man Shila gba wan atsam wuese Yehova, ior mba ve lu vea ve ken gaadi la lu ungwan. Ica gbe ga yô, tar tenger je ukpekpe mba gaadi la tenger, hii sha zan zan va ar shin inya. Ihinda i gaadi la bugh sha agee, shi mshirim man agbe la poso kera. Orkurangaadi yevese nyôron shin atô u gaadi yô, a nenge ihinda la bugh. Nengen ér ior mba ken gaadi la cii yevese due yô, a tsua sanker ér una wua iyol na.

Kpa Paulu yila taver taver kaa ér: ‘De wuan iyol you ga! Se cii se mba heen!’ Tsô orkurangaadi la yevese za gba hen ishigh ki Paulu man Shila. A pine ve ér: “Me er nan man me wara?” Ve kaa a na ér: ‘We vea tsombor wou cii na nen Yesu jighjigh tsô ne war.’ Tsô Paulu man Shila pase ve mkaanem ma Yehova, nahan orkurangaadi vea tsombor na cii i er ve batisema.