Shighe u apostoli Yohane lu ken purusu ken icile i Patemo la, Yesu tese un mbampase mba sha mnenge 16, sha akaa a aa va er ken hemen yô, sha adondo adondo. Yohane lu nengen mbampase mban er ka fiim nahan. Mbampase mban tese er a va tsegha iti i Yehova, man er Tartor na ua va, kua er a gema eren ishima na shin tar, vough er i eren sha nahan yô.

Ken mpase u môm la, Yohane nenge Yehova tema sha ikyônough nagh ki torough ki engem sha, mbatamen 24 gema kase ki, ve hua akondo a pupuu, shi hanma ve nan cir idyer i tor i sha zenaria. Inyiar man idyuran lu duen ken ikyônough kira. Mbatamen mba 24 mbara gure sha ishigh ki Yehova ve lu civir un. Ken mpase ugen la di, Yohane nenge a zegeikpelaior lu civir Yehova. Lu mba ve due ken hanma ikyurior man hanma nongo, kua hanma zwa yô. Nahan Waniyôngo, u a lu Yesu la, lu kuran ve shi zan a ve hen mngerem ma umam. Shi i va tese Yohane mpase ugen, a nenge Yesu lu Tor shi hii u hemen sha vea mbatamen mba 24 mbara. Ken mpase u dondon sha ngura di, Yohane nenge i nôngo ityav sha, Yesu nôngo ityav a darakon, u a lu Satan la, kua azôv a na. Yesu daa ve kende shin tar.

 Tsô Yohane shi nenge mpase ugen u doon tsung er ka fiim nahan, a nenge Waniyôngo tile sha Uwo u Shion vea iorov 144,000 yô. Shi a nenge ortyom ugen lu purugh sha kwavaôndo ningir sha tar, ôron a ior ér ve cia Aôndo shi ve civir Un.

Tsô shi a nenge ken mpase ugen la i nôngo ityav mbi Armagedon. Ken ityav mbira, Yesu man ushoja nav lu hemban tar u bo, u Satan ne. Ken mpase u masetyô la di, Yohane nenge hanma or shin tar cii lu eren kwagh sha ishima i Aôndo vough er i eren sha nahan. Yehova tim Satan man mbadondon Satan cii vindi vindi. Hanma or sha man shin tar cii nan lu eren kwagh u tseghan iti i Yehova, shi nan lu civir un tseegh.