Loti yange lu vea Aberaham, anngô u ter na, ken tar u Kanaan. Ken masejime yô, Aberaham man Loti ve va ngee a ilev kpishi je ijiir i ilev vev yaan toho la hii u yinan ve. Tsô Aberaham kaa a Loti ér: ‘Me kera fatyô u lun ijiir i môm vea we ga. Sha nahan yô, tsua veghertar u u soo u lun her la cii, mo di me lu vegher ugen.’ Kwagh ne tese ér Aberaham lu or u wan iyol na ikyo tseegh ga, shin u nenge nahan ga?

Loti yange nenge a haregh ugen u doon ashe kpishi, ikyua a geri ugen, i yilan ér Sodom. Mngerem lu her kpishi shi toho hôm her tsembelee. Tsô Loti tsua ijiir la, maa mough a tsombor na yem ve za lu her.

Ior mba hen Sodom mbara man mba ve lu hen geri u Gomora, ikyua a Sodom la, wa dang je doo ga. Jighilii yô, ior mbara wa dang je Yehova kaa ér una tim ugeri mbara cii. Kpa Aôndo soo u waren Loti vea tsombor na, nahan a tindi mbatyomov nav uhar ve za ta ve icin ér: ‘Due nen ken geri ne kera! Er nen fefa! Gadia Yehova sôôn timin un.’

Kpa Loti due her ave ave ga. Lu eren zôzô. Nahan mbatyomov mbara kôr un sha uwe, kua kwase na man ônov nav mba kasev mba uhar mbara, ve due a ve ken geri la ayem, ve kaa a ve ér: ‘Yevese war nen! De gem nen ashe ijime ga. Ne gema ashe ijime yô, ne kpe!’

Mba za nyer hen geri ugen u i yilan un ér Soar la yô, Yehova er sulfur man usu due sha, haa sha Sodom man Gomora. Nahan ugeri mba uhar mban cii tim vindi vindi. Er kwase u Loti hemba Yehova ato, gema ashe  ijime yô, a hingir icebar! Kpa Loti man ônov nav mba kasev mba uhar mbara war sha ci u ve ungwa imo i Yehova. Shighe u kwase u Loti hemba Yehova ato la, yange a vihi ve dedoo. Kpa yange saan ve iyol sha ci u ve ungwa kwaghwan u Yehova.