Yehova yange tôndo zwa a Yakob ér una kura un vough er yange kura Aberaham man Isaka nahan. Yakob yem za lu hen ijiir igen, i yilan ijiir shon ér Haran. Yakob maa vôso kwase her, mar ônov kpishi shi hingir ornyar kpaa.

Ken masejime yô, Yehova kaa a Yakob ér: ‘Hide yem ken tar wou.’ Tsô Yakob mough vea tsombor na gba hiden ken tar na. Lu zende u tôôn ve ayange kpishi. Mbatomov mba Yakob va kohol un sha gbenda kaa a na ér: ‘Anngôu Isou ngu van, shi iorov 400 mba van vea na imôngo!’ Yange cier Yakob iyol ér Isou soo u va tan num sha a na kua tsombor na. Nahan a er msen hen Yehova ér: ‘Yimam sha ikyev i anngôm.’ Kpernan yô, Yakob tindi a iyua ér i za na Isou. A tindi a iyôngo kpishi kua ivo man ibua man urakumi man ujaki.

Sha iyange la tugh, Yakob lu tswen. Ica i gbe ga yô, a nenge a ortyom u Aôndo! Ortyom la maa sôr wav vea na. Ve nôngo wav zan zan sev puaa. Shin er Yakob vihi iyol nahan cii kpa, lumun ér ortyom la a ta un inya ga. Tsô ortyom la kaa a na ér: ‘Pasem m yem.’ Kpa Yakob kaa a na ér: ‘Me pase u ga, saa u verem doo doo.’

Zan zan tsô ortyom shon ver Yakob doo doo. Maa Yakob fa je ér Yehova una de ér Isou a er un kwaghbo ga.

Hen sev mbura je, Yakob ta ashe nenge Isou lu van a ior nav 400 ken ica. Yakob maa kar hemen, tsombor na lu van un ken  ijime. Za zough ashe sha Isou yô, a ngurum anngô na inya kwa taankaruhar. Isou maa yevese za ta sha anngô na kuve un. Tsô iorov mba uhar mba ve lu ngô môm ne cii gba vaan himen iyongo. U hen wer Yehova yange nenge kwagh u Yakob er sha zayol na ne nena?

Shighe kar yô, Isou hide yem hen ya na, Yakob kpa kar yem hen ijiir na. Ônov mba Yakob cii lu 12. Ve yô lu Ruben, Shimeon, Levi, Yuda, Dan, Nafetali, Gadi, Asher, Isakar, Sebulon, Yosev, man Benyamin. Yehova yange yima ior nav sha ikyev i wan u Yakob ugen, iti na ér Yosev. U fa gbenda u yange yima ve la kpa? De se nenge.