Farao yange ungwan ér Mbaiserael due ken Igipiti kera yô, fese je maa ishima na gema sha kwagh u un ne ve gbenda ve yem la. Tsô a yila shoja na, a kaa a ve ér: ‘Tôô nen akeke a am cii, wa nen iyol, se zenda nen ve ijime! Doo u ma se de ser ve yem nahan ga.’ Farao man ior nav maa gba zendan Mbaiserael ijime.

Yehova lu hemen ior nav gbenda atetan sha ibeenegh, a lu tugh yô, a hemen ve sha usu. Yange hemen ve za a ve hen kpe u Zegemnger u Nyian, za kaa a ve ér ve haa afo her.

Tsô Mbaiserael nenge Farao a shoja na lu zendan ve ijime van. Zegemnger gema lu ve ken hemen, nahan ape yevese zan lu ga. Tsô ve gba vaan a Mose kaan ér: ‘Se yô se kpe a kpe je! Ma u de ma se gbe lun ken Igipiti tsô.’ Kpa Mose kaa a ve ér: ‘De cie nen ga. Tile nen her, nenge nen er Yehova una yima se yô.’ Sha mimi yô, Mose yange na Yehova jighjigh, shin u nenge nahan ga?

Tsô Yehova kaa a Mbaiserael ér ve mough ve yem ken hemen. Hen tugh mbura, Yehova mough a ibeenegh ki lu hemen ve sha mi la, ki kar ki va tile hen atô u Mbaigipiti a Mbaiserael. Nahan ime wa vegher u Mbaigipiti la. Kpa vegher u Mbaiserael la yô, iwanger lu.

Yehova maa kaa a Mose ér a nalegh uwegh nagh sha zegemnger  la. Mose nalegh yô, Yehova er ahumbe a taver tsa toron tugh kaka. Zegemnger la maa uma hen atô, mngerem pav hingir keen man keen, gbenda due hen atô jighilii za asegh yande la. Mbaiserael umiliôn imôngo hungwa zende sha tareghnyaagh per yande la, mngerem lu ve ken yan kua ken imese er kpekpe nahan.

Tsô ikyumutya i Farao cir sha Mbaiserael, gba hungwan zan ve ijime shin atô u zegemnger la. Yehova maa nzughul a ikyumutya i Farao la. Akaver a akeke a ve la hii u tsuan kera. Ushoja mbara gba ngoron kaan ér: ‘Se yevese nen! Gadia Yehova ngu nôngon ityav sha ci ve.’

Yehova maa kaa a Mose ér: ‘Nalegh uwegh ou sha zegemnger.’ Mose nalegh yô, fese je maa mngerem mara hide doom her, uve a akumautya a Mbaigipiti cii. Farao kpe a ior nav cii. Or ve môm war ga.

Kpa yande la yô, zegeikpelaior lu wan icam wuese Aôndo, kaan ér: “Me wa icam me ter [Yehova], gadia A hemba tseer tseer; nyinya kua orhendan un kpaa, A haa ve shin zegemnger.” Er ior lu wan icam la, kasev di lu kuhwan angingav vinen amar. Saan hanma or cii iyol sha ci u ve fa ér hegen i due a ve mimi, ve kera mba ikpan ga.