Shighe u Yosev lu ken gaadi la, mnyam cier Farao, tor u Igipiti je or môm fatyô u pasen inja i ma ga. Orgen u shiren Farao kaa a na ér Yosev una fatyô u pasen un inja i mnyam mara. Fese je maa Farao tindi ér i za va a Yosev.

Yosev va nyôron yô, Farao pine un ér: ‘U fatyô u pasen mnyam am manaa?’ Yosev pase Farao mnyam mara kaa ér: ‘Kwaghyan una dumbur ken Igipiti anyom ataankarahar, anyom la aa been yô, ijen di ia mough a gba anyom ataankarahar. Yô, tsua orfankwagh nana ombo kwaghyan sha er ior ou vea kpe ijen ga yô.’ Farao gema kaa a na ér: ‘Yô m tsua u. U lu or u sha uhar u hemban lun a tahav ken Igipiti cii.’ Yange er nan ve Yosev fa inja i mnyam ma Farao maraa? Lu Yehova wase un ye.

Hii hen shighe la je, Yosev kohol kwaghyan zan zan anyom ataankarahar. Maa ijen gba sha tar cii, er Yosev vande kaan nahan. Ior lu moughon hanma ijiir cii va yamen kwaghyan hen Yosev. Ter na Yakob ungwa ér kwaghyan ngu ken Igipiti, nahan a tindi ônov nav mbagenev pue ken Igipiti ér ve za yam.

Ônov mba Yakob mbara za hen Yosev. Yosev za nengen a ve je maa kav ve. Kpa anngôôv nav mbara fa ér ka Yosev ga. Ve gure inya ve na un icivir, er yange mnyam vande cier un shighe u lu iyev la nahan. Yosev yange soo u fan aluer anngôôv nav mbara vea lu ior mba kôron or ihyom her yô. Nahan a kaa a ve ér: ‘Ne va u va keren ner ne fa akaa ase a ken myer. Ne soo u fan er tar wase u lu a tahav i kighir la.’ Ve kaa ér: ‘Ei. Se  mba anngôôv mba nomso 12 ken tar u Kanaan. Anngô wase u môm kpe, u masetyô la ngu vea ter wase.’ Yosev maa kaa a ve ér: ‘Za vam nen a anngô wen u masetyô la, tsô me na ne jighjigh.’ Tsô ve hide ve yem hen ter ve.

Kwaghyan shi been hen ya u Yakob yô, a shi a tindi ônov nav ken Igipiti. Kwa ne ve za a Benyamin, anngô ve u kiriki la imôngo. Yosev maa kar ve, gema kôôpu na u i er sha azurfa la wa ken iba kwaghyan i Benyamin, hide gba yôôn anngôôv nav mbara iv. Mbatomov mba Yosev mba za zough a kôôpu la ken iba i Benyamin yô, cier ve iyol kpishi. Ve zamber a Yosev ér a de Benyamin, a gema a tsaha ve mbagenev cii.

Kwagh ne na yô, Yosev nenge ér anngôôv nav gema inja. Yosev kera fatyô u kighir mliam ga. Maa a mindi mliam, a gba vaan kaan ér: ‘Ka mo anngô wen Yosev. Terem ngu uma here?’ Hide kpiligh anngôôv nav iyol tsung. Kpa a kaa a ve ér: ‘Ishima i de vihin ne sha kwagh u yange ne er a mo la ga. Ka Aôndo yange tindim heen sha u m va war uma wen ye. Nahan yô, za fese za kua nen a terem va nen a na heen.’

Yange ve yem ve za ôr ter ve loho u dedoo la shi ve va a na ken Igipiti. Yosev man ter na hide lu imôngo, zum u anyom kar kpishi yô.