Yange Mbaiserael tsa ken deserti ayange nga karen yô, Koraki, Datan man Abiram, kua iorov mbagenev 250 va mough ayôôso a Mose man Aron. Ve kaa a Mose man Aron ér: ‘De kera hemen nen se ga! Ityôkyaa ngi i we Mose u lu orhemen wase, Aron di una lu pristi u tamen ga. Yehova ngu a hanmô wase cii, ka ne tseegh ga.’ Kwagh ne yange doo Yehova ga. Yehova nenge ér ka un jighilii je ve lu hendan a na ye!

Mose gema kaa a Koraki vea ior nav cii ér: ‘Kper yô, va nen hen tabernakel heen. Ne vaan yô, haa nen usu shin ugbande enev mba nanden kwaghhumandoon, shi haa nen kwaghhumandoon sha mi, va nen a mi. Nahan Yehova una tese se or u a tsua yô.’

Kpernan maa Koraki kua iorov mba 250 mbara za hen tabernakel, er Mose ôr ve nahan. Ve za nande kwaghhumandoon inja er ve mba upristi nahan. Yehova maa kaa a Mose man Aron ér: ‘Kar nen hen ape Koraki a ior nav ve lu ne kera.’

Koraki yange za hen tabernakel ape Mose lu la, kpa Datan man Abiram vea icombor ve cii ve venda u zan. Nahan kpa, Yehova kaa a Mbaiserael ér ve kar ikyua a utenti mba Koraki man Datan  kua Abiram kera. Fese je Mbaiserael kar kera. Datan man Abiram kua icombor ve gema due ken utenti vev tile ken won. Ica i gbe ga yô, inya pav, ve cii ve haa shimi, inya hide cir her! Hen tabernakel di usu sen sha va hia Koraki kua iorov mba 250 mbara cii.

Yehova maa kaa a Mose ér: ‘Hanma kwe u Iserael yô, ngohol gbough ku or u nan lu hemen u la, nger iti i nan sha mi. Kpa gbough ku orhemen u kwe u Levi la yô, nger iti i Aron sha mi. Gema i cii ver ken tabernakel, nahan or u gbough ku nan kua kpar ufaluwa sha mi la yô, ka nan m tsua ye.’

Kpernan maa Mose za tôô igbough shon due a mi va tese mbahemen mba lu igbough ve la. Gbough ku Aron kpar faluwa, shi lu a atam a kon u amondi a vian sha mi. Kwagh ne eren nahan yô, Yehova tese ér un tsua Aron ér a lu pristi u tamen.