Yange Mbaiserael mba duen ken Igipiti iwer ihiar ngi karen yô, ve va nyôr hen Uwo u Senai, maa ve haa afo her. Tsô Yehova yila Mose sha uwo la, nahan Mose unde za. Yehova za kaa a na ér: ‘M yima Mbaiserael. Nahan aluer mba ungwan imo yam shi mba kuran atindi am kpaa yô, vea hingir ior av.’ Tsô Mose hungwa sha uwo va ôr Mbaiserael kwagh u Yehova kaa ne. Nahan Mbaiserael di kaa ér nyi? Ve kaa ér: ‘Se er hanma kwagh u Yehova a kaa ér se er cii.’

Mose hide za sha uwo la. Yehova za kaa a na ér: ‘Ayange atar aa karen yô, me lam a we. Hide za ta ior icin wer ma or a de ve ikyua a Uwo u Senai ga.’ Tsô Mose hungwa shin inya va ôr Mbaiserael ér ve wa iyol, gba u Yehova una lam a ve.

Ayange atar nga karen yô, Mbaiserael nenge inyiar man mnyim lu duen sha uwo la. Shi ve ungwa idyuran shi i lu tôngon korough sha mi kpaa. Maa Yehova sen va sha uwo la ken usu. Kwagh ne cier Mbaiserael iyol je ve lu kunden ikyarkyase. Yange uwo la lu tenger sha agee shi uwo shon cii lu duen mnyim. Shi korough kura lu taver imo seer a seer.

Tsô Aôndo kaa a ve ér: ‘Ka mo Yehova. De civir nen mbaaôndo mbagenev ga.’

Mose yange hide shi za sha uwo la, maa Yehova za na un atindi a tesen ior mbara er vea civir Un shi vea eren kwagh ken uma ve yô. Mose nger atindi shon, va ôr Mbaiserael ungwa. Maa ve tôndo zwa ér: ‘Se er hanma kwagh u Yehova a kaa ér se se er cii.’ Ka mimi, yange ve tôndo zwa a Aôndo. Kpa ve er kwagh u ve tôndo zwa u eren la je he?