Pristi u Tamen Eli yange lu a ônov mba nomso uhar, u môm la iti na ér Hofeni, ugen la di iti na ér Pinehashi. Ve cii yange ve eren tom u pristi ken tabernakel. Kpa yange ve kura atindi a Yehova ga, shi ve lu eren a ior dang dang. Mbaiserael yange vea va a nagh ku nan Yehova yô, Hofeni man Pinehashi ve ngohol ci-inyam i hemban doon la ve za ya. Eli yange ungwa kwagh u ônov nav mba nomso mbara lu eren la, kpa er kwagh sha mi ga. Yehova una de ér ve za hemen u eren kwagh laa?

Hofeni man Pinehashi yange ve lu tamen a Samuel ica je. Nahan kpa, Samuel u lu wanye u cuku la dondo ieren ve la ga. Nahan doo Yehova a Samuel. Tugh mbugen la Samuel lu yaven, maa va ungwa or yila iti na. Samuel maa mough, yevese za hen Eli, za kaa a na ér: ‘M va ve!’ Kpa Eli kaa a na ér: ‘M yila u ga. Hide za yav.’ Tsô Samuel hide za yav. Shi Samuel va ungwa or yila iti na. Samuel ungwan mba yilan iti na ka kuman kwa tar yô, Eli maa kav er i lu Yehova a lu yilan Samuel yô. Nahan Eli kaa a Samuel ér aluer i va yila iti na kwagen yô, a kaa ér: ‘Gba ôron kwagh tsô, Yehova. Wanye wou ngu ungwan.’

Tsô Samuel hide za yav. Ica i gbe ga yô, a ungwa i yila iti na ér: ‘Samuel! Samuel!’ Samuel maa kaa ér: ‘Gba ôron kwagh tsô, wanye wou  ngu ungwan.’ Yehova kaa a na ér: ‘Za kaa Eli wer m ngu tsahan un kua tsombor na cii. A fa dedoo er ônov nav ve lu eren akaa a dang hen tabernakel yô, kpa a er kwagh môm sha mi ga.’ Tsô kpernan pepe Samuel za bugh ihinda i tabernakel, er vanden eren nahan. Kpa cier Samuel iyol u ôron Eli, pristi u tamen la kwagh u Yehova kaa la. Kpa Eli tindi i za kaa Samuel, ve yô, Eli pine un ér: ‘Wan wam, Yehova kaa a we ér nyi? Ôrom hanma kwagh.’ Tsô Samuel ôr Eli hanma kwagh cii.

Er Samuel lu vesen la, Yehova za hemen u tesen un kwagh u una er yô. Nahan Mbaiserael cii fa er Yehova tsua Samuel ér a lu profeti man orjir yô. Yange ior fa kwagh ne ken tar u Iserael cii.