ITYOUGH 55
Ortyom u Yehova Yange Kura Hesekia
Tar u Ashiria yange u hemba tahav sha tar cii. Yange tar shon ngohol tar u Iserael u ikwe pue la kpaa, lu hemen u. Shi tor u Ashiria soo u ngohol tar u Yuda, u ikwe i Iserael i ihiar la kpaa. Iti i tor shon ér Senakeribi. Yange hii u ngohol ugeri mba ken tar u Yuda môm môm. Kpa geri u yange hemba soon u ngohol cii yô, lu Yerusalem. Yehova gema lu kuran Yerusalem, kpa Senakeribi fa ga.
Hen shighe ne, Hesekia lu tor u tar u Yuda. Yange na Senakeribi inyaregh kpishi ér a de ngohol Yerusalem ga. Senakeribi ngohol inyaregh kira, kpa shi tindi ushoja nav kpishi ér ve va ta ityav sha Yerusalem. Shoja i Ashiria va zurum a Yerusalem yô, cier ior mba ken Yerusalem iyol kpishi. Nahan Hesekia kaa a ve ér: ‘De cian nen ga. Mbaashiria mba a tahav, kpa Yehova una wase se se hemba ve tahav.’
Senakeribi yange tindi orgen ken Yerusalem ér a za ta ior mba ken geri la mciem iyol. Iti i or shon ér Rabeshake. Yange Rabeshake za ken Yerusalem kpa nyôr ken atô u geri la ga, a tile ken hua, a genger imo a kaa ér: ‘Yehova una fatyô u wasen ne ga. Hesekia a de bumen ne ga. Ma aôndo ngu u waren ne sha ikyev yase ga.’
Tsô Hesekia pine Yehova kwagh u una er yô. Yehova kaa a na ér: ‘Kwagh u Rabeshake a kaa la a de cier we iyol ga. Senakeribi una ngohol Yerusalem ga.’ Senakeribi shi tindi Hesekia a uwashika mbagenev. A kaa ken uwashika mbara ér: ‘De nyoon iyol ga. Yehova una fatyô u yiman we ga.’ Tsô Hesekia er msen kaa ér: ‘Yehova, wea lumun yô yima se, sha er ior cii vea fa er i lu we tseegh u lu Aôndo u mimi yô.’ Yehova kaa a na ér: ‘Tor u Ashiria una nyôr Yerusalem ga. Me kura geri wam.’
Senakeribi yange na jighjigh ér ica ia kera gba ga tsô Yerusalem una hingir geri na. Yange shoja i Ashiria haa afo ikyua ikyua a geri u Yerusalem. Kpa Yehova tindi ortyom na her tugh. Hen tugh mbura tseegh, ortyom la wua ushoja mbara 185,000! Nahan ushoja mba Tor Senakeribi mba yange ve hemba taver agee mbara cii kpe. Ityav mbira maa hemba Senakeribi, kera lu a kwagh u eren ga. Tsô a hide a yem ken tar na. Yehova yange kura Hesekia kua Yerusalem, vough er tôndo zwa nahan. Yange wea lu ken Yerusalem hen shighe la nahan, ma u suur sha Yehova kpa?
“Ortyom u [Yehova] ka a haa afo a wa mbacian Un atô, a yima ve kpaa.”—Pasalmi 34:7
Kwagh Ugen u Alaghga Shi Una Doo U Yô
UKAADE MBA PASEN KWAGH U IOR MBA KEN BIBILO
Kaade u Bibilo u A Er Kwagh u Hesekia Yô
Yehova yange seer ayange a uma u Hesekia sha anyom a me? Gber kaade u Bibilo ne, nahan ôr fa.
