TÔÔ wer wanyekwase nan kaa a ngô u nan ér: “A duen a due makeranta nahan, me hide ken ya.” Kpa mba dugh makeranta yô, nan teregh iniumbe vea azende a nan, nan va hidi yô, nan kaa a ngô u nan ér: “Ka tica wam a timbir mo ve m shi ken makeranta nahan ye.” Aluer nan ôr kwagh nahan, a lu sha mi kpa?

Shin alaghga wanyenomso nan kaa a ter u nan ér: “Ei, ka mo m gbidi bol a nyer ken iyou ga.” Kpa aluer mimi je ka nan nan gbidi bol shon ye? U tunan ér ka nan ga la, a lu sha mi kpa?

Ortesen Uhemban tese se kwagh u í doo u se er yô. Á kaa ér: ‘“Een” wen a̱ lu “een” heregh, man “ei” wen kpaa, a̱ lu “ei” heregh. Kwagh u una seer sha mban yô, ka u a dugh ken ifer je la.’ (Mateu 5:37) Yesu yange lu kaan ér nyi?— Yange lu kaan ér kwagh u se kaa ser se er yô, se̱ er un di nahan.

 Bibilo ôr kwagh ugen u tesen er i í hii ve, i hembe doon u se ôron kwagh sha mimi yô. Ka kwagh u iorov mbagenev uhar mba yange ve senge ér ve mbá mbadondon Yesu yô. De se nenge kwagh u yange er la.

Shighe u Yesu kpe lu a̱ tsa i kuma iwer ihiar ga la, ior mough sha ajiir wue wue va ken Yerusalem u va eren iniongo i Mbayuda i vesen i̱ í yilan ér Pentekosti la. Apostoli Peteru na kwaghôron u sagher iyol kpishi, ôr ior kwagh u Yesu shon u Yehova nder un shin ku la. Lu hiin je ior mbagen kpishi mba ve va ken Yerusalem ve hii fan kwagh u Yesu je la. Nahan ve soo u seer ungwan. Tsô ve er nyi?

Ve tsa hemba ayange a ma ve tsa la. Kpa shighe karen yô, inyaregh vev bee, nahan gba u a wase ve ve, vea yam kwaghyan ye. Mbahenen mba ken Yerusalem soo u wasen mbavannya mbara. Nahan mbagenev ken a ve kpishi tee akaa ve, va a inyaregh hen mbaapostoli mba Yesu. Mbaapostoli mbara gema inyaregh kira na mba ve lu ken ibanave la.

Anania vea kwase na Safira mba ve kpa ve lu ken tiônnongo u Kristu u ken Yerusalem la kpaa, ve tee sule ve. Or môm kpa kighir  ve ér ve̱ tee ú ga. Ve tsua a ishima ve u eren kwagh ne. Kpa ve er kwagh ne sha ci u mbahenen mba Yesu mba hev mbara doo ve shima yum ga. Sha jighilii yô, Anania man Safira soo ér vea er kwagh, ior ve̱ hen ér ve mba ior mba fankwagh, kpa sha kpôô yô ve lu nahan ga. Nahan ve wa ken ishima ér vea kaa ér ve mba geman inyaregh kira cii nan sha ci u i̱ wase mbagenev yô. Kpa sha jighilii yô ve lu nan inyaregh kira cii ga, kpa ve kaa ér ve na ki cii. Ú nenge imba ieren ne nena?

Anania maa va u va nengen a mbaapostoli mbara. Á na ve inyaregh kira. Kpa Aôndo ti yô tsenga fan kera er á lu nan inyaregh kira cii ga yô. Nahan Aôndo pase Peteru ér Anania ngu tsughun ve a tsuu.

Tsô Peteru kaa ér: ‘Anania, er nan u ne Satan ian á ne, ú er kwagh nahana? Sule la lu u wou. Yange ma u tee u ga. Shin er yange ú tee u kera nahan kpa, mase shin ishima you u tsuan kwagh u ú er a inyaregh kira yô. Kpa er nan ve ú pande inyaregh kira ú yer man ú lu eren inja er ú ngu nan ki ciili? Sha nahan yô ú ngu eren aie, ka hen a vese tseegh ga, kpa ka hen Aôndo kpaa.’

Nenge imba kwaghbo ne sha wono. Anania lu eren aie! Ôr kwagh gen kposo, gema lu eren kwagh ugen kposo. Á kpen kaan ér un ngu eren kwagh shon. Kpa Bibilo ôr se kwagh ugen u gema er yô. I̱ kaa ér: ‘Anania ongo akaaôron a Peteru la yô, a gbidye inya, maa a kpe.’  Lu Aôndo je wua Anania ye! I mase tôôn ikyom na i due a mi ken won, i za ii.

Ahwa nga karen er atar nahan yô, Safira maa va nyôr. Kpa fa kwagh u er nom na la ga. Nahan Peteru pine un ér: ‘Ka inyaregh ki ne tee sule je ne né se ne he?’

Safira kaa ér: ‘Een, ka inyaregh ki se tee sule shon vough je la.’ Kpa lu aie er ye! Ve pande inyaregh ki ve tee sule shon a mi la ve yer. Nahan Aôndo wua Safira kpaa.—Aerenakaa 5:1-11.

Kwagh u yange er Anania man Safira la tese se nyi?— Kwagh la tese se ér Aôndo soo mbaaie mba eren ga. Á soo ér se̱ ôron kwagh sha mimi hanma shighe cii. Kpa ior mbagenev kpishi ka ve kaa ér u eren aie ka kwaghbo ga. Ú hen wer ior mba ka ve ôr kwagh nahan la ka ve ôr i lu shami he?— Ú fa er i lu aie u eren yange va a angev man mnyoon man ku shin tar kpa?

Umbur wer, Diabolo yange tsugh Ifa, kwase u hiihii la. A kaa a na ér aluer á hemba Aôndo ato á ya ityamegh ki kon ki Aôndo wa un tindi ér a̱ de ye ga la kpa, una kpe ga. Ifa lumun a kwagh u Diabolo ôr un la, maa ya ityamegh ki kon shon je. Shi kumbur a Adam kpii tsô, un kpaa ya ki. Nahan ve hingir mbaasorabo, shi hingir u mbayev mba vea mar la cii kpa vea hingir mbaasorabo. Er ônov mba Adam cii lu mbaasorabo yô, hingir u vea ya ican, vea kpe kpaa. Zayol ne cii yange hii nena?— Hii sha aie u eren.

Kape i lu ve Yesu yange kaa ér Diabolo, “ka or u aie shi ka ter u aie kpaa” je la! Lu un hii aie u eren ye. Shighe u or nan lu eren aie yô, nan ngu eren kwagh u yange Diabolo hii eren la. Shighe u imeen i ve se ken ishima u eren a aie yô, doo u  se hen sha kwagh ne.—Yohane 8:44.

Ka hanma shighe nahan imeen ia va ú ken ishima u eren aie?— Ka shighe u ú er kwaghbo la gaa?— Shin aluer ú wa ishima u eren kwaghbo ga je kpaa, alaghga ú vihi ma kwagh. Aluer i va pine ú kwagh sha mi yô, doo u ú kaa wer ka anmgbian wou u nomso shin u kwase ugen nan vihi kwagh shon yee? Shin ú er inja er ú fa kwagh u a ne ve kwagh shon a er tsô kpaa ga?

Aluer i na ú tom ér u̱ za er ken ya, kpa ú er ú ú bee ga di ye? Aluer ú er ú ú bee ga nahan, doo u ú kaa wer ú er ú cii ú bee?— Doo u se umbur Anania man Safira. Yange ve ôr hanma kwagh cii sha mimi ga. Man Aôndo wua ve sha u tesen er u eren aie i lu kwaghbo yô.

Nahan aluer ka nyityô kwagh je se er man se ôr sha mimi ga shin se ôr mimi vindi vindi ga yô, se mba seer a seer kwaghbo sha kwaghbo. Bibilo kaa ér: “Dugh nen aie kera.” Shi i̱ kaa ér: “De eren nen aie hen ayol a en ga.” Yehova er kwagh sha mimi hanma shighe cii, shi á soo ér se kpaa se̱ eren nahan.—Mbaefese 4:25; Mbakolose 3:9.