I LU nahan or kaa ér u̱ er kwagh u a lu u bo vee?— Yange nan ta hwande a we ve ú er kwagh shon ye shinii? Shin yange nan kaa ér kwagh shon doo u eren, shi wea er kwagh shon kpa a lu kwaghbo ga?— Or ka nana er kwagh a vese nahan yô, nan ngu meen se.

Aluer or ngu meen se yô, kanyi i doo u se eree? Doo u se yina ishima se er kwaghbo shinii?— Aluer se er nahan yô, a doo Yehova Aôndo ga. Kpa ú fa or u a gema a saan nan iyol kpa?— Een, ka Satan Diabolo a saan un iyol ye.

Satan ka orihyom u Aôndo, shi ka orihyom wase kpaa. Se fatyô u nengen a na ga sha ci u un ka jijingi. Kpa un yô, una fatyô u nengen a vese. Iyange igen yô, Diabolo ôr kwagh a Yesu, Ortesen Uhemban la, shi nôngo ér una mee un. De se tôv se fa kwagh u Yesu yange er la. Nahan se fa kwagh u i doo u a mee se ve, se er yô.

Yesu yange á soo u eren ishima i Aôndo hanma shighe cii. Yange tese kwagh ne ken igbar shighe u i er un batisema shin Ifi u Yordan la. Lu shighe u Yesu er batisema fee fee la je, Satan nongo ér una mee Un ye. Bibilo kaa ér, ‘i bugh Sha’ sha ci u Yesu. (Mateu 3:16) Kwagh ne inja na yô, alaghga lu shighe la Yesu hii u umbur han­ma kwagh u ken uma na u vande lun sha vea Aôndo la ye.

Yesu yange eren batisema been yô, maa yem ken taaikyôngo sha u una za hen sha akaa a yange hii u umbur la. A za tsa ker zan zan ayange akunduahar man  aime akunduahar. Sha iaven ne cii Yesu ya kwagh môm tsô kpaa ga, nahan ijen kôr un hen shighe ne tsung. Lu sha shighe shon u Satan va ér una va mee Yesu je ne.

Diabolo kaa a na ér: “Aluer Wea lu Wan u Aôndo je yô, kaa awen ne a̱ hingir bredi.” Nenge er bredi yange ma nyoho yan sha wono! Kpa yange Yesu ma fatyô u geman awen hingir bredi je kpa?— Een, yange ma fatyô. Sha ci u nyi? Ityôkyaa yô Yesu, lu Wan u Aôndo, shi lu a agee je ma orgen nan lu a mi imba la ga.

Luun er ka we Diabolo yange una kaa ér u̱ gema iwen i̱ hingir bredi nahan, yange ma ú gema kpa?— Nenge ase yô, ijen lu kôron Yesu. Nahan yange una gem iwen ia hingir bredi kwa môm tseegh nahan kpa, ma lu sha mi gaa?— Yesu yange fa je wener u eren tahav nav sha imba gbenda ngira nahan la, á lu sha mi ga. Yehova yange na un agee la ér a̱ wase ior ve̱ kporom hen Aôndo, lu sha u a̱ gema a̱ keren mtsera sha iyol na ga.

Nahan Yesu gema ôr Satan kwagh u i nger ken Bibilo la, á kaa ér: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.” Yesu yange fa dedoo je ér u eren ishima i Yehova la hemba kan a inja a u zuan a kwaghyan.

Kpa Diabolo de ga shi kimbir meen un. A yem a Yesu ken Yerusalem á za unde a na  sha ijiir i taven tsung sha ityough ki tempel. Satan maa kaa a na ér: ‘Aluer Wea lu Wan u Aôndo yô, tsue ase va gba shin inya, gadia i nger ér: Mbatyomov mba Aôndo vea yima ú, sha er ú vihi iyol ga yô.’

Er nan ve yange Satan ôr kwagh nee?— Yange ôr kwagh ne sha u una mee Yesu, a̱ er kwagh u ibume yô. Kwa ne kpaa Yesu ungwa imo i Satan ga. Kpa gema kaa á Satan ér: “I shi i nger er: De karen Ter, Aôndo wou, ga.” Yesu yange fa je ér aluer un ngu wan uma na ikyo ga sha apera yô, una lu karen Yehova, nahan a lu sha mi ga.

Kpa, Satan de ga. A shi a za unde a Yesu sha uwo u taven tsung. Za til sha mi yô, a tese un ityartor, shin ugomoti mba shin tar ne cica cii, kua iengem ve. Satan gema kaa a Yesu ér: “Akaa ne cii me na U, aluer Wea gure inya, Wea civir mo yô.”

Hen ase sha kwagh u Diabolo lu nan Yesu la yôô. Sha mimi yô, ityartor shin ugomoti mba uumace mban cii mba sha ikyev i Satanaa?— Yesu yange tuna kwagh u Satan kaa ér mba sha ikyev na la ga. Yange vea lu sha ikyev i Satan ga yô, Yesu yange ma tuna kwaghôron u Satan la. Sha mimi yô, ka Satan a lu tor u akuraior a shin tar ne cii ye. Bibilo kpa yila un ér “tor u tar ne.”—Yohane 12:31.

Aluer Diabolo kaa ér u̱ civir un, una na ú kwagh nahan, ú er nena?— Yesu yange fa dedoo ér aluer un civir Diabolo yô, un er kwaghbo, shin aluer ka nyityô kwagh je Una zua a mi kpaa. Nahan Yesu kaa a na ér: ‘Yem kera, Satan, gadia í kaa ken Bibilo ér ka Ter, Aôndo wou, tseegh u̱ civir ye.’—Mateu 4:1-10; Luka 4:1-13.

Se kpaa se mba tagher a ameen. Ú fa ameen shon agen kpa?— Nenge ase imeen i môm. Alaghga ngô ú una kange akpekpa una nyoho yan kpen kpen, shin una jiidi inyam ia nyoho tsung. Una kaa ér u̱ de dughun u̱ ye ga, zan zan saa shighe u yan kwaghyan una va kuma ve. Kpa alaghga ijen ia lu kôron we tsung, nahan a sar ú u ma ú dugh anivur ma ú ye. Nahan ú ungwa imo i ngô ú kpa?— Satan soo ér u̱ hemba ngô ú ato.

Umbur kwagh u Yesu la. Un kpa yange ijen kôr un kpen kpen. Kpa yange fa ér u eren ishima i Aôndo la hemba kan kwagh u injaa a kwaghyan.  We kpa aluer ú er kwagh u ngô ú a kaa ér u̱ er la yô, ú lu tesen wer ú ngu er Yesu nahan.

Shin, alaghga mbayev mbagenev vea kaa ér u̱ mena asange a ciigh. Alaghga vea kaa ér aluer ú mena icigh ki shon yô, á kundu ú iyol, ú kera cian kwagh kpaa ga. Kpa alaghga asange a ciigh ne a lu a bo. Aa na ú gba zege uange, shin aa fatyô u wuan we je kpaa. Shin alaghga orgen nana na ú taav, nana gema a wa icigh ki bough ken taav shon, maa nana ta hwande a we ér u̱ cihi u̱ ma ase. Nahan ú  er nena?—

Umbur kwagh u Yesu la. Satan yange nôngo ér una na Yesu a̱ ta uma na kera, a kaa a na ér a̱ tsue sha ityough ki tempel a̱ va gba shin inya. Kpa Yesu venda er nahan ga. Nahan aluer or sue kwagh a we ér u̱ cihi u̱ er kwagh u una vihi ú iyol yô, ú er nena?— Yesu yange ungwa Satan her ga. Kape or nana kaa ér u̱ er kwaghbo kpa, mayange de ongo nan her ga je la.

Alaghga iyange igen or nana kaa ér u̱ civir ma eev, man ka kwagh u Bibilo i̱ kaa ér mayange se̱ de eren ga yô. (Ekesodu 20:4, 5) Alaghga a gba u civir eev mbura shighe u i lu eren iniongo sha makeranta yô. Shi, alaghga a kaa a we ér aluer ú venda u civir mbu yô, a zenda ú ken makeranta kera. Nahan ú er nena?

Hanma or ka nana eren kwagh u a lu u vough yô, ka taver u we kpa dondon ve eren kwagh shon ga. Kpa mbagenev ka vea nôngon ér vea kighir se, se̱ er kwaghbo yô, ka i taver kpishi u eren kwagh u a lu u vough yô. Alaghga vea kaa ér kwagh u ve lu eren la ka kwaghbo kpee ga. Kpa doo u se pine mpin u vesen ne ser, Aôndo ôr sha kwagh shon ér nyi? Hanma kwagh cii ka Un a hembe fan ye.

Nahan aluer ior mbagenev ôr nyityô kwagh kpa, mayange kwagh u Aôndo a kaa ér ka u bo yô, se kpa se er ga. Aluer se mba eren nahan yô, se na a saan Aôndo iyol hanma shighe cii, nahan se kera er ishima i Diabolo mayange ga.