ASHIGHE agen Yehova ka a er kwagh sha gbenda u kpilighyol sha er una kura mbayev mbakiriki mba vea fatyô u kuran ayol a ve ga la. Aluer ú za ken ikyôngo yô, alaghga ú nenge gbenda u Yehova a eren kwagh ne yô. Kpa, alaghga sha hiihii la ú kav kwagh u a lu zan hemen la tsembelee ga.

Ú nenge annyon purugh va gba hen inya ikyua a we. Ngu inja er á vihi iyol nahan. A shir kperegh môm zumbe zumbe, kpa ka wea kporom ikyua a na yô, a gba kperan ku inya yemen. Ú dondo un ijime ú ngu yemen, ngu ú ken hemen, kpa a za ica ga. Ica i gbe ga yô, annyon ti maa purugh kwa môm kpoo, yem je. Kwagh môm er kperegh nagh kura ga! Ú fa kwagh u annyon shon shen á lu eren kpa?

Ijiir i annyon la shen a va gbe hen inya la, ônov nav ve lu ken toho ca ga. Nahan ngô inyon la lu cian ér, alaghga ú va fa ape ônov nav ve lu la, nahan ú kura un ônov. Ka nahan ve á er ayom ér un vihi iyol, a mee ú a kar a we ape ônov nav ve lu la kera ye. Ú fa or u nana kura se er ngô inyon ka a kura ônov nav nahan kpa?— Ken Bibilo  yô, í tôô Yehova í kar sha inyon i̱ í yer ér iguve la, iguve ka i̱ wase ônov mba i̱ kpishi.—Duteronomi 32:11, 12.

Wan u Yehova u a hembe doon un ishima cii yô ka Yesu, Wan na u ishima ishima la. Shighe u Yesu lu sha la, lu jijingi u lun a agee, di er Ter na nahan. Kuren ugbayol nav iyol na. Kpa mba va maren Yesu shin tar hingir wanikyundan yô, kera lu u una fatyô u eren ma kwagh iyol na ga. Gba u a kuran un a kura.

Cii man Yesu una er kwagh u Aôndo wa ishima ér a̱ er la, una kure un kpaa yô, gba u saa una vese a hingir igyandenor, una lu vough kpaa. Kpa, Satan nôngo ér una wua Yesu, a̱ de aren sha iaven la ga. Igbenda i Satan yange nôngo ér una wua Yesu shighe u lu ankyundan la, man igbenda i Yehova yange gema kura un la, ka kwagh u doon u ungwan kpen kpen. Ú soo u ungwanaa?

Yange i mar Yesu ica lu a̱ gba ga tsô, Satan na kwagh due sha kwavaôndo vegher u sha Ityoughkitaregh la, lu er ka ishan nahan. Ior mba kpehen ishor sha asan maa dondo ishan la ijime, ve dondo i̱ umai deri  imôngo, ve za nyôr ken Yerusalem. Maa ve pine hen ape i gbe u á mar tor u Mbayuda la yô. Mbá pin ior mba ve vande fan kwagh u í nger ken Bibilo sha kwagh ne yô, ve kaa je ér: “Ka ken Betelehem.”—Mateu 2:1-6.

Zum u Herode, tor u wan ifer u lu ken Yerusalem la ungwa ér i sember maren tor u he ken gar u Betelehem ikyua ikyua yô, á kaa a mbakpehen ishor sha asan mbara ér: ‘Za ker nen Wanikundan la doo doo; nea zua a Na yô, va ôrom nen.’ Ú fa er i hii ve Herode yange soo ér una fa ape Yesu a lu kpa?— Lu sha ci u ishima nyian Herode, nahan a soo ér una wua un kera!

Aôndo gema kura Wan na nena?— Mbakpehen ishor sha asan mbara mba za zough a Yesu yô, ve na un uiyua. Ken masejime yô, Aôndo ta mbakpehen ishor sha asan mbara icin ken mnya ér ve̱ de hidi hen Herode ga. Nahan ve kar gbenda ugen ve hide ve yem ken tar ve, ve kera kar ken Yerusalem ga. Herode za ongo ér mbakpehen ishor sha asan mbara yem yô, ishima vihi un ker je gande. Nahan er Herode soo ér saa una wua Yesu keng yô, a wa tindi ér i̱ wua anikyundanev mba nomso mba ken Betelehem mba ve yen anyom ahar cii! Kpa hen shighe ne nahan, Yesu kera lu ken Betelehem ga.

Ú fa er Yesu yange er ve, war kpa?— Yange mbakpehen ishor sha asan mbara mba hidi mba yemen ken tar ve yô, Yehova ta Yosev nom u Maria la icin ér a̱ yevese a̱ yem ca, a̱ za lu ken tar u Igipiti. Kape yange Yesu za lu ve, war sha ikyev i iferor Herode je la. Anyom nga karen, Maria man Yosev mba moughon a Yesu ken Igipiti mba hidi yô, Aôndo shi ta Yosev icin igen. Á kaa na ken mnya ér a̱ mough a̱ yem ken Nasareti, ka ker Yesu  una lu ve, kwagh a er un ga ye.—Mateu 2:7-23.

Ú nenge er Yehova yange kura Wan na kpa?— Nahan ú hen wer ka an nan lu er ônov mba inyonov mba ngô ve a yer ve ken toho nahana, shin nan lu er Yesu lu ankyundan ve lu la nahana? Ú ngu er ve nahan gaa?— We kpa ior mbagen soo u buran we. Ú fa ve kpa?

Bibilo kaa ér Satan ngu er ka begha u tan kume u a soo ér una ya se nahan. Shi, er begha ka a keren annyamev mba kiriki ér una kôr nahan, kape Satan man azôv na kpa ka ve keren mbayev mbakiriki ér vea kôr je la. (1 Peteru 5:8) Kpa Yehova taver agee hemba Satan. Yehova una kura mbayev nav shi una bee a hanma kwaghbo u Satan a er ve cii kera.

Úumbur kwagh u í vande ôron ken Ityough ki sha 10 ken takerada ne ér Diabolo man azôv na ka ve mee se ér se̱ er la kpa?— Een, ka ve mee se ér se̱ yav a kwase sha gbenda u Aôndo a kaa ér ka kwagh u bo la. Kpa ka unô ior tseegh i doo u vea yav a kwasa?— Ka mbaganden, nomsoor vea kwase u nan vese la.

Kpa, kwagh ka a er i vihi yô, mbaganden mbagenev ka ve soo u yaven a mbayev mbakiriki. Ka vea er a mbayev nahan yô, mbayevnomso man mbayevkasev mban maa ve hii u eren akaabo a ve hen hen mbaganden mban ne. Shi ve gba eren a alegh ve a hen ikyum la sha gbenda u i doo u vea eren a á ga yô. Ka kwagh u ngise er ken gar u Sodom je la. Bibilo kaa ér ior mba hen ijiir la cica cii, hii sha ‘mbayev mbakiriki kua mbatamen’ kpaa cii, ve lu nôngon ér vea yav a mbavannya mba Loti.—Genese 19:4, 5.

Sha nahan yô, er Yesu kpa yange i kura un nahan, we kpa gba u a kura ú sha ikyev i mbaganden—kua mbayev mbakiriki mbagenev mba alaghga vea mee ú ér vea yav a we yô. Ambaaior ne aa er inja er mba azende ou nahan. Alaghga je yô vea na ú kwagh, vea kaa ér u̱ bum wer, mayange ú ôr or môm kwagh u vea er a we la ga. Kpa ior mban mba er Satan man azôv na nahan, ka mtsera ve tseegh ve keren ye, shi mba keren msaanyol  ve ayol a ve tseegh. Nahan ka ve nôngo ér vea zua a msaanyol ve ne sha u yaven a mbayev mbakiriki. Kwagh ne ka kwaghbo u vesen je!

Ú fa kwagh u alaghga vea er sha u zuan a msaanyol ve ne kpa?— Alaghga vea soo ér vea numbe a ilyeghegh you ki hen ikyum la. Shin vea shie ilyeghegh vev ki hen ikyum la sha ki you je kpaa. Kpa mayange de lumun wer or môm nana̱ numbe a ilyeghegh you ki hen ikyum ga. Aluer ka anmgbian wou u nomso shin u kwase shin ka ngô ú shin ter ú je kpaa, de lumun ga. Alegh a hen ikyum la ka alegh a ken myer, ka u orgen nana bende á ave ga.

Ú kura iyol you sha ikyev i ior mba ve eren akaabo angan nahan nena?— Hiihii yô, de lumun wer or môm nana̱ numbe a ilyeghegh you ki hen ikyum kira ga. Aluer or nan ngu nôngon ér nana numbe a ki yô, ngor imo kaa genger genger, wer: “Dem! Shi m ngu ôron keng!” Shi aluer or shon nan kaa ér ú ôr kpa ka we a gbidye ye, kpa de lumun kwaghôron u nan la ga. Ka mimi ga. Nahan za ôr keng, aluer ka nyityô or je nan er kwagh la a we kpaa! Aluer nan kaa a we ér kwagh u nan lu eren la ka kwagh u ken myer, ka kwagh u orgen nana fa ga saa we vea nan tseegh kpa, ôr keng. Aluer nan tôndo zwa ér nana na ú akaa a dedoo, shin nan ta ú mciem iyol je kpa, yevese za ôr orgen kpee.

De cie kwagh môm ga, kpa gema wa ikyo sha iyol you. Aluer mbamaren ou ta ú icin ér u̱ palegh ior mbagenev, shin u̱ de ze sha ajiir a kwagh a va za er ú la ga yô, ungwa imo ve. Aluer ú ungwa imo ve yô, iferor nana zua a ian i bulan we ga.