ORGEN yange va u va nengen a Yesu. Or la fa er Yesu a lu or u fankwagh yô, nahan á kaa a na ér: ‘Ortesen, kaa anngôm a̱ pande akaa a á lu a mi la a̱ nam.’ Or la lu a awashima ér ma un zough a akaa agen a anngô na lu a mi la, ma á hingir a̱ na.

Luun we wea lu Yesu nahan, yange ma ú er nena?— Yesu yange nenge ér kwagh za or la iyol. Kpa ú ngu wer zayol u or la lu isharen i̱ ma un zough a akaa a anmgbian na lu a mi la kpee ga. Zayol u or la jighilii yô, yange fa kwagh u a hembe lun kwagh u injaa ken uma ga.

De se hen ase sha kwagh ne. Kanyi kwagh í doo u ia hemba lun se kwagh u vesen ciilii? Ka u lun a akaa a dedoo a numben a mi shin ka u lun a akondo a he, shin ka ambaakaa la nahan i doo u lun a mi?— Ei, kwagh ngu u a lu a inja i hembe akaa angan nahan ca je yô. Man ka kwagh u yange Yesu soo u tesen je ne. Nahan á ôr injakwagh i orgen u yange hungur a Aôndo yô. Ú soo u ungwan injakwagh shon kpa?

Or la lu a inyaregh kpishi. Lu a ishule man iuna kpaa. Iyiav mbi lôô la kpa mbi doo tsembelee. Ian kera lu ken iuna na i una koso iyiav mbi lu sundan la ga. Nahan a er nyi? A kaa ken ishima na ér: ‘Me hembe iuna yam kera me maa iuna í hemban kehen. Nahan me koso iyiav yav cii man akaa am a injaa cii ken iuna i he ne.’

 Ornyar la hen ér u eren kwagh nahan la ka u lun or u fan kwagh je la. A hen ér u koson akaa kpishi la ka u eren kwagh sha kwaghfan je la. Á kaa ken ishima na ér: ‘M koso akaa a dedoo kpishi. Aa kuma anyom imôngo je. Nahan hegen yô me mem. Me ya kwagh, me ma kwagh, a lum iyol yagh yagh.’ Kpa mhen u ornyar la lu u shami ga. Ú fa kwagh u yange nzughul ken mhen na la kpa?— Lu henen kwagh sha iyol na kua akaa a yange lu a mi la tseegh, hungur a Aôndo.

Nahan Aôndo ôr kwagh a ornyar la, kaa ér: ‘We ibumeor ne! Ka nyian tugh je ú kpe ye. Nahan akaa a u kohol ne yô, aa hingir a ana?’ Ornyar la una kpe kera nahan, shi una fatyô u eren kwagh a akaa na la kpa?— Ei, aa hingir a orgen. Yesu maa kaa ér: “Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.”—Luka 12:13-21.

Ú soo u lun er ornyar la nahan ga, shin ú soo u lun er un nahana?—  Ken uma na jimin cii yange lu a awashima u ma un zough a inyaregh tseegh. Kpa mhen la lu lanegh kpen kpen je. Uma na haa sha u seer a seer ombon akaa hanma shighe tseegh. Kpa kera lu “ornyar sha kwagh u Aôndo” ga.

Ior kpishi mba er ornyar la nahan. Ve gema uuma vev cii ve har sha u ombon akaa hanma shighe. Kpa kwagh ne una va a mbamzeyol kpishi. U tesen ikyav yô, ú ngu a akaa a numben a mi, shin ú ngu a mi ga?— Ka nyi akaa ú lu a mi a ú numbe a mi? Ôrom ase yôô.— Aluer ma ijende you nan ngu a bol shin ma kwagh u numben a mi u we ú lu a mi ga di ye? Doo u ú hanger wer saa mbamaren ou ve̱ yam ú kwagh shon keng shinii?

Ashighe agen ka i lu inja er kwagh u numben a mi ngu a inja kpishi yô. Kpa shighe ka una karen yô, kwagh shon kaa a hingir nena?— Ka a bee iyol. Alaghga una hembe, nahan ú kera soo kwagh shon kpaa ga. Sha kpôô yô, ú ngu a kwagh u a hembe akaa a numben a mi yô. Ú fa kwagh shon kpa?

Ka uma wou. Uma wou ngu a inja kpen kpen gadia a uma shio yô, ú er ma kwagh môm môm ga. Kpa uma wou la har sha u we eren ishima  i Aôndo, shin ka nahan ga?— Sha nahan yô de se kera lu er ibume ornyar u yange hungur a Aôndo la nahan ga.

Ú ngu wer ka mbayev tseegh alaghga vea er kwagh u ibume er ornyar la nahan ga. Mbaganden kpishi kpa ka ve er kwagh nahan. Mbagenev je yô ka ve soo u zuan a kwagh hemban u ve vande lun a mi la. Alaghga vea lu a kwaghyan kpishi kua akondo a zeren kua ya u tsan kpaa. Kpa a kuma ve ga. Vea soo u shi zuan a akondo seer. Shi vea soo u seer maan ayou a vesen kpaa. Akaa ne cii taver ishe. Nahan ka ve er tom taveraa sha er vea zua a inyaregh kpishi yô. Man er ve seer zuan a inyaregh la, kape ka ve hemba soon u shi seer zuan a akaa je la.

Mbaganden mbagenev ka ve ker inyaregh taveraa je ve hungur a tsombor ve kpaa. Shi an ian cuku tsô kpa ka ve lu a mi sha ci u Aôndo ga. Inyaregh vev kira kia na ve umaa?— Ei, kia na ve uma ga. Vea kar a kpe kera nahan, shi vea fatyô u eren kwagh a inyaregh vev kira kpa?— Mayange ga. Gadia mbakpenev mba fetyô u eren ma kwagh môm ga.—Orpasenkwagh 9:5, 10.

Ngun ka u kaan ér doo u lun a inyaregh ga shinii?— Ei. Se fatyô u tôôn inyaregh yamen kwaghyan man akondo. Bibilo kaa ér inyaregh ki kor or. (Orpasenkwagh 7:12) Kpa aluer inyaregh doo se ishima yô, se lu a mbamzeyol kpishi. Se lu vough er ibume ornyar u yange koso akaa sha ci na iyol na, kpa gema lu avuve sha ishigh ki Aôndo la nahan.

U lun ornyar sha ishigh ki Aôndo la inja na ér nyi?— Inja na yô ka u veren Aôndo hiihii ken uuma asev. Ior mbagen ka ve kaa ér ve na Aôndo jighjigh. Ve hen ér ma kwaghgen ngu hemba u nan jighjigh ga. Kpa sha mimi yô mba mbanyarev sha ishigh ki Aôndo kpa?— Ei, mba er ka ornyar u yange hungur a Aôndo la nahan.

Mayange je yange Yesu hungur a Ter na u sha la ga. Yange ker wener una zua a inyaregh kpishi kpaa ga. Shi lu a akaa kpishi kpaa ga. Yesu yange fa kwagh u a hembe lun kwagh u injaa jim jim yô. Ú fa kwagh shon kpa?— Ka u lun ornyar sha ishigh ki Aôndo.

 Ôrom ase yôô, se lu mbanyarev sha ishigh ki Aôndo nena?— Se lu mbanyarev sha ishigh ki Aôndo sha u eren akaa a doon un. Yesu kaa ér: “M eren akaa a doon Un gbem.” (Yohane 8:29) Ka i doo Aôndo zum u ka sea eren akaa a á soo ér se̱ er la yô. Nahan ôrom ase yôô, ka nyi akaa nahan ú er sha u i̱ doo Aôndo?— Een, ú fatyô u ôron Bibilo shi zan mbamkombo mba Mbakristu shi eren msen hen Aôndo shi wasen ior mbagen kpaa sha u ve kpa ve̱ hen ve̱ fa kwagh na yô. Ka akaa a á hembe lun a inja ken uma je ne.

Yehova yange wa Yesu ikyo sha ci u un lu ornyar sha ishigh ki Aôndo. Yange na Yesu iwua i lun uma gbem sha won. Aluer se kpa se mba er Yesu nahan yô, se doo Yehova ishima shi una wa se ikyo kpaa. Yô se lu er Yesu nahan, kpa mayange se lu er ornayr u yange hungur a Aôndo la ga.