HANMA or u nan hingir ormaren cii yô, nan ngu a ci ken kwagh u a gande orumace u kaven vindi vindi yô. Hanma ormaren nan na kwagh ken iyol i nan. Ka nahan ve, kwagh u ka a vese ken ngô la ka a hingir oruma ye. Kape i lu ve ka a̱ mar wanikyundan yô, ior ve ôron kwagh u mar la ve kaan ér “mar ka ivande” ne.

Kpa sha mimi yô, u maren ônov ka a ka mhii u tom u mbamaren ve lu a mi tsô. Sha hiihii la, anikyundanev ka ve har sha mbamaren vev vindi vindi sha hanmakwagh cii, kpa vea nguren vesen yô, ugbayol vev ve gba seer, í kera lu ikyo i wan i sha iyol la tseegh kwagh a gba sha mi ga. Í gba u a wase ve sha er vea vese ken mhen man ieren man inja man ken jijingi kpaa yô.

Aluer ka u mbayev vea vese sha inja yô, dooshima u mbamaren ve lu a mi hen a ve la ngu hange hange. Doo u mbamaren vea pasen mbayev vev er ve doo ve ishima nahan, vea ungwan sha to ve, kpa hemba kan a inja u aeren a tesen dooshima la kpa aa seer sha mkaan. Een, gba u mbamaren vea lu ikyav i dedoo hen mbayev vev. Doo u a kôôm ieren ve, á tese ve atindi a vea dondo ken uma ve yô. Man gba u a tese ve akaa ne shighe u ve lu iyev her la je. Aluer i na mbayev iwasen ne fese ga zan zan shighe kar yô, akaa a kondon iyol aa fatyô u eren, man nga eren kpaa.

Ka ken Bibilo a zua a atindi a kôôm or a á hembe doon cii la ye. Ityesen i í har sha Bibilo yô, í hemba cii sha igbenda imôngo. Ka a̱ na mbayev imba ityesen la yô, ve kav ér kwagh u i lu ôron ve la ka mhen u ma orumace nan ve a mi ga, kpa, ka kwagh u Orgban ve, u a lu Ter ve u sha la a kaa yô. Mkav ne ka a wa ityesen la inya tine i taver je i gande ôron.

Bibilo taver mbamaren ishima ér ve̱ nôngo tsung ve̱ tese mbayev vev akaawan a injaa sha er vea fa, vea umbur á shi vea dondon á kpaa yô. Kpa, mbayev ka vea vesen vea nguren wan ikyondo yô, ashighe kpishi i hemba taver mbamaren u lamen a ve sha akaa a á hembe lun a inja la. Í nger takerada u i yer ér, Hen Kwagh sha Ikyev i Ortesen Uhemban La, sha u u̱ wase imba kwagh ne i̱ de kera  eren  ga.  We man ônov ou cii ua na ne kwagh u ken jijingi u ne ôron imôngo yô. Kpa ka heela tseegh ga, í nger ú ér u̱ núm mbayev mbakiriki ve̱ soo u ôron kwagh ker ayol a ve, shi ve̱ soo u ôron kwagh a mba vea lu ôron ú sha ato ve la kpaa.

Aluer ú ver ishima yô, takerada ne ver ian ér mbayev kpa ve̱ waan zwa sha kwagh u í lu ôron ker la. Í pine mbampin mba injaav ker kpishi. Ú ôr ú, ú va aren hen ape mbampin mban ve lu yô, ú nenge í kpela anhwange tiônôô her (—). Anhwange ne ngu umbur wer ér u̱ tamber, u̱ na wanye la ian nana̱ wa zwa. Ka i doo mbayev u wan zwa sha kwaghôron kpen kpen. Aluer ú de wer wanye nana̱ wa zwa sha kwaghôron la ga yô, kwagh la una ngôôr duen nan ishima ga.

Kpa kwagh u a lu u vesen je yô, mbampin mban vea wase ú ú fa kwagh u wanye wou a lu henen ken ishima na la. Alaghga wanye la nana na mlumun una lu sha mi ga. Kpa í nger kwaghngeren u a dondo sha hanma mpin la sha gbenda u ua wase wanye la nana fa u henen kwagh ken ishima sha inja yô.

Kwagh u doon tsung u a due tseer tseer ken takerada ne yô, ka ufoto mba ve lu ker kpishi, iyenge ve i hembe 230 la. Ufoto mban cii, hanmô yô i war ngeren mkaanem hen kpe, man akaa a i nger her la kpishi ka a taver wanye la ishima ér nana̱ wa zwa sha kwagh u nan lu nengen ken foto shon, shi í er nan ongo la. Nahan nenge ufoto mban vea wanye la. Ve doo u tesen kwagh a mi kpishi, sha ci u vea na kwagh u i tese la una hemba wanger wang.

Wanye la nana va faan u ôron takerada yô, taver nan ishima nana̱ ôr takerada ne sha ato ou, shi nana̱ ôron ú nan tswen kpaa. Er nana zer ôron ú la, kape nana lu hemban kôron kwaghwan u injaa u i we ker la saan a mi ken ishima kua ken mhen u nan je la. Kpa mba taver we ishima ér u̱ ôron takerada ne sha ato a wan wou, shi u̱ eren kwagh ne hanma shighe kpaa, ka nahan ve ú nyôôso ikyor i dooshima u a lu hen atô u we man wan wou la, shi ú nyôôso icivir i nan ne ú la kpaa ye.

Anyom puekar a á sember karen ne je kpa, i lu a̱ gba ponon kwagh u yaven a kwase shin kwagh u mbaimev shin aeren a hôngorough agen sha ashe a mbayev mbakiriki yum er i eren hegen nahan ga. Nahan gba u a kura ve, man takerada ne na iwasen ne sha gbenda u civirigh, kpa shi ú pase akaa ne wang, ú yer kwagh ga. Kpa, hemba kan a inja u a tese mbayev ve̱ fa Ter wase u sha, Yehova Aôndo, un u a lu Imbor i hanma kwaghfan cii la. Ka kwagh u Yesu, Ortesen Uhemban yange eren hanma shighe je la. Se mba a ishimaveren ser takerada ne ua wase ú kua tsombor wou cii, ne maa uuma enev sha gbenda u ne doo Yehova ishima yô, ka nahan man ne zua a iveren gbem sha won ye.