ALUER ú er nyityô kwagh i ú soo u eren cii nahan, a doo u kpa? Ashighe agen ka i lu ú er or môm kpa ma nan er ú kwagh u ú er ga yôô? Ôrom ase er ú hen la sha mimi.

Kpa ka nyi jim i hembe doon we? Sha mimi yô, hemba doon u ú er nyityô kwagh i ú soo ciilii? Shin akaa nga á hemba zan doon zum u ka wea ungwa ter ú man ngô ú yôô?— Aôndo kaa ér u̱ ungwan imo i mbamaren ou, nahan ka a inja u eren nahan. De se nenge aluer se fatyô u fan ityôkyaa shon yô.

Ú ngu anyom a me?— Ú fa anyom a ter ú kpa?— Ngô ú shin ngô u ter ú shin ter u ngô ú di gema mba anyom a me?— Ve tsa sha won hemba ú yem zende zende. Man er or ka nana tsaan kpishi la, kape shi ka nan fa akaa kpishi kpaa je la. Hanma inyom yô ka nan seer ungwan akaa shi nan seer nengen a akaa shi nan seer eren akaa kpaa. Nahan agumaior aa fatyô u henen kwagh sha ikyev i mba ve hembe tsan a ve la.

Ú fa ma or u ú lu tamen a nan kpa?— Kwaghfan wou hemba u nan shin u nan hemba u wouwe?— Er nan ve ú hembe fan kwagh a  nanaa?— Ka sha ci u ú ngu tamen a nan. Ú hen akaa hemba or u ú lu tamen a nan la.

Ka an nan hembe tsan a we shin mo shin hanmaor ugen ciili?— Ka Yehova Aôndo. Kwagh u á fe la hemba u wou shi hemba u wam kpaa ica je. Ka una kaa ér se̱ er kwagh yô, ka se fa je ser ka kwagh u vough a kaa ér se̱ er ye, shin aluer kwagh shon war taver se u eren je kpaa. Ú fa er Ortesen Uhemban la je kpa shighe ugen la yange taver un u ungwan kwagh kpa?

Shighe ugen la Aôndo kaa a Yesu ér a̱ er kwagh ugen, kpa kwagh la taver un u eren tsung. Yesu er msen sha kwagh ne, er se nenge ken foto heen nahan. A sôn a kaa ér: “Wea rumun yô, tôôm iyongo ne kera.” Er Yesu er msen nahan yô, tese je ér ashighe agen ka i taver u eren ishima i Aôndo. Kpa Yesu kure msen na la nena? Ú fa er yange kure kpa?

Yange Yesu mase kuren msen na la nahan, ér: “Nahan kpa ka ishima Yam ga, i̱ lu ishima You i̱ er ye.” (Luka 22:41, 42) Yange soo ér i̱ lu ishima i Aôndo i̱ er ye, i̱ de lu i̱ na ga. Nahan a za hemen a er kwagh u Aôndo soo la, kera lu kwagh u un hen ér ka u hemban doon la er ga.

Kwagh ne tese se nyi kwagha?— A tese se ér doo u se fa ser hemba doon u eren kwagh u Aôndo a kaa la sha hanma shighe cii, shin a̱ lu kwagh u taver se je kpaa. Shi a tese se kwagh ugen kpaa. Ú fa kwagh shon kpa?— Se fa hegen ser Aôndo vea Yesu ka or môm er ior mbagenev ve ôron la nahan ga. Yehova Aôndo hemba tsan shi ngu a mfe hemba Wan na Yesu.

Zum u se ongo imo i Aôndo yô, se mba tesen ser á doo se ishima.  Bibilo kaa ér: “Ka dooshima u Aôndo ne, ka u se̱ kuran atindi a Na.” (1 Yohane 5:3) Nahan doo u se ungwan imo i Aôndo je ka ahse tugh ga. We kpa ú soo u ungwan imo na, shin ka nahan ga?

De se bugh ase Bibilo se nenge kwagh u Aôndo a kaa ér mbayev ve̱ eren la. Se ôr kwagh u i nger ken Bibilo ken Mbaefese ityough 6, ivur i sha 1 zan zan i sha 3 la. I ôr her ér: “Ne ônov, ungwan nen imo i mbamaren enev ken Ter. Gadia ka nahan je i lu vough ye. Civir ter ú man ngô ú, ka tindi u hiihii u ityendezwa i lu sha mi je la, ka nahan man á kpe u iyol man ú tsa sha won ye.”

Nahan, ú nenge er i lu Yehova Aôndo iyol na je a lu kaan a we ér u̱ ungwan imo i ter ú man ngô ú yô. U “civir” ve la inja na ér nyi? Inja na yô ka u we wan ve ikyo. Man Aôndo tôndo zwa kpaa je ér aluer ú ngu ungwan imo i mbamaren ou yô, “á kpe u iyol.”

De m ôrou kwagh u ior mbagen mba yange ve ungwan kwagh, nahan ve war uuma vev yô. Ior mban lu sha ayange a tsuaa la ken zege gar u Yerusalem. Ior mba ken gar la kpishi ungwan imo i Aôndo ga, nahan Yesu ta ve icin ér Aôndo una tim gar ve la. Shi Yesu ôr ve kwagh u vea er ve, vea war uuma vev aluer kwagh u dedoo doo ve ishima yô. Á kaa ér: “Zum u né nenge akumautya aa kase Yerusalem á wa atô yô, fa nen je ner, mtim na kuma ve. Hen zum la mba ve lu ken [Yerusalem] ve̱ yevese ve̱ yem sha iwo.”—Luka 21:20-22.

Yange mbautyaav va ta ityav sha Yerusalem di vough er Yesu ôr nahan. Akumautya a Roma kase un ningir yisa. Nahan kpa, tativ hide yem, kpa ityôkyaa yô or fa jim ga. Ior kpishi maa hen ér kwagh u zan iyol kera ngu ga. Nahan ve lu ken gar la her. Kpa Yesu vande kaan a ve ér ve̱ er nena?— Luun er yange wea lu ken Yerusalem nahan, yange ma ú er nena?— Ior mba yange ve na Yesu jighjigh yô, ve yevese ve undu uya vev, ve yem sha iwo ca a Yerusalem.

Inyom jimin kar kpa kwagh er gar u Yerusalem ga. Inyom i sha  uhar kpa kwagh er ga. Inyom i sha utar la kpa kwagh môm er ga. Alaghga ior mbagenev yange vea hen je ér mba yange ve súra ve yevese ve undu gar la ka abumeaior. Kpa mba ker ken inyom i sha unyiin la yô, akumautya a Mbaroma za hide shi va. Ve va kase Yerusalem ve ningir ve yisa. Hen shighe ne yô shighe kar u ior a yevese a war. Kwa ne yô mbautyaav mbara hembe gar la. Ior mba ve lu ken gar la kpishi kpe, mbagenev cii yô i kôr ve, í yem a ve uikyangen.

Kpa kanyi yange i er ior mba yange ve ungwa imo i Yesu laa?— Yange ve war. Ve lu ica a Yerusalem. Nahan kwagh môm er ve ga. U ungwan kwagh la yange kura ve.

Aluer we kpa ú ngu wanye u ungwan kwagh nahan, kwagh la una kura ú ga zee?— Alaghga mbamaren ou vea kaa a we ér u̱ de numben sha godobi ga. Hii nan ve vé kaa nahana?— Ka sha ci u alaghga mato  una ta sha a we. Kpa iyange igen yô alaghga ú hen wer: ‘Hegen ne yô umato mba ga. Kwagh una erem ga. Mbayev mbagenev kpa mba numben sha gbenda, kpa kwagh er ve ga.’

Kape ior kpishi ken Yerusalem yange ve hen je la. Er akumautya a Mbaroma hide yem yô lu inja er kwagh u zan iyol kera ngu ga nahan. Mbagenev lu ken gar la her. Nahan ve kpaa ve lu keregh her. Yange i ta ve icin kpa ve ungwa icintan la ga. Sha nahan yô i tim ve.

De se nenge sha ikyav igen. I lu nahan ú numbe a ashanu vee?— A doo ú u kenger usu shighe u ú tsar ashanu yô. Kpa u numben a ashanu ka kwaghbo. Alaghga iyou jimin cii ia hia, we kpa ú hia ú kpe!

Umbur wer, u ungwan kwagh sha ashighe ashighe tseegh la yô, kuma ga. Kpa aluer ú ongo kwagh sha hanma shighe cii yô, kwagh la una kura ú. Man ka an nan kaa a we ér: ‘Ne ônov, ungwan nen imo i mbamaren eneve’?— Ka Aôndo. Shi umbur wer, á ôr nahan ka sha ci u ú doo un ishima.