HANMA or cii ishima ka i nyian nan, kua mba ve civir Aôndo je kpaa. Orpasalmi yange nger ér: “Mbamhen ve ngeem ken ishima.” (Pasalmi 94:19) Yesu kpa yange kaa ér, “akaa a nyian ishima a uma” aa na yô, a lu ican kpishi u civir Yehova ken ayange a masejime ne. (Luka 21:34) We u nenge nena? Ishima nyian we kpishi sha kwagh u mtaver u inyar shin mbamzeyol mba hen tsombor shin sha kwagh u gbong gbong wouwee? Yehova una wase u u wan ishima nena?

Se fatyô u hemban ishimanyian sha tahav asev tseegh ga. Apostoli Paulu yange nger ér: “Mba eren se ican sha hanma ian” cii. Shi a kaa ér: “Lan se ishima . . . mba kôron se tan inya.” Nahan cii kpa Paulu shi kaa ér ‘i hyer se a hyer ga,’ shi “se hunde ishima kera ga,” shi “i wua se ga.” Ka nyi i wasen se u wan ishima? Ka “agee a hemban” la; agee a i lu Yehova Aôndo wase u hembanagee cii a ne se la.—2 Mbakorinte 4:7-9.

Hide gbidye kwar nenge er ngise Yehova na u “agee a hemban” ne yô. U umbur ma kwaghôron u taver we ishima u yange u ungwa ve u seer wuese mlumun u sha mhôôn u Yehova la kpa? Yange wea tesen mbagenev kwagh u ishimaverenkeghen i va lun ken Paradiso la nahan, u seer nan uityendezwa mba Yehova jighjigh ga he? Ka sea zaan mbamkombo mba Mbakristu shi sea pasen mbagenev akaa a se ne jighjigh a mi la yô, kwagh la a na se agee a wan ishima a akaa a nan se ishimanyian, shi se zua a bemshima sha er se civir Yehova saan saan yô.

Sha mimi yô, ashighe agen, akaa nga a va cinge sha vese je, ape geman a lu ga. U tesen ikyav yô, Yehova kaa a vese ér se ker Tartor na hiihii shi se de gbe uwer u eren akaa a ken jijingi ga. (Mateu 6:33; Luka 13:24) Kpa aluer ahendan shin kwaghnyoon gayô mbamzeyol mba hen tsombor shile sha we je u kera ngu a mpe iyol ga di ye? Shin aluer tom u u eren la ka u ya u shighe cica shi u vôr u kera fatyô u eren ityom i ken tiônnongo ga di ye? Alaghga iyol ia kpe u sha ci u akaa a i gbe u u er la ngee, kpa u gema u ngu a shighe man tahav mbu eren a ga. Adooga je yô, maa u hii u henen wer Yehova soo ér u er kwagh u a gande u agee ken inya yô.

Yehova lan mlu wase ga. Mayange keren ér se er kwagh u a gande se agee ga. A fa er shighe ngu a kar cii ve i hide i tile se iyol shi ishima kpa i gba se shimi yô.—Pasalmi 103:13, 14.

U tesen ikyav yô, nenge ase er Yehova ngise nenge sha profeti Eliya yô. Shighe u iyol kpe Eliya shi mciem gba un iyol je yevese yem ken taaikyôngo la, Yehova zôhô a profeti ne kaa ér a hide a za er tom naa? Ei. Yehova yange tindi ortyom na kwa har, va nder Eliya teghelee, na un kwaghyan. Shin er ayange kar kuma 40 nahan je kpa,  ishimanyian kua mciem lu a bee Eliya ga. Lu nyi igen kpa Yehova er sha u wasen Eliya? Hiihii yô, Yehova tese ér una fatyô u kuran un. Sha uhar yô, Yehova sur Eliya ishima sha ‘imo i legh legh.’ U masen yô, Yehova pase un er ior udubu imôngo mbagenev kpa ve lu civir Aôndo her sha mimi yô. Ica i gbe ga yô, ishima hide taver Eliya, a za hemen u eren tom sha gbashima. (1 Utor 19:1-19, NW ) Kwagh ne tese se nyi? Er ishima nyian Eliya tsung nahan kpa, Yehova wa ishima a na shi er kwagh a na sha mhôôn. Nyian kpa Yehova gema ga. Ngu nengen sha a vese er yange nenge sha Eliya nahan.

Zum u u lu henen sha kwagh u u na Yehova yô, hen sha kwagh u u fatyô u eren la. De tee kwagh u u eren nyian la karen sha kwagh u ngise u eren la ga. U tesen ikyav yô: Aluer or u gban ayem nan kera kar iyol ga kuma iwer shin anyom imôngo yô, nana fatyô u hiden hiin kwa môm kpoo maa yevese er yange nan vanden yevese la ga. Ka i gba u nana hide a hii kure kure sha er iyol a hide a taver nan shi nana hen u wan ishima yô. Mbakristu mba er mbagbanayem nahan. Mba yevese bema be bema ga. (1 Mbakorinte 9:24-27) Hii sha kwagh u kiriki u u nenge wer una lu u zange u eren hegen yô. U tesen ikyav yô, u fatyô u kangen ishima wer u kera bunde mkombo u tiônnongo ga. Sôn Yehova a wase u u eren kwagh u u we ishima la. U hiden u hiin u taver ken jijingi yô, ú mase ‘benden, nengen er TER a doo’ yô. (Pasalmi 34:8) Umbur wer nyityô kwagh i u er u tesen wer Yehova doo u ishima cii, ia vese ga nan nan je kpa, i gba un kwagh.—Luka 21:1-4.

Yehova yange wase June u hiden hen a na nena? June kaa ér: “Yange m za hemen u eren msen hen Yehova mer a wasem. Maa kwase u wan wam kaa a mo ér i zua mkohol ugen hen geri wam la. Nahan m wa ken ishima mer me za mkohol ne iyange i môm. Yange saan mo iyol u hiden kohol imôngo vea ior mba Yehova je zua ga! Mkohol ne lu kwagh u taver mo ishima u m lu keghen je la. M hide m ngu civir Yehova hegen saan saan. Hemba kpen uma wam iyol hegen cii. M kav hegen er i lu u me fatyô u lun kwagh wam tswen ga, kpa i gbe u me luun vea anmgbianev mba vea wasem shi vea taver mo ishima yô. Doom kpishi er yange shighe kar u me hide hen Yehova ga yô.”