VEGHER U SHA MÔM
“Me Ker Kwagh u A Saa Yô”
Iyôngo ne i tsume. A shi nan kpa ngi yan toho vea iyôngo igen doo doo, maa i va tsume i undu ikyumiyôngo la. Ape i̱ lu hegen ne ia fatyô u nengen a orkuran i shin iyôngo igen la ga. Iyange kpa ngi zan u been. Shi er iyôngo ne i tsum i lu ape inyamkyume i zenden yô, kwagh a fatyô u tseren i. Nahan kpa, ica i gbe ga yô, i̱ ungwa imo i orkuran i, u a lu yevese van ape i lu la yô. A va kôr i, a wa i ken ikyondo, a kar ngu yemen a i ken ya.
YEHOVA kar iyol na sha imba orkuranilev ne kwa imôngo je. A kaa a vese ken Mkaanem nam ér: “Mo iyol Yam, Me ker iyôngo Yam man Me tôv i hwange.”—Esekiel 34:11, 12.
“Iyôngo i M Koson I” Yô
Ka unô ve lu iyôngo i Yehova? Jighilii yô, iyôngo i Yehova ka ior mba a doo ve ishima shi ve civir un la. Bibilo kaa ér: “Sé gure, sé civir, sé ngurum nen, sé gure nen inya sha ishigh ki TER u A gbe se la. Gadia Wen ka Aôndo wase je, man se se mba ior Nav mba A koson se yô, man ilev mbi sha ikyev Na.” (Pasalmi 95:6, 7) Ior mba Yehova ka ve kegh iyol u dondon imo na vough er iyôngo ka i dondo orkuran i nahan. Kpa mba wang a ihyogholough iyol shio? Ei. Ashighe agen mbacivir Aôndo ka ve hingir er ‘iyôngo i i sambe i wue wue’ shin “i i saa” gayô ‘i i lu tsumen nahan.’ (Esekiel 34:12; Mateu 15:24; 1 Peteru 2:25) Nahan je kpa, u ngu wer or ka nana er isholibo tsô maa Yehova a gbihi nan ér kwagh u nan bee a bee je ga.
U nengen wer Yehova ka Orkuran wou her kpa? Nyian ne, Yehova tesen ér un ngu Orkuran nena? Time ase sha igbenda i itiar ne:
Koson se ken jijingi. Yehova kaa ér: “Me koso ve hen ijiir i toho u doo her yô; ka heera vea yav hen ijiir i dedoo ye, man hen ijiir i toho u lu gese gese yô, vea yaan kwagh.” (Esekiel 34:14) I lu je kpa Yehova ngu a kanshio u nan se kwaghyan u ken jijingi kwa môm tsô kpaa ga. Ne se kwaghyan u ken jijingi u a wasen se ne sha igbenda kposo kposo man sha shighe vough kpaa. U fatyô u umbur ma ngeren shin kwaghôron gayô ma tser u vidio u u nenge wer ka msen wou jighilii je Yehova a ongo yôô? Kwagh ne na u ngu a vangertiôr wer Yehova wa u ikyo gaa?
Yehova kor se shi wasen se. Yehova tôndo zwa ér: “Me hide a kwagh u a tsum kera la, man Me kange kwagh u a kever yô, man Me taver kwagh u a gbe angev yô.” (Esekiel 34:16) Yehova taver mba ve vôr shin ishima i nyian ve tsung la. Shighe u iyôngo na i vihi iyol, man i lu orcivir Yehova ugen nan vihi i iyol je kpaa, ngu a kange i, a wase i i hide i taver. Shi ngu a hide a mba ve tsum la, kua mba ve lu henen ér kwagh môm kera ngu zan a ve doon ga la.
A fa er i lu tom na u nengen sha a vese yô. Yehova kaa ér: “Me yima i ken ajiir a i sambe i la cii, Me ker kwagh u a saa yô.” (Esekiel 34:12, 16) Yehova nengen iyôngo i i saa la ér kwagh u i bee a bee je ga. Shighe u iyôngo i saa yô, ngu a fa, nahan a ker i, shi ka una zua a i yô, a ember kpishi. (Mateu 18:12-14) Kera kpa, Yehova yila mbacivir un mbamimi ér “iyôngo Yam, iyôngo i M koson i” yô. (Esekiel 34:31) We kpa u ngu iyôngo na.
Yehova nengen iyôngo i i saa la ér kwagh u i bee a bee je ga. Ka una zua i yô, a ember tsung
‘Se Hide Nen hen Yehova’
Yehova ngu keren we shi kaan ér we u hide hen na sha ci u nyi? Ka sha ci u Yehova soo ér i saan we iyol. A tôndo zwa ér una na “ikyumenura u haan iveren” una nôô sha ci u iyôngo na. (Esekiel 34:26) Ityendezwa na ne ka i gbilinigh ga. U vande nengen a ikyav i kwagh ne sha ashe ou.
Umbur er yange u hii fan Yehova ve lu u la. U tesen ikyav yô, yange u fa mimi sha kwagh u iti i Aôndo man awashima na sha ci u uumace nahan lu u nena? U umbur er yange wea za kohol a anmgbianev imôngo sha mbamkohol mba kiriki man mba vesen ve i saan we iyol tsung la kpa? Yange wea za pase or u i sar nan u fan mimi la kwagh wea hiden ken ya wou nahan, i saan we iyol shi i kundu u iyol ga he?
U fatyô u hiden zuan a msaanyol la. Ngise mbacivir Aôndo mbagenev er msen ér, ‘Se hide nen hen Yehova.’ (Ukwelegh 3:40) Yehova ungwa msen ve la, nahan ior nav hide za hemen u civir Aôndo, shi ve za hemen u zuan a msaanyol kpaa. (Nehemia 8:17) We kpa Yehova una er a we nahan.
Sha kpôô yô, ka zange u hiden hen Yehova ga. Time ase sha mbamtaver mbagenev mba alaghga u tagher a mi zum u u soo u hiden hen Yehova yô, kua gbenda u u hemba ve la kpaa.
