VEGHER U SHA UNYIIN
Ibo i ken Ishima—“Wanger Mo sha Isholibo Yam”
“Yange m sember zuan a tom ugen, u u na seer kpen tsombor wase iyol yô, kpa tom ne shi na m nyôr iyol ken akaa kpishi a i doo u Orkristu nana er ga yô. M hii u eren uiniongo mba ember umemyol shi m nyôr iyol ken akaa a patii shi m gema zan adua ken ucôôci je kpaa. M de u zan mbamkombo shi duen kwaghpasen kuma anyom 40. Er shighe lu karen la, m lu nengen mer isholibo yam ngi seer a seer, nahan gande u Yehova una dem kwaghbo. Yange ishima nam ibo je gande. Gadia yange m fa mimi cii je ve shi m va hide m dondo gbenda u mimi ga ne ye.”—Mkaanem ma Martha, anmgbian u kwase ugen.
IBO i ken ishima ngi er ikyav mbi yuhwan mbi mbia fatyô u sombon or mon nahan. Tor Davidi yange nger ér, “Aferakaa am cirim, yisa, a yuhwam a hembam, er ikyav mbi yuhwan yum yô.” (Pasalmi 38:4) Mbakristu mbagenev ishima na ve ibo ngee gande, je yô, ve tôô ér a tsa kpa Yehova una de ve kwaghbo ga. (2 Mbakorinte 2:7) Kpa ka mimi er ve henen nahanaa? Aluer u er asorabo a vesen je kpaa yô, tese ér u gba ica a Yehova gande u una de u kwaghbo shinii? Ei, tese nahan ga!
“Sé Hen Nen Kwagh Imôngo”
Yehova gbihin mbaasorabo mba ve gem ishima la ga. Jighilii yô, ngu a kegh a kegh iyol u ngohol ve! Ken injakwagh i Yesu ôr sha kwagh u wan u a undu ter na la, a tôô Yehova a kar sha Ter u fan kwagh, u wan u nan a undu tsombor na a yem dang u eren yô. Shighe kar yô, wan la za cin gba hiden hen ya. “Kpa er [wan ne] lu ica je tsô, ter na ta ashe, za nenge a na, mhôônom kôr un kpishi, a wa ayem inya, a za kuve un, a gba susen un zwa.” (Luka 15:11-20) Ka i sar u u kporom ikyua a Yehova kpa, u nenge wer u ngu “ica” a na yumu? Mhôônom kôr Yehova a we tsung, er Ter u Yesu ôr kwagh na ken injakwagh la nahan. A Kegh a kegh ave u ngohol we.
Nahan kpa, aluer u nenge wer u er asorabo a vesen shin asorabo a ou ngee gande u Yehova a de u di ye? Nenge ase kwagh u Yehova a lehe se, i nger ken Yesaia 1:18 la. Ivur la kaa ér: “Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan.” Sha nahan yô, aluer asorabo a ou nyian er mkurem ma nyian ma ma hee sha ikyondo i pupuu nahan je kpa, a gande Yehova u den we ga.
Yehova soo ér ishima i zer nan se ibo sha isholibo yase gbem ga. Nahan u er nan ve u zua a mmem u Aôndo ka una de or kwaghbo shi nana lu a imo i wang ken ishima ve nan zua a mi laa? Nenge akaa ahar a Davidi yange er ne. Hiihii yô, a kaa ér: “Me pase TER akaabo am.” (Pasalmi 32:5) Umbur wer Yehova vande kaan a we gbar gbar ér we u lamen a na ken msen, shi we u va ne ‘hen kwagh’ imôngo. Lumun myer na la. Pase Yehova asorabo a ou, shi pase un er ishima i lu u ker la kpaa. Er Davidi vande nengen a gbenda u Yehova eren kwagh a na yô, a er msen vangertiôr ér: “Wanger mo sha isholibo yam. . . . Ishima i zamber, i uren tsung yô, Ú laha ga, Aôndo.”—Pasalmi 51:2, 17.
Kwagh u sha uhar yô, Davidi lumun iwasen i profeti Natan, u Yehova tindi un la. (2 Samuel 12:13) Nyian ne, Yehova ver mbatamen ken atôônanongo, mba i tsaase ve u wasen mbaasorabo mba ve gem ishima la u hiden yan ikyar a Yehova yô. U za hen mbatamen mban yô, vea wa u kwagh ken Ruamabera shi vea er msen sha ci wou, sha er u zua a mmemshima shi ishima ia de u nan we ibo, nahan u mough uange ken jijingi yô.—Yakobu 5:14-16.
Yehova soo ér we u lu a imo i wang ken ishima nahan i pever we iyol
“Saan Or u I De Nan Kwaghbo u Nan la Iyol”
Sha mimi yô, alaghga u pasen Yehova Aôndo asorabo a ou shi zan hen mbatamen la a lu kwagh u hemban taver we cii. Davidi kpa kape yange lu un je la. Yange “huan ving” sha asorabo a na anshighe kar. (Pasalmi 32:3) Nahan kpa, ken masejime yô, a mase kaven er u pasen asorabo a na shi geman ishima la wase un kpishi yô.
Iwasen i vesen i Davidi yange zua a mi yô, lu msaanyol. A nger ér: “Saan or u i de nan kwaghbo u nan la iyol, man i cir isholibo i nan kpaa yô.” (Pasalmi 32:1) Shi yange er msen ér: “Tere, bughum ityumbuzwaagh, nahan zwa wam ua pase iwuese You.” (Pasalmi 51:15) Er Davidi kera lu a ibo ken ishima ga shi doo un tsung er Aôndo a de un isholibo na yô, ishima mgbegha un u ôron mbagenev kwagh u Yehova.
Yehova soo ér we u lu a imo i wang ken ishima nahan i pever we iyol. Shi a soo ér u ôron mbagenev kwagh na kua kwagh u mbaawashima nav a ishima i gbar gbar man sha mimi, i de lu a ishima i zunguluu ga. (Pasalmi 65:1-4) Umbur, ngu yilan we ér u va ‘i̱ ese asorabo a ou kera, nahan ashighe a myôhôryol a sha ishigh ki Ter kpaa a̱ va sha a we.’—Aerenakaa 3:19.
Ka kwagh u yange er Martha u se vande teren kwagh na la kpaa je la. A kaa ér: “Wam wam yange za hemen u tindin mo a magazin u Iyoukura man Awake! Kure kure tsô m hide m hii u varen a Yehova. Kwagh u yange hemba taver mo u eren sha er me hide yô, lu u sônon un mer a dem asorabo a am cii la. Kpa ken masejime yô, m er msen, m sôn un mer a dem asorabo a am. Anyom yange kar kuma 40 cii ve m hide hen Yehova ye. Kwagh u erem ne tese ér, aluer or undu Yehova anyom ngee je kpa, Aôndo una fatyô u shi nan nan ian i hiden va civir un shi lun ken dooshima na.”
Kwagh Ugen u Alaghga Shi Una Doo U Yô
IYOUKURA (I HENEN)
U Er Nan Ve Yehova Una De U Kwaghbo?
KPOROM HEN YEHOVA
Aôndo U a ‘Keghen Iyol u Den Kwaghbo’ La
Aluer Aôndo umbur hanma kwagh cii yô, una fatyô u den or kwaghbo shi hungur a mi nena?
ICER I VIDIO
Wan U A Undu Ter Na la Hide Ve
Kwagh er vihi yô, mbagenev vea fatyô u meen agumaior undun atesen a Mbakristu a mbamaren vev yange tese ve la. Nenge akaabo a agumaior a tagher a mi nyian la.
