Hen or u civir Yehova a vese imôngo:

Er u fe nahan, Bibilo ka takerada u u hembe ôron kwagh u ior yô. Ior kpishi mba Bibilo i er kwagh ve la lu nomso man kasev mba jighjigh mba yange ve tagher a mbamtaver mba se kpa se tagher a mi nyian ne yô. Ve lu “inja i môm a vese.” (Yakobu 5:17) Mbagenev tagher a ishimanyian man mbamzeyol kpishi. Mbagen yô, tsombor ve shin mba civir Yehova a ve imôngo er akaa a nan ve ishimavihin tsung. Mbagenev di yô, ishima na ve ibo kpishi sha ci u asorabo a ve.

Yange ior mban de u civir Yehova kuaa shinii? Mayange ga cii. Ve mbagenev kpishi yange ve er kwagh vough er orpasalmi ugen u er msen hen Yehova la nahan, ér: “M tsume er iyôngo i i saa yô, ker wanakiriki Wou, gadia atindi a Ou hungur mo ga.” (Pasalmi 119:176) We kpa u eren msen er orpasalmi ne nahana?

Yehova hungur a mbacivir un mba ve tsum ve undu ikyumuile na la ga. Ngu a tindi mba ve civir un a ve imôngo mbara ve za ker ve. U tesen ikyav yô, nenge er ngise Yehova wase Yobu, or u civir un u yange tagher a atsan atô kposo kposo la. Akaa yange saa un, shi ior kpe un, shi gba icôron uange. Shi mba yange ve senge ér mba va taver Yobu ishima la kpa ve ôr akaa a vihin un a vihi ishima ker. Nahan kpa yange gema ijime a Yehova ga, shin er shighe ugen la hen kwagh bagenaa nahan kpaa. (Yobu 1:22; 2:10) Yehova yange wase Yobu u hiden taver ken jijingi nena?

Gbenda môm u Yehova wase Yobu yô, lu sha ikyev i Elihu, u un kpa cian Aôndo la. Elihu yange kegh ato a Yobu er lu pasen er ishima i lu un ker la, nahan ishima mgbegha un u ôron kwagh. Kpa lu nyi ôrô? Yange puu Yobu shin nôngo ér una na ishima i tsuwe un ker, sha u nan un ibo shin heen unu? Elihu nenge ér un hemba Yobu? Mayange ga! Jijingi u Aôndo yange mgbegha Elihu kaa ér: “M ngu er we nahan vough; ka shin inya i coon mo kpaa ye.” Shi a taver Yobu ishima ér: “Mciem am maa ta u iyol ga, mkighir wam kpaa, una yuhwa u iyol ga.” (Yobu 33:​6, 7) Elihu yange seer a seer Yobu ikyav ga, kpa wa un kwagh kundu kundu shi taver un ishima.

Fa wer ka awashima u se kpa se lu a mi ve se nger antakerada ne je la. Kwagh u hiihii yô, se vande keghen ato a mba yange ve undu nongo u Yehova mbara, se ungwa akaaôron a ve shi se fa akaa a ve tagher a mi yô. (Anzaakaa 18:13) Se mba been yô, se time ken Ruamabera zulee, se gbidye kwar sha ngeren mba ve pase er ngise Yehova wase mbacivir un mba ve tsume ve undu un mbara yô. U masen yô, se kohol akaa a ior mba sha ayange ne kua akaa a ior mba Bibilo i er kwagh ve ér yange ve tsume la, maa se gber antakerada ne. Se mba kaan a we ser time ken antakerada ne doo doo. Fa wer u doo se ishima tsung je.

Mbahemenev mba Shin Itine mba Mbashiada mba Yehova